Вестфалскый мир

Вестфалскый мир — означать 11 мировых договорох, подписаных в року 1648, котрыма закончила ся Тридцятьрочна война. Догваряня о мирѣ ся вели за четыри рокы (1644 – 1648) в Мюнстеру и Оснабрюку. Остаточно Вестфалскый мир быв подписаный 24. октобра 1648 в Мюнстеру и Оснабрюку. Два городы суть оддалены о 45 км, а причина такого роздѣлѣня была в том, же Оснабрюк быв протестантскый, а Мюнстер католицкый и так ся дало задоволити жаданя обох сторон.

Ратификация договора в Мюнстеру (Герард Терборх, 1648)

Вестфалскый мир быв еден з найвызнамнѣйшых дипломатичных актох в нововѣкой истории Европы и первый такого розсягу межинародный договор. В догварках брали участь 109 делегаций. Вестфалскый мир подав прецеденс дипломатичного конгресса, котрый служить за модел до днешного дня.^[1]

Главны етапы догварянь

• Первый мюнстерскый мир: 30. януар 1648, межи Испаниев и Републиков споеных провинций, закончив Восемдесятрочну войну; тот мир быв пак потвердженый в остаточном Вестфалском договорѣ.
• Вестфалскый мир:
  • Другый мюнстерскый мир: 24. октобер 1648, межи римско-нѣмецкым цѣсарем и имперскыма станами на едном боцѣ, а Франциев и союзниками на другом боцѣ.
  • Мир в Оснабрюку: 24. октобер 1648, межи римско-нѣмецкым цѣсарем и имперскыма станами на едном боцѣ, а Швециев и союзниками на другом боцѣ.

Окреме до вестфалского мира додав ся и так званый Пиренейскый мир з року 1659, котрым ся укончила война межи Франциев и Испаниев (7. новембер 1659), зачата яко часть Тридцятьрочной войны, и установили ся границѣ тых держав в Пиренеях.

Главны териториалны и правны змѣны

Мапа Европы в року 1648 (спрощена)

• Република споеных провинций и Швайц зыскали независимость, котру узнала Римско-нѣмецка империя.
• Швеция зыскала повне панованя над берегами Балтицкого моря.
• Франция зыскала територии по Рейн, котрый достав статус рѣкы слободной межинародной плавбы.
• Нѣмецкы землѣ зыскали векшы права сопротив цѣсаря Римско-нѣмецкой империи и право на своей територии держати ся своей вѣры.

Вызнам Вестфалского миру

• Протестантскы вѣры достали ровны права з католицков. В регулованю религийных одношѣнь быв приятый в духу Аугсбургского миру (1555) принцип слободы вѣровызнаня, але и право основной вѣры на територии суверенного пановника: cuius regio, eius religio (чие панство, того набоженство).
• Цѣсарьска моц в Римско-нѣмецкой империи была значно ослаблена на хосен станох. З империи стала ся федерация независимых крайох з формалным головов державы — цѣсарем, котрый мав быти выбераный лем з роду Габсбургох.
• Габсбургы, ослаблены в Римско-нѣмецкой империи, захранили свою абсолутну моц в дѣдичных землях Австрии, (Габсбургской монархии) и Землях чешской коруны. В тых землях дале ширила ся контрреформация. В Мадярском кралевствѣ мусѣли Габсбургы вшак толеровати протестантску вѣру. Окреме в договорѣ была зазначена независимость Княжества Ардял, понеже его князь, Дьердь І. Ракоци, протестант, в Тридцятьрочной войнѣ боевав против Габсбургох на сторонѣ западных союзникох.^[2]
• Проглубили ся господарскы роздѣлы межи Западнов и Восточнов Европов: покы там рушила ся розвивати промыслова продукция и торжна економика, ту заховали ся середновѣкы економичны одношѣня.

Жерела и одказы

• 1911 Encyclopædia Britannica/Westphalia, Treaty of англ.
• Щербак В.О. ВЕСТФАЛЬСКИЙ МИР 1648 Р. [Електронний ресурс] // Енциклопедія історії України: Т. 1: А-В / Редкол.: В. А. Смолій (голова) та ін. НАН України. Інститут історії України. - К.: В-во "Наукова думка", 2003. - 688 с.: іл. – Режим доступу: http://www.history.org.ua/?termin=Vestfalskyj_myr_1648 укр.