Паралімпійські бавища

Паралімпійські бавища вадь Паралімпіада є періодична межинародна спортивна подія, у котруй участвувут спортсмены з інвалідностями. Зимні тай літні Паралімпійські бавища традично ся правлят через куртый час по удповідных Олімпійськых, тай зачинавучи з 1992. рока хоснувут олімпійські такой локації. Літня Паралімпіада ся реґуларно держит уд 1960. рока, а зимня — уд 1976. рока. За Паралімпіаду є зодповідный Межинародный Паралімпійськый комітет.

Паралімпійські бавища ся зачали у 1948. рокови з малого турніра про британськых ветеранув Другої світової войны.

Добрі на участь інвалідності сут поділені на десять катеґорій: нарушеня мускулної силы, нарушеня пасивної досяжности кунцьовок, удсутство кунцьовок, розлука у довготі нуг, низка статура, гіпертонія, атаксія, атетоз, нарушеня нику тай інтелектуалні інвалідності.^[1]

Історія

Спортсмены з інвалідностями на Олімпійськых бавищах

Сперед тым, як ся зачали держати Паралімпіады, атлеты з інвалідностями участвовали у Олімпійськых бавищах. Першов таков особов быв німецько-америцькый ґімнаст Джордж Айзер, котрый у 1904. рокови пушов на Олімпіаду из протез умісто ногы. Олівер Голошші, мадярськый бавляч у водноє поло из ампутованов кунцьовков, трираз за шором участвовав у Олімпійськых бавищах, зачинавучи з рока 1928^[2]. Мадярськый спортсмен Кароль Токач на Літньых Олімпіадах 1948 тай 1952 быв на змаганьох у стріляньови — права рука му была ампутована, ун стріляв лівов. Щи єдным прикладом была Ліс Гартел, датська вершниця из поліоміелітом, котра здобыла срібро на Літюй Олімпіаді 1952.^[3]

Бавища у болници Сток-Мендевіла

Перші змаганя про спортсменув из інвалідностями пруйшли у єден день из лондонськыма Літньыма Олімпійськыма бавищами 1948. Німецько-жидувськый дохтор Лудвіґ Ґуттманн^[4], котрый у 1939 утік из нацистської Німещины из помочов Рады про помуч академікам-утіканцям^[5], орґанізовав спортивні змаганя про британськых ветеранув Другої світової войны из травмами хребта у болници Сток-Мендевіла, обы даяк уліпшити їхню ситуацію, дати їм смысел далшого живота тай не позволити їхньым мускулам атрофовати уд постільного режима. Перша така подія дустала назывку „Межинародні колесово-кріслові бавища 1948“ тай удбыла ся у єден час из Олімпіадов того рока.^[6] Они ся держали кажджый рук на тотуй такой локації; у 1952. рокови у них поучаствовали нідерландські тай ізраилські ветераны, што вчинило змаганя посправді межинародныма. У 1960. рокови IX. бавища першый раз были проведені не у Споєному Корольстві, а у Римі — як и Літні Олімпійські бавища 1960. Ипен еся подія ся тримле ги перші Паралімпійські бавища.^[7]

Назывка тай символы

Паралімпійськый флаґ

Першый Паралімпійськый знак (1988–1994) хосновав пять „па“.

Хоть зачаткова назывка была вчинена ги портманто из анґліцького paraplegic „паралізованый у нижнюй половині тіла“ тай Olympic,^[8] што было актуално про перші бавища, де участвовала ипен челядь из травмами хребта, май пак до змагань ся припоили атлеты из иншакыма інвалідностями, позад чого назывка стратила актуалность. На днешньый день формално назывка ся обяснят так, ож пара- вто грецькоє παρά, pará „коло, пиля“ тай указує на вто, як Паралімпіада ся держит паралелно из Олімпіадов.^[9] Першый раз назывка „Паралімпіада“ ся офіційно ухосновала бігом Літньых бавищ 1988 у Сеулови.

Катеґорії

Межинародный Паралімпійськый комітет заклав десять катеґорій інвалідности, атлеты з котрыма годні участвовати у Паралімпіаді, айбо не кажджый окремо узятый спорт позволят усі из катеґорій. Катеґорії ся кывавут як зимньых, так и літньых бавищ.^[10]

Фізичні нарушеня ся творят вусьмома типами інвалідности:

• Нарушеня мускулної силы: еся катеґорія має у собі такі нарушеня, з котрыма сила, чинена мускулами, наприклад єдної из кунцьовок, кунцьовок єдного бока вадь єдної половины тіла, є май мала — ото и травмы хребта, и розщілина хребта, и пост-поліоміелітный синдром, и другі трафункы.
• Нарушеня пасивної досяжности: – досяжность єдного ци булше суглобув систематично уменшена. Острі ставы ги артрит не рахувут ся у йсю катеґорію.
• Страта кунцьовок авадь їх дефіцит: повна вадь часточна страта кости вадь суглобув позад хвороты, травмы вадь уроженого нарушеня, напр. дисмелії.
• Розлука у довготі нуг: єдна из нуг має атрофовані кості позад нарушень розвоя вадь травмы.
• Низка статура: руст у стоячуй позиції є май малый позад куртых нуг, рук, торса, што є резултатом мускулоскелеталного дефіцита кости вадь хрящув; сюды входят наприклад ахондроплазія, дефіцит гормонув росту, недокунчена остеоґенеза.
• Гіпертонія: надлишкова напруга мускул тай уменшена можность розтяговати мускулы. Гіпертонія годна быти резултатом травмы, хвороты вадь уймы централнуй нервовуй системі (напр. церебралного параліча).
• Атаксія: – нарушеня мускулної координації, наприклад церебралный параліч, атаксія Фрідріха, розсіяный склероз.
• Атетоз: – некоординовані, несвідомі кываня тай невозмога держати симетричну поставу, ги при церебралному паралічи, хореоатетозови.

Нарушеня нику ся творят як трафунками часточної страты нику, котрі парувут пуд юридичну дефініцію сліпоты, так и повної страты.^[11] Зрячі поводырі про участникув из нарушенями нику рахувут ся натулко важнов частьов змагань, ож ся рахувут членами команды тай претендувут на окремі медайлы.^[12][13]

Інтелектуалні інвалідності ся творят нарушенями інтелектуалного характера тай искапчаныма з нима ограниченями у плані адаптивного справованя. Межинародный паралімпійськый комітет головно нараблят из фізичныма інвалідностями, айбо ґрупа інтелектуалных інвалідности ся додавала у поєдны Паралімпійські бавища. Рахувут ся лиш атлеты з інтелектуалныма нарушенями, діаґностованыма перед досягнутьом 18 рокув.^[14] Айбо в узнаных Межинародным Олімпійськым комітетом Спеціалных Олімпійськых бавищах годні участвовати усі люде из інтелектуалныма інвалідностями.^[15]

Виды спорта

У літньому проґрамови бавищ є 26 дисциплін; у зимньому проґрамови є їх 6. Поєдны дисципліны мавут у собі нараз дакулко видув спорта: наприклад, у горному лыжованьови сут и горні спускы, и слалом из ґіґантськым тай суперґіґантськым („super-G“) слаломом.

На націоналнуй ровни атлетув убиравут націоналні Паралімпійські комітеты.^[16]

Махльованя тай інциденты з допінґом

По Сіднійськуй Паралімпіаді 2000 быв шкандаль из іспанськов командов из баскетбола з інтелектуалныма нарушенями, котра забрала „золото“. Єден из членув команды обвинив поєдных другых членув команды, ож они не мали інтелектуалных нарушень, тай заявив, ож лиш два атлеты з 26 чоловік у тімови удповідали критеріям атлетув из інтелектуалныма інвалідностями.^[17] Товды Межинародный паралімпійськый комітет постановив, обы іспанськый націоналный Паралімпійськый комітет розслідовав сесь інцидент.^[18] У резултаті были розкрыті атлеты, котрі направду вбыйшли правила удбираня участникув из інтелектуалныма нарушенями, а Фернандо Мартін Вісенте, президент федерації, котра слідила за честностьов змагань атлетув из інтелектуалныма інвалідностями, признав, ож атлеты из усього світа нарушали тоты правила. Межинародный паралімпійськый комітет зато зачав своє розслідованя,^[19] бігом котрого ся указало, ож такі нарушеня правил посправді трафляли ся не лиш у іспанськых тімах и даже не лиш у баскетболнуй дисципліні про атлетув из інтелектуалныма нарушенями.^[20] Товды усі такі змаганя были сперті^[21] онь до скасованя заказа по бавищах 2008, кой были прияті май строгі правила тай критерії за убераня атлетув из інтелектуалныма інвалідностями.^[22][23]

Не вбыйшли Паралімпійські бавища ай проблемы из хоснованьом стероїдув. На бавищах 2008 у Пекінови три паверліфтеры тай німецькый баскетболіста были дискваліфіковані за позитивні тесты на заказані субстанції,^[24] айбо йсе была позитивна динаміка у порувнаньови з бавищами 2000, на котрых дискваліфіковали десять паверліфтерув тай єдного бігуна.^[25] Німецькый лыжарь Томас Ылзнер став першым зимньым паралімпійцьом, котрого имили на хоснованьови стероїдув. У 2002. рокови ун уйграв на зимнюй Паралімпіаді дві золоті медайлы, котрі уд нього забрали позад позитивного теста на заказані субстанції.^[26]

Щи єднов проблемов про орґанізаторув Паралімпіад є техніка, котра ся называт „бустінґ“; атлеты годні штучно пуднимати свуй крывляный тиск, часто через самотравмованя — така техніка позволят указовати до 15% ліпшый резултат, тай майчитаво помагат у видах спорта, де є важна утривалость, ги наприклад у лыжованьови по пересічнуй містности. Фунґує вто так, ож участникы нароком пошкожувут кунцьовкы долув уд міста, ураженого хребтовов травмов — ламлют кості, посилно затягувут екіпірованя вадь хоснувут дуже тугі компресійні штрімфлі. Они не чуствувут уд того буль, айбо тото вливат на їхньый артеріалный тиск.^[27]

Межинародный Паралімпійськый комітет быв найшов доказы хоснованя допінґа російськыма атлетами на Зимню Паралімпіаді 2014 у Сочі.^[28] 7. авґуста 2016 комітет єдноголосно заказав участь усього російського тіма на Літньых бавищах 2016 за недоброє тестованя спортсменув на допінґ.^[29]

Міста проведеня

Рук	Літні Паралімпійські бавища[30]			Зимні Паралімпійські бавища[31]
	№	Варош(і)	Держава-побідитель	№	Варош(і)	Держава-побідитель
1960	1	Рим	Італія[32]
1964	2	Токіо	Споєні Штаты[33]
1968	3	Тель Авів	Споєні Штаты[34]
1972	4	Гайделберґ	Западна Німещина[35]
1976	5	Торонто	Споєні Штаты[36]	1	Ырншылдсвік, Швеція	Западна Німещина[37]
1980	6	Арнгем	Споєні Штаты[38]	2	Єйлу, Норвеґія	Норвеґія[39]
1984	7	Ню Йорк Сток-Мендевіл	Споєні Штаты[40]	3	Іннсбрук	Австрія[41]
1988	8	Сеул	Споєні Штаты[42]	4	Іннсбрук	Норвеґія[43]
1992	9	Барселона & Мадрід[44]	Споєні Штаты[45]	5	Тінь, Франція Албервіль, Франція	Споєні Штаты[46]
1994				6	Ліллегаммер, Норвеґія	Норвеґія[47]
1996	10	Атланта	Споєні Штаты[48]
1998				7	Наґано, Японія	Норвеґія[49]
2000	11	Сідні	Австралія[50]
2002				8	Солт Лейк Сіті, США	Німещина[51]
2004	12	Атены	Китай[52]
2006				9	Торіно, Італія	Російська Федерація[53]
2008	13	Пекін	Китай[54]
2010				10	Ванкувер-Вістлер, Канада	Німещина[55]
2012	14	Лондон	Китай[56]
2014				11	Сочі, РФ	Російська Федерація[57]
2016	15	Ріо де Жанейро	Китай[58]
2018				12	ПхынЧхан, Южна Корея	Споєні Штаты[59]
2020	16	Токіо*	Китай[60]
2022				13	Пекін	Китай[61]
2024	17	Париж	Китай
2026				14	Мілан-Кортіна, Італія
2028	18	Лос Анджелес
2030				15	Ніцца-Французські Алпы
2032	19	Брісбен, Австралія
2034				16	Солт Лейк Сіті, США

* Удкладені на 2021. рук позад пандемії CoVID-19. Сесе быв першый раз, ож Паралімпіаду перенесли. Называвут ся Літні Паралімпійські бавища 2020, хоть и были проведені через рук,^[62] уд 24. авґуста по 5. септембра 2021.^[63]