Книга Псалмув

Кни́га Псалму́в (ищи Псалты́рь, Псавты́ря, Псалты́ря ци Савты́ря; уд ст.-ґр. Ψαλμός, Psalmós, гебр. תְּהִלִּים Tehill‎īm, досл. „Хвалы“) є перша книга третьої части Танаха (гебрейської Біблії) „Кетувім“ (гебр. כְּתוּבִים‎ Kǝṯuḇim) и єдна из книг Старого Завіта.^[1]

Свиток из псалмами

Текст псалома 1:1–2 івритом

Тото статя за Книгу псалмув. Не поплетьте з Псавтыря (ритуал).

Книга є антолоґійов гебрейськых реліґійных гімнув. У юдейськуй и западнохристиянськуй традиціях Псалтырь ся чинит 150 псалмами, а у восточнум обряді їх є мало булше.^[2][3] Книга псалмув поділена на пять секцій, кажджа з котрых ся кунчат доксолоґійов, гімнов хвалы. Межи филями псалмув сут: гімны вадь пісні хвалы, комуналні тай індивідуалні оплакованя, царські псалмы, псалмы проклятя, комуналні тай індивідуалні подякы, мудрості, паломництва тай другі.

Авторство псалмув ся приписує царю Давыду и другым біблійным особам, наприклад Асафу, сынам Коры, Мойсею и Соломону. Давыдовоє авторство ся не принимат як історичный факт сучасныма зглядователями; держит ся, ож часть псалмув была написана перед угнаньом ізраїлського народа у пустыню, а часть по тому, хоть датованя псалмув вцілови є доста тяжкым.^[3] Свиткы Мертвого моря указувут на вто, ож шор и обсяг псалмув 90–150 не были зафіксовані у середині 1. стороча н. е. Изглядателі Септуаґінты (майстарого дожывшого доднесь старогрецького товмачіня), у тому числі Юджин Улріх, писали, ож гебрейськый Псалтырь не быв завершеный до 1. стороча н. е.^[4][5]

Структура

Поділ

Царь Давыд складат псалмы, Парижськый Псалтырь, 10. стороча^[6]

Книга псалмув поділена на пять секцій, кажджа з котрых ся кунчат доксолоґійов. Такый поділ, годно быти, учинили при фіналнуй редактурі, обы зімітовати поділ Торы:^[7]

• Книга 1 (псалмы 1–41)
• Книга 2 (псалмы 42–72)
• Книга 3 (псалмы 73–89)
• Книга 4 (псалмы 90–106)
• Книга 5 (псалмы 107–150)

Пописы

116 из 150 псалмув мавут окремі пописы; подакотрі ся чинят єдным словом, а другі — довгым коментарьом. Третина из них подабавут на музичні інструкції, наприклад „из струнныма інструментами“. Другі ся удкликавут на филі музичных композицій, наприклад „Псалм“ и „Піснь“ авадь коментувут оказію, котруй псалм є присяченый („Присяченый храму“, „На спомин“ и т. д.). Многі из них сут пудписані именами людий; майбулше (73 псалмы) пудписані „Давыдовыма), и тридцять из них напряму скапчані обсягом из трафунками з жывота царя Давыда.^[8] Межи именами щи сут: Асаф (12), сыны Коры (11), Соломон (2), Мойсей (1) тай Етан Езрахіт (1). Септуаґінта, Пешітта (Сирійська Вулґата) и Латинська Вулґата приписувут дакулко псалмув (напр. 111 и 145) Аґею и Захарії. Окрем того, Септуаґінта щи приписує дакулко псалмув (напр. 112 и 135) Езекіелю и Єремії.

Нумерація

Гебрейська (Масоретськый текст)	Грецька (Септуаґінта)
1–8	1–8
9–10	9
11–113	10–112
114–115	113
116	114–115
117–146	116–145
147	146–147
148–150	148–150

Псалмы обычно ся реферувут подля їхнього порядкового числа, айбо нумерація ся розличат у гебрейськум (Масоретськый текст) и грецькум (Септуаґінта) рукописах. Розлука головно у єдному числови. Протестантські товмачіня хоснувут гебрейську нумерацію; што ся кыват другых християнськых традицій:

• Офіціалні католицькі літурґійні тексты, наприклад Римськый місал, хоснувут грецьку нумерацію.^[9]
• Сучасні католицькі товмачіня часто хоснувут гебрейську нумерацію, айбо давут зазначками и грецькі еквіваленты.
• Восточні православні и грекокатолицькі товмачіня хоснувут грецьку нумерацію, айбо давут зазначками гебрейські еквіваленты.

Другі псалмы

Септуаґінта обсягує псалом 151; гебрейська його верзія была найдена у свиткови псалмув у Свитках Мертвого моря. Поєдны верзії Пешітты (Біблії, котру хоснувут головно сирійські церьквы) мавут псалмы 152–155. Ищи сут Соломонові псалмы — 18 псалмув жидувського походжіня, котрі ориґінално майскорі были написані івритом, айбо дуйшли до сучасности лиш у виді грецького и сирійського товмачінь.

Русинські традиції

У русинськуй традиції Псавтыря скапчана из єдноименным ритуалом, бігом котрого ся молят и читат ся Книга псалмув.

Ник. щи

• Псавтыря (ритуал)
• Біблія

Жерела

• Berlin, Adele; Brettler, Marc Zvi (2004). Psalms. in Berlin, Adele; Brettler, Marc Zvi; Fishbane, Michael A.. The Jewish Study Bible. Oxford University Press. ISBN 978-0-19-529751-5. https://books.google.com/books?id=aDuy3p5QvEYC.
• Bullock, C. Hassell (2004). Encountering the Book of Psalms: A Literary and Theological Introduction. Baker Academic. ISBN 978-0-8010-2795-6. https://books.google.com/books?id=d8DMr2bTQsMC.
• Hayes, John H. (1998). The Songs of Israel. in McKenzie, Steven L.; Graham, Matt Patrick. The Hebrew Bible Today: An Introduction to Critical Issues. Westminster John Knox Press. ISBN 978-0-664-25652-4. https://books.google.com/books?id=owwhpmIVgSAC&pg=PA153.
• Kselman, John S. (2007). Psalms. in Coogan, Michael David; Brettler, Marc Zvi; Newsom, Carol Ann. The New Oxford Annotated Bible with the Apocryphal/Deuterocanonical Books. Oxford University Press. ISBN 978-0-19-528880-3. https://books.google.com/books?id=Nc-i_pQsiW8C&pg=PA775.
• Mazor, Lea (2011). Book of Psalms. in Berlin, Adele; Grossman, Maxine. The Oxford Dictionary of the Jewish Religion. Oxford University Press. ISBN 978-0-19-973004-9. https://books.google.com/books?id=hKAaJXvUaUoC&pg=PA589.