Шкоты

Шкоты — корѣнный народ Шкоции, котрый ся исторично сформовав з двох келтскых племен: Пиктох и Гелох.

Шкоты

Горѣ:Джеймс Ватт, Валтер Скотт, Александер Греам Белл Долов:Виллиам Воллес, Мери, кралиця Шкотох, Шон Коннери
Популация
28–40 млн.[1]
Регионы зо значнов популациов
Шкоция 4 446 000[2] (2011, з особами шкотского походжѣня)
США 5 457 798 [3] (шкотске походжѣня)   3 056 848 [3] (шкотско-ирске походжѣня) Канада 4 799 005 [4] (2016) Австралия 2 023 474 [5] (2016) Новый Зеланд 1–2 млн. [6][7] шкотского походжѣня (шацованя) Англия 795 000 [8]
Языкы
англицкый, шкотскый, шкотскый гелскый
Религия
атеисты 52%, презбитариане 20%, римокатолици 15%[9]
Зазначкы
Поданы лем штаты з популациов Шкотох над 20 тысяч особ

Краль Едвард VII. (1841–1901–1910) в твидовом аргайловом кабатѣ и лайбику, килтѣ, споранѣ и гленгарию

Молодиця з клану MacNeacail

История

В V. – VI. сторочах там з Ирландии пришли Шкоты, завоевали край и передали му свою племенну назву. В IX. сторочу ся склало споене кральовство, называне Алба, а од XI. стороча познате як Кральовство шкотох лат. Regnum Scottorum або Шкоция лат. Scotia, што поклало основу формованя народной самосвѣдомости.^[10]

Етноним

В сучасном хоснованю етноним «Шкоты» односять ку каждому, чие языкове, културне, родинне, або генетичне походжѣня звязане зоз Шкоциов. Латинске слово Scoti, зачаточно означавше Гелох, теперь означать вшиткых обывательох Шкоции. В англоязычном свѣтѣ поуживать ся термин Scottish people, Scots и Scotsmen. Термин Scotch ся поважуе в Шкоции за уразливый. Обывателе шкотской верховины доднесь захранили субетничну назву Гелох.

Характер и традиции

Шкоты суть трудолюбивы,^{[неенциклопедичный штиль]} практичны^{[неенциклопедичный штиль]} и горды своима традициями и оригиналнов културов. Хоть дефинитивна векшина теперь говорить по англицкы, гелскый (Scottish Gaelic) и шкотскый (Scots) язык ещи все мають широкый вплыв и хоснованя.^[11] Подля социалного анкетованя з року 2016, опубликованого агенциов ScotCen Social Research, 52% Шкотох — атеисты, 20% належать ку Церкви Шкоции (презбитариане), 15% — римокатолици, 11% — ся голосять ку иншым христианскым Церквам, 2% — суть нехристианской вѣры.^[9]

Кланы

Шкотске сполоченство подѣлене на кланы. Слово clann келтского походжѣня означало родову сполочность, належность ку едному роду, а наслѣдно и ку едной територии. В реалности члены клана суть не лем особы, звязаны через родинство, але и наяты слугы, привандровалы и натурализованы особы. Основным знаком клана е тартан — коцкасте вовняне полотно шпецифичного рисунка и фарб, з котрого ся шие шатя. Клан може мати веце як еден тартан. Окрем того кланы мають гербы и символы. Екзистуе Высшый гералдичный суд, Court of the Lord Lyon, котрый региструе и легитимизуе такы гербы. По року 1707, коли ся створила уния Шкоции и Англии, кланы были зрушены,^[10] але по успокоѣню ситуации обновили ся. В сучасности кланы суть лем романтичнов традициов, але на Збор кланох 2009 в Единбургу пришло над 47 тысяч участникох.^[12]

Народна ноша

Шпецифичне шкотске народне облечѣня найвеце ся захранило на верховинѣ и на островах Шкоции, де жиють переважно Гелы. Типова хлопска ноша складать ся з килта (сукнѣ), а верхню часть тѣла закрывав векшый або меншый плед (шал), вшитко з тартану свого клану. Ку килту, што не мав жебох, носив ся намѣсто того споран (кожана або кожушинова тобовка), а на голову — гленгарий, бонет з пантликами и знаками клану. Тота ноша была по якобитском повстаню (1745) заказана, але в XIX. сторочу ся обновила. Долинянскы Шкоты намѣсто килта носили надрагы, котры могли быти тартановы. Женска ноша у Гелох обсягуе довгу сукню и плед в поясом, або меншый тартановый шал. Одданы жены на головѣ носять чепець.^[10]

Жерела и одказы

• Brown, Alice; Macleod, Iseabail C.; Moulton, Matthew James and Cameron, Ewen A. (12 May. 2021). Scotland. Encyclopedia Britannica. https://www.britannica.com/place/Scotland. [перевірено 2021-08-17].англ.
• Гроздова И. И.: Шотландцы //Народы и религии мира: Энциклопедия / Гл. ред. В. А. Тишков, Редкол.: О. Ю. Артемова, С. А. Арутюнов, А. Н. Кожановский и др. — М.: Большая Российская энциклопедия, 1999. — 928 с: ил. ISBN 5-85270-155-6 Сс. 645–647 русс.