Валтер Скотт

From Wikipedia, the free encyclopedia

Валтер Скотт
Remove ads

Валтер Скотт, англ. Sir Walter Scott, *15. август 1771, Единбург – †21. септембер 1832, Ебботсфорд, Шкоция — шкотскый писатель, поет, прозаик в истории литературы поважованый за основателя жанра историчного роману.[1][2]

Коротка інформація Валтер Скотт, Уроджѣня ...
Thumb
Каштель Валтера Скотта в Ебботсфордѣ
Remove ads

Биография

Отець Скотта быв правник, а мати была дѣвка дохтора. Од малости Валтер любив слухати родинны спомины и повѣданя старых своякох о шкотской минувшинѣ, и необавкы став ся лачным читательом книг. Мав на чудо добру память и скоро ся в нему вывинули любовь и глубоке розумѣня историчного боя его шкотскых предкох. Абсолвовав середню школу в Единбургу, а тыж едно полуроча навщѣвовав гимназию в Келсо. Од року 1786 быв на правничой службѣ як практикант в канцеларни свого отця. Его далшы штудии и правнича практика были бессистемны, понеже оддавав ся тыж сполоченской чинности и вельо читав з италианскых, испанскых, французскых, нѣмецкых и латинскых книжок. В децембрѣ 1797 оженив ся з Шарлоттов Карпентер, што походила з французского роду, з котров щастливо прожив до ей смерти в року 1826. В року 1799 достав уряд правника при шерифѣ грофства Селкирк, в котром зоставав до конця живота, а од року 1806 — секретаря Найвысшого суда в Единбургу. Активно ся занимав литературнов чинностьов, котра спочатку концентровала ся на поезию и товмачѣня. Литературну славу собѣ зыскав тритомным выданьом Вандровна поезия шкотского погранича (Minstrelsy of the Scottish Border), 1802–1803, де устну поезию, котра была позната лем в розличных показеных вариантах «вернув» до рафинованой литературной формы. Од року 1814 Скотт зачинать писати историчны романы, котры мали великый успѣх у читателя и добрѣ ся продавали. Маючи великы заробкы, зачав розбудововати каштель и выступовав як щедрый пан, нерозважно подписовав векслы в рахунок своих будучых заробкох. В року 1825 настала банкова криза, и выдавательство братох Баллантайнох, де мав велику финанчну частку, скраховало. Свой вшиток маеток мусѣв дати у залог своим кредиторам и одтеперь писав каждорочно еден роман, жебы выплатив величезный довг (тогды 120 тыс. либер, або днесь 11 милионы). В року 1826 умерла му жена. В року 1831 здоровля му ся так показило, же мусѣв ся лишити писаня.[1]

Але его романы добрѣ ся продавали и неодовго по его смерти цѣлый довг быв выплаченый. Днесь в его каштелю розмѣщеный музей писателя.

Remove ads

Творба

Thumb
Рыцарскый роман, выданый в России
Поезия[1]

Творчость Скотта ся зачала поезиев и тота етапа ся протягла до року 1813. Зыскавши успѣх з поезиев, основанов на людовых мотивах шкотскых вандровных поетох, продовжив ити тов дорогов в далшых росповѣдных баладах. Про тоты баладичны поемы суть характерны ясна и динамична росповѣдь, поуживаня шкотскых регионализмох, щирый патос, роскошны образы природы, што зостають вкарбованы в память.

  • Вандровна поезия шкотского погранича (Minstrelsy of the Scottish Border, 3 vol., 1802–1803).
  • Спѣв послѣдного барда (The Lay of the Last Minstrel, 1805).
  • Мармион (Marmion, 1808).
  • Владарька озера (The Lady of the Lake, 1810)
Проза[2]

Скотт написав 28 романы, 19 з них посвячены Шкоции. Серед «шкотскых» романох:

  • Веверли (Waverley, or Tis Sixty Years Since, 1814),
  • Гай Маннеринґ (Guy Mannering, or The Astrologer, 1815),
  • Антикварий (The Antiquary, 1816),
  • Пуритане (Old Mortality, 1816),
  • Роб Рой (Rob Roy, 1818),
  • Легенда Монтроуза (Тhе Legend of Montrose, 1819).

Англицка история описана в романах:

  • Айвенго (Ivanhoe, 1820),
  • Монастырь (The Monastery, 1820),
  • Абат (Thе Abbot, 1820),
  • Кенилворт (Kenilworth, 1821),
  • Вудсток (Woodstock; or The Cavalier, 1826).

Французска история описана в романѣ Квентин Дорвард (Quentin Dorward, 1823), а тыж историко-биографичной книзѣ Живот Наполеона Бонапарта (The Life of Napoleon Buonaparte, 1827).

Вызнам

Творчость Скотта зачала нову етапу в розвою роману. При высоком умѣлецком майстерствѣ, ровном найлѣпшым писателям свого часу, Скотт перевершив их глубинов своей историчной концепции, ай совершенѣйшым способом побудовы романа и роскрытя характерох постав. Романтизм у Скотта иде въедно з ясно выраженыма реалистичныма компонентами; автор описуе вызнамны историчны подѣи, указуе роль социалных конфликтох в истории людства, народны рухы, повнокровны народны характеры, акцентуе зависимость долѣ окремого чоловѣка од хода историчных процесох. Скотт рисуе особености каждоденного живота люди, их обычаи, натуру, колорит держав и епох, его романы повны етнографичныма реалиями, майстерно змальованы баталны сцены, детално описаны портреты постав, обстояня их живота и дѣятельства. Скотт ся держав конзервативных поглядох, быв сторонником влады ториовцьох и конштитучной монархии, вызнавав право люду на бой против гноблѣня, але мав страх з револуций, передвзято ся становив ку идеи влады люду.[2]

Remove ads

Интересны факты

  • Векшину своих знань Валтер Скотт достав не во школах, а путьом читаня книг и вдякы своей феноменалной памяти;
  • По первом успѣшном историчном романѣ Веверли, 1814, выданом анонимно, далшы тринадцять рокы выдавав романы под псевдом «автор Веверли»; аж в року 1827 (финансово збанкротовавши) Скотт отворив тайну и послѣдны три рокы не прятав авторство;
  • Популарна днесь назва професии freelancer = працовник слободной професии походить з романа Айвенго, 1820, де free lancer-ы были наяты рыцарѣ, ланчарѣ; а слово lance =ланча достало ся аж и до украинского словника Гринченка.[3]

Жерела и одказы

  • "Sir Walter Scott". Encyclopedia Britannica. 11 Aug. 2021. https://www.britannica.com/biography/Walter-Scott. [перевірено 13 August 2021].англ.
  • Михальська Н., Щавурський Б. (ред): Скотт Вальтер //Зарубіжні письменники. Енциклопедичний довідник у 2 т. — Тернопіль : Навчальна книга — Богдан, 2006. — Т. 2 : Л–Я — С. 531 — ISBN 966-692-744-6 укр.

Референции

Loading related searches...

Wikiwand - on

Seamless Wikipedia browsing. On steroids.

Remove ads
Remove ads