Condaghes (domo editora)

Sa Condaghes est una domo editora sarda, cun sede in Casteddu.

Custu artìculu est iscritu cun sa grafia Limba Sarda Comuna. Abbàida sas àteras bariedades gràficas:

campidanesu · logudoresu · nugoresu

Istòria

Fundada in su 1992 dae Frantziscu Cheratzu, at publicadu chentinas de libros chi valorizant sa limba, s'istòria e sa cultura de sa Sardigna. In paris a totu custu, at fintzas publicadu òperas medas in formadu digitale: produtos didàticos multimediales, materiale web, libros eletrònicos, àudiu e vìdeu.^[1]

In su 1994 Giuanne Manca est divènnidu su de duos sòtzios de s'azienda, e dae 1996 Frantziscu Cheratzu nd'est divènnidu s'amministradore ùnicu.

In su 1999, a pustis de sas leges regionales e natzionales a suportu de sa limba sarda, sa Condaghes at creadu sa collana "Paberiles" chi, pro medas annos, at publicadu deghinas e deghinas de romanzos noos in limba sarda, e fintzas tradutziones e rieditziones, chi ant permìtitu de fàghere connòschere a unu pùblicu semper prus mannu sa literadura in limba sarda.^[2][3]

Sa Condaghes at fintzas produidu, in paris a sa Émigré Entertainment Inc. e cun su contributu de sa Fondazione Sardegna Film Commission, unu teaser pro unu film ispiradu a una de sas sèries de libros publicada dae issa, Iskìda della Terra di Nurak de Andrea Atzori, dirìgidu dae su prèmiu Oscar Anthony LaMolinara e cun sa partetzipatzione, che a atora, de Caterina Murino.^{[4][5][6][7][8]}