Miladin Popoviq

Miladin Popoviç (serb. Миладин Поповић Miladin Popović, Lopate, 23 maj 1910 - Prishtinë, 13 mars 1945) ka qenë partizan jugosllav, sekretar politik i komitetit Krahinor të Partisë Komuniste Jugosllave për Kosovën dhe organizator i Partisë Komuniste të Shqipërisë. Popoviq përfshihet në listën e përpiluar nga Instituti i Studimit të Krimeve dhe Pasojave të Komunizmit, që përmbledh pjesëmarrësit që kanë përgjegjësi direkte për krimet e Partisë Komuniste Shqiptare dhe të Ushtrisë Nacionalçlirimtare, duke qene, sipas ligjit nr. 41, anëtarë të strukturave politike dhe ushtarake “që kanë inspiruar, organizuar, urdhëruar, ekzekutuar ose ndihmuar forcat partizane në vepra kriminale”.^[1]

Popoviq me Enver Hoxhën

Jeta

Lindi në fshatin Lopate, pranë Ljeva Rijeke në Mal të Zi^[2], i biri i Jevremit dhe i Stanas^[3]. Kur ishte fëmijë, familja e tij u shpërngul në Pejë, ndoqi gjimnazin në Pejë, Prizren e Prishtinë.

Që më 1933 kur ishte student në Fakultetin e Drejtësisë në Beograd, përfshihet në veprimtari politike. Anëtar i Rinisë Politike Jugosllave që më 1933, dhe i Partisë Komuniste Jugosllave që më 1934^[2].

Pas pushtimit të Mbretërisë Jugosllave, më 8 korrik 1941 u arrestuan në Rozhajë teksa po udhëtonin nga Kosova për në Mal të Zi vetë Miladini, i vëllai Mihajlo Popoviq dhe bashkëpunëtori i tyre Kristo Filipoviq. Tre të arrestuarit u mbajtën të internuar në Peqin^[3].

Krimet në Shqipëri

Për shërbimin sekret anglez Popoviq ishte i paidentifikueshëm, qarkullonte me nofkën Ali Peja. Pasi Mestan Ujaniku e bën zbulimin e identitetit të tij, Margaret Hasluck i shkruan qendrës se është për shkak të Ali Dushanoviqit ose Ali Pejës që u nxit lufta vëllavrasëse e konflikti civil.^[4] Për ushtarakët britanikë që ishin lidhur me forcat partizane shqiptare njihej edhe si Ali Gostivari^[5].