கனிமம் (ஊட்டச்சத்து)

ஊட்டச்சத்து சார்ந்த சூழலில், கனிமம் (mineral) என்பது ஒரு தனிமம் ஆகும். சில "கனிமங்கள்" உயிர் வாழ்வதற்கு இன்றியமையாதவை ஆகும், ஆனால் பெரும்பாலானவை அவ்வாறல்ல.^[1][2] அத்தியாவசிய ஊட்டச்சத்துக்களின் நான்கு குழுக்களில் கனிமங்களும் ஒன்றாகும். மற்றவை உயிர்ச்சத்துகள், அத்தியாவசிய கொழுப்பு அமிலங்கள், அத்தியாவசிய அமினோ அமிலங்கள் ஆகியனவாகும்.^[3]

துத்தநாகம் தேவைப்படும் ஒரு நொதியமான கார்போனிக் நீர்நீக்கவூக்கி (இந்தப் படத்தின் நடுவில் மையத்திற்கு அருகில் சாம்பல் கோளம்), கார்பனீராக்சைடை வெளியேற்றுவதற்கு அவசியமானதாகும்.

மனித உடலில் உள்ள ஐந்து முக்கிய கனிமங்கள் கல்சியம், பாசுபரசு, பொட்டாசியம், சோடியம், மக்னீசியம் ஆகியனவாகும்.^[1] மீதமுள்ள தனிமங்கள் இம்மியத் தனிமங்கள் என்று அழைக்கப்படுகின்றன. பொதுவாக ஏற்றுக்கொள்ளப்பட்ட இம்மியத் தனிமங்கள் இரும்பு, குளோரின், கோபால்ட்டு, செம்பு, துத்தநாகம், மாங்கனீசு, மாலிப்டினம், அயோடின், செலீனியம் ஆகியனவாகும்.^[4] மனித உடலில் எடை அடிப்படையில் 96% கரிமம், ஐதரசன், ஆக்சிசன், நைட்ரசன் ஆகிய நான்கு தனிமங்கள் (CHON) உள்ளன. இத் தனிமங்கள் பொதுவாக ஊட்டச்சத்துக் கனிமங்களின் பட்டியலில் சேர்க்கப்படுவதில்லை.

தாவரங்கள் பொதுவாக மண்ணில் இருந்து கனிம ஊட்டச்சத்தைப் பெறுகின்றன.^[5] இந்தத் தாவரங்கள் தாவர உண்ணி விலங்குகளால் உட்கொள்ளப்படுகின்ற போது இந்த ஊட்டச்சத்தானது உணவுச் சங்கிலி ஊடாக அந்த விலங்குகளை சென்றடைகின்றது. ஊனுண்ணிகள் இந்த விலங்குகளை உட்கொள்வதிலிருந்து இந்தத் தாதுக்களைப் பெறுகின்றன.