சாத்தியம் (யோகம்)

இந்திய சோதிடத்தில் சாத்தியம் என்பது, பஞ்சாங்க உறுப்புக்களுள் ஒன்றான "யோகம்" என்பதனுள் அடங்கும் 27 யோகங்களுள் இருபத்திரண்டாவது ஆகும். இராசிச் சக்கரத்தின் தொடக்கப் புள்ளியில் இருந்து 280° 00' தொடக்கம் 293° 20' வரை "சாத்தியம்" யோகத்துக்கு உரியது. சூரியன், சந்திரன் ஆகிய கோள்களின் இருப்பிடங்களின் கூட்டுத்தொகை இந்தக் கோணத்தினூடாக அதிகரிப்பதற்கு எடுக்கும் நேரத்துக்குரிய யோகம் "சாத்தியம்" ஆகும். இந்த நேரத்தில் பிறக்கும் ஒருவர் "சாத்தியம்" யோகத்தைத் தனது பிறந்த யோகமாகக் கொண்டிருப்பார்.

சமசுக்கிருத மொழியில் சாத்ய (Sādhya) என்பது நிறைவேற்றக்கூடியது என்னும் பொருள் அமைந்தது. மங்கலமானது எனச் சோதிட நூல்கள் குறிப்பிடும் யோகங்களுள் இதுவும் ஒன்று. இதன் ஆட்சிக் கோள் வெள்ளி. ஆட்சித் தேவதை சாவித்திரி.^[1]