இரண்டாம் வேற்றுமை

இரண்டாம் வேற்றுமை என்பது பெயரின் எழுவாய்ப் பொருளைச் செயப்படுபொருளாக வேறுபடுத்தும் வேற்றுமை ஆகும். இது செயப்படுப்பொருள் வேற்றுமை என்றும் வழங்கப்படும். இரண்டாம் வேற்றுமையின் உருபு 'ஐ' ஆகும்.

இரண்டாம் வேற்றுமை உணர்த்தும் பொருள்கள்

“

"இரண்டா லதனுரு பையே அதன்பொருள் ஆக்க லழித்த லடைதல் நீத்தல் ஒத்தலுடைமை யாதி யாகும்."[1]

”

இரண்டாம் வேற்றுமை உருபான 'ஐ' என்ற உருபை ஏற்றதும் (எழுவாய்) பெயர்ச்சொல்லானது கீழ்க்கண்ட பொருள்களை உணர்த்தும்.

1. ஆக்கப்படுபொருள் ( ஒன்றை உருவாக்குதல்)
2. அழிக்கப்படு பொருள் ( ஒன்றை இல்லாமல் செய்தல்)
3. அடையப்படு பொருள் ( ஒன்றை அடைதல்)
4. நீக்கப்படு பொருள் (ஒன்றை விட்டு நீங்(க்)குதல்)
5. ஒத்தல் பொருள். (ஒன்றை மற்றொன்றுடன் ஒப்புமைப் படுத்தல்)
6. உடைமைப் பொருள்.( உடைமை பெற்றிருத்தல்)

ஆகியனவும் பிறவுமாகும்.

சான்று:

• குடத்தை வனைந்தான் - ஆக்கப்படுபொருள்.
• கோட்டையை இடித்தான் - அழிக்கப்படு பொருள்.
• ஊரை அடைந்தான் - அடையப்படு பொருள்
• வீட்டை விட்டான் - நீக்கப்படு பொருள்
• புலியைப் போன்றான் - ஒத்தல் பொருள்
• பொன்னை உடையான் - உடைமைப் பொருள்.