చంద్రమోహన్

చంద్రమోహన్ (1942 మే 23 - 2023 నవంబరు 11) గా ప్రసిద్ధులైన మల్లంపల్లి చంద్రశేఖర రావు తెలుగు సినిమా రంగంలో ఎన్నో విలక్షణమైన పాత్రలు పోషించిన నటుడు. కథానాయకుడిగా 175 పైగా, మొత్తం 932 సినిమాల్లో నటించారు.^[2] 1966లో రంగులరాట్నం చిత్రంతో ఇతని సినీ ప్రస్థానం ఆరంభమైంది. అప్పటి నుండి సహనాయకుడిగా, కథనాయకుడుగా, హాస్యనటునిగా, క్యారెక్టర్ యాక్టర్‌గా ఎన్నో వైవిధ్యమైన పాత్రలు పోషించారు. ప్రధానంగా కామెడీ పాత్రల ద్వారా చంద్రమోహన్ ప్రేక్షకులకు చిరకాలం గుర్తుంటారు

చంద్రమోహన్
జననం	మల్లంపల్లి చంద్రశేఖర రావు [1] 1942 మే 23 పమిడిముక్కల, కృష్ణా జిల్లా, భారతదేశం
మరణం	2023 నవంబరు 11(2023-11-11) (వయసు: 81) హైదరాబాదు
విద్య	బి. ఎస్. సి, బాపట్ల వ్యవసాయ కళాశాల
వృత్తి	నటుడు
జీవిత భాగస్వామి	జలంధర
పిల్లలు	ఇద్దరు కుమార్తెలు, మధుర మీనాక్షి (సైకాలజిస్టు) మాధవి (వైద్యురాలు)
తల్లిదండ్రులు	మల్లంపల్లి వీరభద్ర శాస్త్రి (తండ్రి) శాంభవి (తల్లి)
బంధువులు	శివలెంక కృష్ణప్రసాద్ (మేనల్లుడు)
పురస్కారాలు	నంది అవార్డు

క్రొత్త హీరోయన్‌లకు లక్కీ హీరోగా చంద్రమోహన్‌ను పేర్కొంటారు. సిరిసిరిమువ్వలో జయప్రద, పదహారేళ్ళ వయసులో శ్రీదేవి తమ నటజీవితం ప్రాంభంలో చంద్రమోహన్‌తో నటించి తరువాత తారాపథంలో ఉన్నత స్థాయికి చేరుకున్నారు.చంద్రమోహన్ చివరి సినిమా 2017లో వచ్చిన ఆక్సిజన్ (సినిమా)లో నటించాడు.

జీవిత సంగ్రహం

చంద్రమోహన్ కృష్ణా జిల్లాకు చెందిన పమిడిముక్కల గ్రామంలో 1942, మే 23న మల్లంపల్లి వీరభద్రశాస్త్రి, శాంభవి దంపతులకు జన్మించారు.^[3] ఇతని అసలు పేరు మల్లంపల్లి చంద్రశేఖర్ రావు. ఈయన వ్యవసాయ కళాశాల, బాపట్లలో బి.యస్.సి. పూర్తిచేసి, కొంతకాలం ఏలూరులో పనిచేశాడు. సినిమాలలో నటించాలనే ఉత్సాహంతో మద్రాసు చేరి ప్రయత్నించారు. హీరోగా రంగులరాట్నం (1966) చిత్రంతో మొదలుపెట్టి, హాస్య నటుడిగా మారి తర్వాత కాలంలో కారెక్టర్ నటుడిగా చిత్రసీమలో స్థిరపడ్డారు.

చంద్రమోహన్ నటించిన కొన్ని చిత్రాలు సుఖదుఃఖాలు, పదహారేళ్ళ వయసు, సిరిసిరిమువ్వ, సీతామాలక్ష్మి మొదలైనవి హిట్ కొట్టాయి. ఆ కాలంలో వీరితో ఎందరో కథానాయికగా నటించి అగ్రస్థానాన్ని చేరుకున్నారు. శ్రీదేవి, మంజుల, రాధిక, జయప్రద, జయసుధ, ప్రభ, విజయశాంతి, తాళ్ళూరి రామేశ్వరి మొదలైన వారు ఈ కోవకు చెందినవారు.

ఈయన భార్య జలంధర, రచయిత్రి. కొన్ని కథా సంకలనాలను వెలువరించింది.

పురస్కారములు

• 1978 - పదహారేళ్ల వయసు సినిమా కోసం ఉత్తమ నటుడిగా ఫిల్మ్‌ఫేర్ పురస్కారం పొందారు.
• 2005 - అతనొక్కడే సినిమా కోసం ఉత్తమ కారెక్టర్ నటుడిగా నంది పురస్కారం పొందారు.
• 2021 - తెలుగు బుక్ ఆఫ్ రికార్డ్స్ వారి గుర్తింపు - మొట్టమొదటి సరిగా 14 దేశాల నుండి రచయుతలు 108 చంద్ర మోహన్ గారు నటించిన చిత్రా విశ్లేషణ.

నటించిన సినిమాలు

ప్రధాన వ్యాసం: చంద్రమోహన్ నటించిన సినిమాలు

• రంగులరాట్నం - 1966
• సుఖదుఃఖాలు - 1967
• బంగారు పిచ్చుక - 1968
• ఆత్మీయులు - 1969
• తల్లిదండ్రులు - 1970
• పెళ్లి కూతురు - 1970
• బొమ్మా బొరుసా - 1971
• రామాలయం - 1971
• కాలం మారింది - 1972
• మేమూ మనుషులమే -1973 - రాజు
• జీవన తరంగాలు - 1973
• అల్లూరి సీతారామరాజు - 1974 - గోవిందు
• ఓ సీత కథ - 1974
• దేవదాసు - 1974
• ఇల్లు - వాకిలి - 1975
• కురుక్షేత్రం - 1977
• ప్రాణం ఖరీదు - 1978
• సిరిసిరిమువ్వ - 1978
• సీతామాలక్ష్మి - 1978
• పదహారేళ్ళ వయసు - 1978
• ఒక చల్లని రాత్రి - 1979
• తాయారమ్మ బంగారయ్య - 1979
• దశ తిరిగింది - 1979
• శంకరాభరణం - 1979
• మామా అల్లుళ్ళ సవాల్ -1980
• శుభోదయం - 1980
• రాధా కళ్యాణం - 1981
• రుద్రకాళి (1983)
• పెళ్లి చేసి చూపిస్తాం-1983
• మనిషికో చరిత్ర - 1984
• ముగ్గురు మిత్రులు - 1985
• సువర్ణ సుందరి (1985)
• చందమామ రావే - 1987
• ఆస్తులు అంతస్తులు - 1988
• అల్లుడుగారు - 1990
• ఆదిత్య 369 - 1991
• 420 - 1992
• ఆమె - 1994
• నిన్నే పెళ్ళాడతా - 1996
• ఛలో అసెంబ్లీ (2000)
• పాపే నా ప్రాణం (2000)
• చెప్పాలని ఉంది (2001)
• డార్లింగ్ డార్లింగ్ (2001)
• శుభాశీస్సులు (2001)
• మన్మధుడు - 2002
• హోలీ - (2002)
• ఫూల్స్ - (2003)
• 7G బృందావన్ కాలనీ - 2004
• వర్షం - 2004
• నేనుసైతం (2004)
• అతనొక్కడే - 2005
• పౌర్ణమి - 2006
• దాసన్నా (2010)
• శంభో శివ శంభో (2010)
• పంచాక్షరి
• గల్లీ కుర్రోళ్ళు (2011)
• తూనీగ తూనీగ (2012)
• జీనియస్ (2012)
• బన్నీ అండ్ చెర్రీ (2013)
• ఒక్కడినే (2013)
• జేమ్స్ బాండ్ (2015)
• మోసగాళ్లకు మోసగాడు (2015)
• జెండాపై కపిరాజు (2015)^[4]
• 2 కంట్రీస్ (2017)
• కోతల రాయుడు (2022)

మరణం

చంద్రమోహన్ అనారోగ్యంతో బాధపడుతూ హైదరాబాద్‌ అపోలో ఆస్పత్రిలో చికిత్స పొందుతూ 2023 నవంబరు 11న దీపావళి పండుగకు ఒకరోజు ముందు మరణించారు.^[5][6][7][8]