సామాన్య శకం

"క్రీస్తు శకం"కు నవీన రూపమే సామాన్య శకం. ఇంగ్లీషులో దీన్ని కామన్ ఎరా (Common Era) అని లేదా కరెంట్ ఎరా (Current Era) అనీ అంటారు. లాటిన్ భాషలో యానో డొమిని (Anno Domini -AD) ని కామన్ ఎరా (Common Era -CE) గాను, "క్రీస్తు పూర్వం" (Before Christ -BC) ను బిఫోర్ కామన్ ఎరా (Before Common Era -BCE) గానూ వాడుతున్నారు. వీటిని తెలుగులో సామాన్య శకం (సా.శ..), సామాన్య శక పూర్వం (సా.పూ. లేదా సా.శ..పూ.) గా వ్యవహరిస్తున్నారు. ఈ మార్పుకు, మతతటస్థత ప్రధాన కారణం. ఈ మార్పు, పేరులోనే తప్ప కాలగణనలో కాదు. ఉదాహరణకు క్రీ.పూ. 512, సా.శ..పూ. 512 గాను, సా.శ.. 1757, సా.శ.. 1757 గాను మారుతాయి.

సామాన్య శకం పూర్వం నుండి నాణేలు

చరిత్ర

ఇంగ్లీషులో "కామన్ ఎరా" అనే మాటను మొదటిగా 1708 లో వాడారు.^[1] 19 వ శతాబ్ది మధ్యలో యూదు పండితులు దీన్ని విస్తృతంగా ఉపయోగించారు. 20 వ శతాబ్ది మలి భాగంలో CE, BCE అనే పదాలు సాంస్కృతికంగా తటస్థంగా ఉండే పదాలుగా విద్యా, పరిశోధనా రంగాల్లో ప్రాచుర్యం పొందాయి. కొందరు రచయితలు, ప్రచురణకర్తలు క్రైస్తవేతరుల మనోభావాలకు విలువ నిస్తూ "క్రీస్తు" అనే మాట లేకుండా ఉండేందుకు గాను ఈ పదాలను వాడారు.^[2][3]

1856 లో చరిత్ర కారుడూ, యూదు రబ్బీ అయిన మోరిస్ జాకబ్ రఫాల్, తన పోస్ట్-బైబ్లికల్ హిస్టరీ ఆఫ్ జ్యూస్ పుస్తకంలో CE, BCE అనే సంక్షిప్త పదాలను వాడాడు.^[4][a] యూదులు కరెంట్ ఎరా అనే మాటను కూడా వాడారు.^[6]

స్పందనలు

సమర్ధనగా

మాజీ ఐరాస సెక్రెటరీ జనరల్ కోఫీ అన్నన్ ^[7] ఇలా అన్నాడు:

క్రైస్తవ క్యాలెండరు క్రైస్తవులకు మాత్రమే ప్రత్యేకించినదేమీ కాదు. అన్ని మతాలకు చెందినవారు తమ సౌకర్యం కోసం దాన్నే వాడుతున్నారు. వివిధ మతాల , వివిధ సంస్కృతుల, వివిధ నాగరికతల మధ్య పరస్పర సంబంధం ఎంతలా ఉందంటే అందరూ పాటించే ఒకే కాలమానం ఉండడమనేది ఆవశ్యకమైంది. అందుచేత క్రిస్టియన్ ఎరా ఇప్పుడు కామన్ ఎరా అయిపోయింది.^[8]

అడెనా బెర్కోవిట్జ నే లాయరు అమెరికా సుప్రీం కోర్టులో వాదించేటపుడు, BCE, CE లను వాడాడు. దాన్ని సమర్ధించుకుంటూ, "మనం నివసిస్తున్న ఈ బహుళ సంస్కృతుల సమాజంలో B.C.E., C.E. అనేవి అన్ని వర్గాల వారినీ అక్కున చేర్చుకుంటాయి" అని అన్నాడు.^[9]

ఇవీ చూడండి

• కాలమానం

గమనికలు

1. The term common era does not appear in this book; the term Christian era [lowercase] does appear a number of times. Nowhere in the book is the abbreviation explained or expanded directly.^[5]