Cavite–Laguna Expressway

Ang Cavite–Laguna Expressway (kilala rin bilang CALAX^[1][2][3] at CALAX) ay isang itinatayong mabilisang daanan na matatagpuan sa mga lalawigan ng Kabite at Laguna sa Calabarzon. Ang pagtatayo ng pang-apatang mabilisang daanan, na may habang 47 kilometro (29 na milya), ay mag-uugnay ng Manila–Cavite Expressway (CAVITEx) sa Kawit sa Palitan ng Mamplasan ng South Luzon Expressway (SLEx) at nagkakahalaga ng tinatayang ₱35.42 bilyon o US$787 milyon.^[4] Kapag natapos, inaasahang mapapagaan nito ang daloy ng trapiko sa rehiyon ng Kabite at Laguna, lalo na sa kahabaan ng Lansangang Aguinaldo, Daang Santa Rosa–Tagaytay, at Daang Juanito R. Remulla Sr..^[5]

Cavite–Laguna Expressway (CALAX)
Mapa ng mga mabilisang daanan sa Luzon, kalakip ang Cavite–Laguna Expressway na nakakulay kahel
Pasukan ng Cavite–Laguna Expressway (CALAX) sa Mamplasan, Biñan sa lalawigan ng Laguna.
Impormasyon sa ruta
Haba	47 km (29 mi)
Umiiral	Oktubre 30, 2019–kasalukuyan
Pangunahing daanan
Mula sa	N420 (Daang Santa Rosa–Tagaytay) sa Silang, Kabite
Dulo sa timog	E2 (South Luzon Expressway) / AH26 Labasan ng Mamplasan sa Biñan, Laguna
Hinaharap
Dulo sa hilaga	E3 (Manila–Cavite Expressway) sa Kawit, Kabite
Pangunahing daanan	N65 (Daang Juanito Remulla Sr.) sa Heneral Trias, Kabite N410 (Lansangang Aguinaldo) sa Silang, Kabite
Lokasyon
Mga pangunahing lungsod	Imus, Dasmariñas, Heneral Trias, Biñan, Santa Rosa
Mga bayan	Kawit, Silang, Carmona
Sistema ng mga daan
Mga daanan sa Pilipinas Mga lansangan Mga mabilisang daanan Talaan

Kasaysayan

Pagtatayo at groundbreaking

Itinatayong CALAEx malapit sa Nuvali, Santa Rosa, Laguna (Hunyo 2018)

May apat na mga pre-qualified bidders na nakikipaligsahan sa proyektong CALAx: Alloy MTD Philippines Inc.; Team Orion, isang grupo ng AC Infrastructure Holdings Inc., AboitizLand, Inc., at Macquarie Infrastructure Holdings Philippines; MPCALA Holdings Inc.; at Optimal Infrastructure Development Inc. ng San Miguel Corporation.^[6]

Noong Hunyo 12, 2014, nanalo sa bid ang Team Orion, ang sanibang sikap^{[note 1]} ng Ayala Corporation at Aboitiz Equity Ventures na naglagay ng kabayarang konsesyon na ₱11.659 bilyon para sa proyektong public-private partnership (PPP) na ito. Hindi naging kuwalipikado ang Optimal Infrastructure sa kadahilanang nabigo ang bid security nito sa kinakailangang 180 araw alinsunod sa pamahalaan. Nakasaad sa sobreng halaga nito ang halagang pampinansiya na ₱20.105 bilyon.^[7]

Kasunod ng dagliang pamamahinga ng proyekto, ipinasiya ng pamahalaan na muling i-bid ito upang matiyak na makakakuha ng pinakamagandang kasunduan ang pamahalaan. Nanalo ang konsorsiyum na MPCALA Holdings, na pinamunuan ng Metro Pacific Investments Corporation, nang pinadala nila ang kabayarang konsesyon na ₱27.3 bilyon na babayaran sa pamahalaan. Mas-mataas ito sa halagang ₱22.2 bilyon ng San Miguel.^[8]

Ginanap ang groundbreaking ng proyekto noong Hunyo 19, 2017, at nagpatuloy ang pagkuha ng karapatan sa daan magmula noong Oktubre 2017.^[9] Ayon sa isang pahayag ni Presidente Luigi Bautista ng MPCALA Holdings, inaasahang magsisimula ang pagtatayo ng bahaging Kabite ng mabilisang daanan sa Abril 2018.^[10] Idinaos ang seremonyang groundbreaking para sa bahaging Kabite noong Marso 2019.^[11][12][13] Samantala, inaasahan ng Kagawaran ng mga Pagawain at Lansangang Bayan (DPWH) na magbubukas ang bahaging Laguna pagsapit ng Oktubre 2019.^[14] Sa kasalukuyan, bahagyang nakabukas ang bahaging Laguna at itinatayo pa rin ang bahaging Kabite. Kapuwang mga bahagi ay inaasahang matatapos at magbubukas nang lubusan pagsapit ng 2022, ayon sa isang pahayag ni Kalihim Mark Villar ng DPWH.^[15]

Bahagyang pagbubukas (bahaging Mamplasan–Bulebar Laguna)

Madaraanan ang unang 7.4 na kilometrong kahabaan ng mabilisang daanan noong Oktubre 30, 2019 upang matugma sa Araw ng mga Santo. Binuksan ang mga pasukan at labasan ng Palitan ng Mamplasan sa Biñan at ng Daang Santa Rosa–Tagaytay upang maglingkod sa tinatayang 10,000 mga kotse. Ayon kay Kalihim Villar, mababawas ang oras ng paglalakbay sa 10 minuto mula sa dating 45 minuto.^[16][17] Ngunit dapat na nabuksan na ang bahaging ito noong Disyembre 2018 o Pebrero 2019.^[18]

Mga labasan

Mabibilang ang mga labasan ayon sa mga palatandaang kilometro, nasa Liwasang Rizal sa Maynila ang kilometro sero. 

Lalawigan	Lungsod/Bayan	km	mi	Labasan	Pangalan	Mga paroroonan	Mga nota
Cavite	Kawit				Kawit	N62 (Lansangang Tirona) / N64 (Lansangang Antero Soriano) – Bacoor, Kawit	Hilagang dulo. Tutuloy pahilaga bilang E3 (CAVITEx).
	Imus				Open Canal	Daang Open Canal – Imus, General Trias
	General Trias				Governor's Drive	N65 (Daang Governor) – General Trias, Trece Martires
	Silang				Silang West (Aguinaldo)	N410 (Lansangang Aguinaldo) – Silang, Dasmariñas	Palitang trumpeta. Kasulukuyang dulo.
					Silang East	Daang Tibig–Kaong, Cavite–Tagaytay–Batangas Expressway – Tagaytay, Nasugbu, Silang, GMA	Palitang diyamante
					Santa Rosa	N420 (Daang Santa Rosa–Tagaytay) – Santa Rosa, Tagaytay	Palitang trumpeta.
Laguna	Santa Rosa				Laguna Boulevard	Bulebar Nuvali / Bulebar Laguna – Laguna Technopark, Westgrove	Palitang diyamante
	Biñan				Laguna Technopark	Bulebar Laguna – Laguna Technopark, Carmona	Palitang diyamante.
				Tarangkahang Pambayad ng Mamplasan (RFID at kabayarang pansalapi.)
					Greenfield Parkway	Greenfield Parkway – Greenfield City	Labasang pasilangan lamang
					Mamplasan	E2 / AH26 (SLEX) / Greenfield Parkway / Abenida LIIP – Maynila, Biñan, Calamba, LIIP	Rotonda. Silangang dulo.
1.000 mi = 1.609 km; 1.000 km = 0.621 mi       Hindi kumpletong access       May toll       Hindi pa nagbubukas o ginagawa pa

Talababa

1. Sanibang sikap - Tagalog ng joint venture ayon sa glosbe.com/en/tl/joint%20venture