Sungay ng Aprika

Ang Sungay ng Aprika ay isang malaking tangway at rehiyong heopolitikal sa Silangang Aprika.^[1] Matatagpuan sa pinakasilangang bahagi ng kalupaang Aprika, ito ang ikaapat na pinakamalaking tangway sa mundo. Binubuo ito ng Somalya (kabilang dito ang Somalilandiya at Puntlandiya na de-paktong malaya), Hiboti, Etiyopiya, at Eritrea.^[2][3] Bagama't hindi karaniwan, kasama sa mas malawak na kahulugan ang mga bahagi o lahat ng Kenya at Sudan.^[4][5][6] Nailarawan ito bilang rehiyon na may kahalagahan sa heopolitika at estratehiya, dahil namamalagi ito sa katimugang hangganan ng Dagat Pula; umaabot ng daan-daang kilometro patungo sa Golpo ng Aden, Dagat-lagusan ng Guardafui, at Karagatang Indiyo, nakikibahagi rin ito ng hangganang-dagat sa Tangway ng Arabya.^{[7][8][9][10]}

Sungay ng Aprika
Mga koordinado: 09°N 48°E
Mga bansa	Djibouti  Eritrea  Ethiopia  Somalia
Mga kabisera	Djibouti Asmara Addis Ababa Mogadishu
Lawak
• Kabuuan	1,882,857 km2 (726,975 milya kuwadrado)
Populasyon
• Kabuuan	115,000,000
• Kapal	61/km2 (160/milya kuwadrado)
Sona ng oras	UTC+3
Mga wiki	Afar Amharic Arabic Oromo Somali Tigrinya Others

Ito ay sumasaklaw sa humigit-kumulang 2,000,000 km² (770,000 sq mi) at pinaninirahan ng halos 115 milyong tao (Etiyopiya: 96.6 milyon, Somalya: 12.3 milyon, Eritrea 6.4 milyon, at Hiboti: 0.81 milyon).

Mga pangalan

Kilala ang tangway sa iba't ibang pangalan. Tinukoy ito ng mga Sinaunang Griyego at Romano bilang Regio Aromatica o Regio Cinnamonifora dahil sa mga masamyong halaman na natagpuan doon, o bilang Regio Incognita dahil sa mga teritoryo nito na wala pa sa mapa noon. Sa mga sinauna at medyebal na panahon, tinukoy ang Sungay ng Aprika bilang Bilad al Barbar ("Lupain ng mga Berber").^[11][12][4] Kilala rin ito bilang Tangway Somali, o sa wikang Somali, bilang Geeska Afrika o Jasiiradda Soomaali.^[13] Sa mga ibang lokal na wika, tinatawag itong "Sungay ng Aprika" o "Aprikanong Sungay", የአፍሪካ ቀንድ yäafrika qänd sa wikang Amhariko, القرن الأفريقي al-qarn al-'afrīqī sa wikang Arabe, Gaanfaa Afrikaa sa wikang Oromo, at ቀርኒ ኣፍሪቃ q'ärnī afīrīqa sa wikang Tigrinya.^[14][15]