Алмаз Шәрипов (1964)

Алмаз Шәрипов, Алмаз Хантимер улы Шәрипов (Алмаз Хантимерович Шарипов; 1964 елның 24 октябре, СССР, РСФСР, ТАССР, Актаныш районы, Әнәк) ― инженер-механик, хуҗалык-идарә эшлеклесе, 1999 елдан «Яр Чаллы икмәк комбинаты» ААҖ генераль директоры, Россия Федерациясенең атказанган азык-төлек индустриясе хезмәткәре, Татарстан Республикасының атказанган авыл хуҗалыгы хезмәткәре (2003), III―V чакырылыш Татарстан Республикасы Дәүләт Советы депутаты.

Алмаз Шәрипов
Туган телдә исем	Алмаз Хантимер улы Шәрипов
Туган	24 октябрь 1964(1964-10-24) (60 яшь) СССР, РСФСР, ТАССР, Минзәлә районы, Әнәк
Милләт	татар
Ватандашлыгы	СССР РФ
Әлма-матер	Казан дәүләт аграр университеты
Һөнәре	инженер-механик, генераль директор
Җефет	Лилия
Балалар	ике улы
Ата-ана	Хантимер (әти) Фәвия (әни)
Бүләк һәм премияләре	Казанның 1000 еллыгы истәлегенә медале

Википедиядә Шәрипов фамилияле башка кешеләр турында мәкаләләр дә бар.

Тәрҗемәи хәле

1964 елның 24 октябрендә ^[1] Татарстан АССР Минзәлә (1965 елның 12 гыйнварыннан Актаныш) районына кергән Әнәк авылында туган. Чыгышы белән Шәймиевлар нәселеннән: әтисе Хантимер ягыннан бабасы ― күмәк хуҗалык рәисе Шаһишәрип Шәймөхәммәт улы Шәймиев (1901―1967, Минтимер Шәймиевнең әтисе), әбисе Нәгыймә. Әнисе Фәвия (кибеттә эшләгән) ягыннан бабасы Сафиулла хәзрәт, әбисе Сәхибҗамал (Усыда яшәгәннәр) ^[2]. Энесе Айвар (1969―2014), Казан дәүләт медицина институтын тәмамлаган табиб-хирург, 2001―2014 елларда«Энҗе бөртеге» (рус. Жемчужина, Яр Чаллы) шифаханәсенең баш табибы булып эшләгән, Татарстанның атказанган табибы (2008)^[3].

Пучы урта мәктәбен, Казан авыл хуҗалыгы институтын (2006 елдан университет) «инженер-механик» белгечлеге буенча тәмамлаган (1986). 1987―1989 елларда Совет Армиясендә хәрби хезмәттә булган^[4].

Хезмәт юлы

1984―1986 елларда (студент вакытында) Казанның 2нче санлы йөк автомобильләре берләшмәсендә автослесарь булып эшләгән.

1986―1987, 1989―1991 елларда ― Яр Чаллы «Татсельхозводстрой» тресты автомобильләр ремонтлау остаханәсе башлыгы.

1991―1995 елларда ― Ютазы районы «Сельхозтехника» район берләшмәсе идарәчесе.

1995―1999 елларда ― Тукай районы хакимияте башлыгы урынбасары ― авыл хуҗалыгы идарәсе башлыгы.

1999―2011 елларда ― «Яр Чаллы икмәк комбинаты» ААҖ генераль директоры.

2011―2016 елларда ― «Чаллы икмәк продукты» АҖ генераль директоры.

2018 елдан ― «Агрокомплекс +» ҖЧҖ (Калморза, Минзәлә районы) генераль директоры^[5].

2018 елның 6 мартыннан «Агромай» ҖЧҖ (Камыштамак, Минзәлә районы) җитәкчесе^[6].

Күп мәртәбә гомумроссия һәм халыкара чараларда катнашкан, мәсәлән, «Европа―2003» халыкара күргәзмәсендә (Утрехт, Голландия) Татарстанны тәкъдим иткән^[3].

Иҗтимагый эшчәнлеге

III (2004―2009)^[7], IV (2009―2014), V (2014―2019)^[8] чакырылыш Татарстан Республикасы Дәүләт Советы депутаты.

Бүләкләре, мактаулы исемнәре

• Россия Федерациясенең атказанган азык-төлек индустриясе хезмәткәре^[9]
• 2003 ― Татарстан Республикасының атказанган авыл хуҗалыгы хезмәткәре ^[9]
• 2005 ― «Казанның 1000 еллыгы истәлегенә» медале
• «Фидакарь хезмәт өчен» медале
• 2014 ― Татарстан Республикасы Президенты Рәхмәте ― республиканың агросәнәгать комплексын үстерүгә лаеклы өлеш керткән һәм күпьеллык намуслы хезмәте өчен ^[10]
• «Россиянең агросәнәгать комплексын үстергән өчен» алтын медале
• 2022 ― «Татарстан Республикасы алдындагы казанышлар өчен» ордены медале ― республиканың агросәнәгать комплексын үстерүгә аерым өлеш кертүе һәм күпьеллык нәтиҗәле эше өчен^[11]
• 2024 ― «Дуслык» ордены ― авыл хуҗалыгы комплексын үстерүгә зур өлеш керткән, күпьеллык нәтиҗәле эшчәнлеге өчен һәм 60 яшь тулу уңаеннан^[12]

Шәхси тормышы

Гаиләле. Хатыны Лилия. Ике улы. Чаллыда яшиләр. Автоспорт, тау чаңгысы, ат спорты белән мавыга^[4].