Тукай мәйданы (Казан)

Тукай мәйданы — Казанның үзәгендә, Вахитов районында урнашкан мәйдан. 1998 елдан бөек татар шагыйре Габдулла Тукай (1886-1913) исемен йөртә. Мәйдан аркылы Пушкин урамы уза.

Тукай мәйданы

Элеккеге исемнәр	Балык рәтләре, Кооператив мәйданы, Куйбышев мәйданы, Боҗра
Төбәк	Татарстан
Шәһәр	Казан
Район	Вахитов
Якындагы метро стансасы	«Тукай мәйданы»
Кисеп үтә	Пушкин урамы, Бауман урамы һәм Петербург урамы

Бу терминның башка аңлатмалары да бар, аларны карау өчен Тукай мәйданы битенә күчегез.

Тарих

Казанның Богоявление бистәсенең көньягында (якынча хәзерге «Татарстан» кунакханәсе торган урында) сазлы ярлары белән Грузеево күле булган. XVII — XVIII гасырлар чигендә биредә Кирпеч бистәсе оеша. Проломная урамы азагында, Богоявление һәм Кирпеч бистәләре арасында мәйдан барлыкка килә. Анда балык сату урыннары булгач, базар алдындагы мәйдан Балык рәтләре (рус. Рыбнорядская) дип атала башлый. Әлеге мәйдан — Казанда иң беренче таш җәелгән мәйдан булып санала. 1829 елның 6 октябрендә шул уңайдан шәһәрдә тәре йөреше уздырылуы мәгълүм.

Элегрәк бу мәйданда трамвайларның әйләнеп китү боҗрасы урнашкан булган, шунлыктан мәйданның халык арасында киң таралган атамасы — «Боҗра» (рус. Кольцо). Инкыйлабтан соң В. В. Куйбышев исемен йөртә, 1998 елдан Габдулла Тукай исемендәге мәйдан.

Биналар һәм әһәмиятле объектлар

• «Татарстан» кунакханәсе
• «ГУМ» сәүдә үзәге
• «Гранд Отель Казань» кунакханәсе
• М. М. Вахитовка (1885-1918) һәйкәл
• Л. Н. Гумилевка (1912-1992) һәйкәл
• Бауман урамыннан Петербург урамына чыгу юлы
• Пушкин урамы чаты
• Татарстан урамына чыгу
• Мәйдан белән Кабан күле арасында Тукай скверы.

Транспорт

• Мәйдан аркылы шәһәр эче автобусы һәм троллейбус маршрутлары уза.
• Шәһәрара автобусларның һәм такси тукталышы бар.
• Метроның «Тукай мәйданы» тукталышына төшәргә мөмкин.
• Мәйданда дүрт якка чыгышлы җир асты кичүе бар.

Мәйданның түгәрәк панорамасы (2010-2011 елның карлы кышы).

Пенсия фонды бинасына (с) керү юлыннан Боҗра манзарасы.

Әдәбият

1. Их именами названы улицы Казани. К.: ТКН, 1977.
2. Әмиров К. Ф. Казань: Где это улица, где этот дом? К.: ТКН, 1995.
3. М. М. Шарипов. Познавательный путеводитель по Казани. К.: «Скрипта», 2015. ISBN 978-5-99008-642-5

Сылтамалар

• Площадь Тукая (Казань)(рус.)
• Площадь Тукая. travelask.ru 2018 елның 1 апрель көнендә архивланган.(рус.)