Zenosìdio
From Wikipedia, the free encyclopedia
Co zenosìdio o zenocìdio, drio ła definision adotada da l'ONU, se intende «łe asion cometeste co l'intension de desfar, in tuto o in parte, un grupo nasionałe, ètnego, rasiałe o rełijozo».
Inte i studi zurìdeghi, stòreghi, pułìteghi e sociołòzeghi, partindo da ła fin de ła seconda guera mondiałe, el conceto de zenosìdio, desviłupà in prinsìpio inte l'ànbito del derito internasionałe, el ze sta doparà in vari contesti e co diverse acesion[1][2][3]:
- acesion zurìdega, co na definision nesesariamente preciza par podérghene reconpréndar ła fatispece inte l'atività d'indàzene e procesuałe;
- acesion socio-pułìtega par dezignar in magnera spesìfega i zenosidi del XX sècoło;
- acesion storiogràfega, co un signifegà zenerałe che el detien fenòmani de stermìnio recorenti inte ła stòria universałe, in società anca racuanto difarenti intrà de lore.
A paro del terorismo, tortura, crìmeni de guera, crìmeni contro l'umanità e crìmeni de agresion, el zenosìdio el se ingloba intrà i crìmeni internasionałi, par i cuałi ła ze in vigor ła règoła de ła zurisdision internasionałe e l'istitusion de tribunałi soranasionałi[4].