Aeroporto de Pàdoa
From Wikipedia, the free encyclopedia
Remove ads
L'Aeroporto de Pàdoa[1] (ICAO: LIPU) , cità anca col nome comersałe de Aeroporto Siviłe de Pàdoa "Gino Allegri",[2] el ze un aeroporto vèneto distante sirca 3 km sud ovest dal sentro de ła sità de Pàdoa, intrà l'àrzene del fiume Bachejon, ła tanzensiałe e un'àrea altamente abitada.
La strutura, intitołada in ła memòria del tenente piłota Gino Allegri, ła ze ponesta a l'altitùdene de 13 m / 44 ft sora del liveło del mare, dotada de un picenin terminal e de do piste, ła prinsipałe longa 1 122 m e larga 30 m (3 681 x 98 ft), co orientamento 04/22, fondo in asfalto e dotada de inpianto de iłumenasion a basa intensità (LIRL) e sistema de asistensa a l'aterajo PAPI,[3] ła secondària parałeła a ła prima da 617 x 30 m e fondo in erba.
L'aeroporto, zestionà da ła Aeroporto siviłe de Pàdoa S.p.A., el fa atività sevendo łe regołe e i orari sia IFR che VFR e el ze verzesto al trafego comersałe. Clasìfegà cofà che City airport, sto aeroporto el ze uno dei pochi inserii inte el contesto urban de na sità.
La società ACP SpA in Licuidasion ła ga sbandonà ła zestion de l'Aeroporto "G. Allegri" de Pàdoa inte ła data de l'11 de disenbre del 2014.[4]
Remove ads
Istòrego
L'aeroporto de Pàdoa el ze sta costruio inte el ndar de ła prima guera mondiałe insieme a altri picenini aeroporti spandesti par i comuni de ła provincia, in partegołare se recorda l'Aeroporto de San Pełajo inte l'omònema frasion de Do Carare, andove el 9 de agosto del 1918 ła scuadreja "Serenisima", soto el comando de Gabriełe D'Anùnsio, ła zera partia par el sèłebre voło sora Viena. Gino Allegri, al cuało el ghe ze sta intitolà l'aeroporto de Pàdoa, el zera moresto inte el ndar de l'aterajo sul canpo de San Pełajo.[5]
Inte i ani drioman de ła prima guera mondiałe l'aeroporto de Pàdoa el ze sta doparà par fini miłitari ospitando el 1º Stormo Càcia uncó 1ª Brigada aèrea "oparasion speciałi" fin al 1987,[6] ano inte el cuało el zera sta verzesto anca a vołi siviłi. El Ministero dei Trasporti inte el 1995 el ga reconosesto l'aeroporto cofà scało de interese sociałe par i vołi sanitari e umanitari.
Sede del comando de ła 1ª Brigada Aèrea fin al 31 de otobre 2009, l'Aeronàutega Miłitare ła ze drio serar ła so baze miłitare; in pì ła zera sede de un grupo scuadroni AVES (uncó za intieramente trasferio a Bolzan, al 54°), ła cuała baze ła ze uncó sarada e in stato de sbandono.
Sto aeroporto el ze verzesto al tràfego de vołi turìsteghi nasionałi e internasionałi, vołi de lìnea charter, privai de inprenditori, comersałi e cargo nasionałi e internasionałi e voli miłitari de elicòtari e veìvołi lejeri. In sto aeroporto el ga sede anca l'Aeroclub de Pàdoa co ła so scoła de voło e de voło a veła.
Cheło che parò el fa sto aeroporto inportante el ze soratuto i vołi sanitari e de emerjensa par małai gravi e par i trapianti de òrgani. L'aeroporto ła ze ła baze de partensa del servìsio de ełi-socorso del SUEM de Pàdoa.
Remove ads
El futuro de l'aeroporto
Inte l'aeroporto de Pàdoa no ghe ze vołi de lìnea regołari: racuanti projeti de potensiamento del scało i ze stai contrastai dai rezidenti de łe zone arenti, ponesto che ła strutura ła ze inte el vivo del sentro urban, e l'inplementasion de vołi ła crearia miga pochi problemi par ła vivibiłità dei cuartieri arenti; ansi, ghe ze dei comitai che i se bate par ła serada totałe del scało e ła so reconversion in parco. Inte el 2006 e inte el 2007 ła zestion de l'aeroporto da parte de ła Save Spa ła ghea sarà i bałansi in forte defecit.[7]
Remove ads
Notasion
Altri projeti
Linganbi foresti
Wikiwand - on
Seamless Wikipedia browsing. On steroids.
Remove ads