Alessandro Maganza

Alessandro Maganza (Vicensa, prima del 1556 – Vicensa, 1632) el ze stà on pitor itałian, esponente del manierismo, parte pì alto de ła fameja de pitori visentini e sitàdin de ła Repùblega de Venèsia.

Alessandro Maganza

Biografia
Nasimènto	1556 (Gregorian) Vicensa (Itàlia)
Morte	1632 (75/76 ani) Vicensa (Itàlia)
Atività
Ocupasion	pintor, dezegnador

Decorasion pitòrega de ła cupoła de Viła Capra dita Ła Totonda, Vicensa.

Biografia

Fioło de Giovanni Battista Maganza, anca eło pitor conosesto e mestro, intrà i altri, de Andrea Vicentino, de sto chive el ze stà fin da zovane avià a l'arte de ła pitura, e dopo trasferesto a ła botega de Giovanni Antonio Fasolo. Morto Fasolo, intel 1572, el se ga trasferesto a Venesia, nando drio el consejo de l'amigo Alessandro Vittoria, indove el ze restà fin al 1576 par inparare tanto łesion da Tintoreto e Veronese.

Tornà a ła sità berega, el gà fondà na fiorente botega insieme a i so cuatro fiołi masci (Giovanni Battista el Zovane, nato intel 1577, Marcantonio, nato intel 1578, Girolamo, nato intel 1586 e Vincenzo, nato intrà el 1586 - 1600). Intel 1584, ghe ze stà afidà l'incarego de decorare ła ceza de l'Ospedałe de San Vałentin senpre a Vicensa.

Dopo na łonga vita pasà a óparare comision inportanti, el ze morto inte ła so Vicensa, oncora drio na granda epidemia de peste del 1630 che ła ghe gà fato morir ben tri fiołi, intel 1632.

Alessandro el ze vegnesto l'artista pì inportante e dotà de ła botega e pena fato łe so prime ópare el gà revełà on concreto eclettismo: l'insegnamento de Tintoreto, filtà da ła mediasion de Palma el Zovane, se conbacia co ełementi del Veronese, catebiłi inte l'aplicasion de note ciare de cołore e inte ła presizasion del disegno.

Inte ła produsion dei primi tri deseni del Siesento se nota sipia inte ła pitura de Alessandro e sipia inte chełe dei fiołi (Giambattista j., Marcantonio, Vincenzo, Girolamo), rente a on progresivo incupimento de l'intonanizasion cromàtega zenerałe, l'inpegno de on łuzentismo grando de basanesco^[1].