Reeperbahn

Ła Reeperbahn (pron.: /'re:pɐ:Rba:n/) ła xe na conosua via a luxe rose de Anburgo, in Germania, situà in tel cuartiero de St. Pauli, in tel distreto (Bezirk) de Hamburg-Mitte.

Anburgo: ła Reeperbahn

Un sexy shop neła Reeperbahn

Ła via ła se ga sviłupà a partire dai ani sesanta del XX secoło cofà logo de divertimento par i marinari che rivava in tel porto de Anburgo.^[1]

Etimołoxia

El nome "Reeperbahn" vołe dire letralmente "via dei cordai" e el fa riferimento a on tipo de corda par marinari che ła se fabricava inte ła xona e che in baso-tedesco vien ciamà reep.^[1]

Ła via ła xe comunemente soranomenà "Kiez"^[1], on termine che el se rifarise a on cuartiero de na sità granda^[2], o anca "Die sündige Meile", o sia "el mijo pecaminoxo"^[3].

Ubicasion

Ła Reeperbahn se xe a nord dei St. Pauli-Landungsbrücken, i embarcarderi de St. Pauli e imediatamente a ovest de ła Millerntorplatz e a sud-ovest de el Heiligengeistfeld, ła xona dove par 6 mesi a l'ano ghe xe on luna park in ocaxion del Hamburger Dom e dove che se połe catare anca el Millerntor-Stadion (ex- Wilhelm-Koch-Stadion), el stadio andove che xuga el FC St. Pauli, ła segonda scuadra de bałon de ła sità.^[4] Se połe catar davanti a ła Reeperbahn anca ła Spielbudenplatz, ła piasa co el St. Pauli-Theater, e ła Hans-Albers-Platz, ła piasa dedegà a Hans Albers.^[4]

Descrision

Inte ła via, che ła xe longa 600 metri^[4], no se cata soło sexy shop e locałi andove se fa el snudareło (estriptis), ma anca bar, discoteche e caxinò.

Łe case de apuntamento no łe se cata inte ła Reeperbahn, che xe ła via prinçipałe del cuartiero a luxe rose de Anburgo, ma in na picoła via laterałe, la Herbertstraße, na via sorvejà da ła połisia e che ła xe interdeta a łe done e ai òmani soto i dixdoto ani.^[5][6][7]
Sto fato diferensia sostansialmente el cuartiero a luxe rose de Anburgo dal cuartiero a luxe rose de Amsterdam "De Wallen".

N'altra famoxa laterałe de ła Reeperbahn xe ła Große Freiheit (leteralmente: "Granda libartà"), na via dove che se cata dei locałi de mùxega e dove che i gaveva fato i primi pasi, tra i altri, i Beatles (al nr. 36)^[5] e Mino Reitano^{[8][9][10][11]}.