Mednogorsk
From Wikipedia, the free encyclopedia
From Wikipedia, the free encyclopedia
Mednogorsk (ven.: Медного́рск, mugažo baškiran kelel) om Venäman lidn da lidnümbrik Orenburgan agjan keskuzpalan päivnouzmas.
Lidnanznam | Flag |
Valdkund | Venäma |
Eläjiden lugu (2021) | 23,693 ristitud |
Pind | 91,33 km² |
Pämez' | Andrei Nižegorodov (kül'mku 2019—) |
Telefonkod | +7−35 379-xx-xxx |
Avtokod | 56 |
Aigvö | UTC+5 (MSK+2) |
Eländpunktan aluz om pandud vl 1933 kuti vas'kižrikkombinat. Vl 1939 ühtištadihe Mednii-raudtesarakon radnikžiloid da anttihe lidnan statusad nügüdläiženke nimenke. Suren voinan aigan evakuiruihe Tulan azegtegimen palad neche lidnha. Tehtihe tuikutimid i lendimiden pul'kančudimid, sodan jäl'ghe — elektromašiništod laivoiden täht. Vl 1971 sijaline löudmižsija lopihe, i vas'kenkombinat radaškanzi todud torhudel.
Mednogorskan ižandusen päsarakod oma vas'ken metallurgii (Mednogorskan vas'kižrikkombinat), elektromašiništon pästand («Uralelektro»-tegim[1]), sauvondmaterialiden tehmine (savič, šebin'), sömtegimišt (leibänkombinat, maidproduktoiden kombinat, vasan, minveden i alkogolitomiden jomiden edheotand).
Lidn sijadase Bläv-jogen randal (ven.: Блява 41 km pitte, Ural-jogen oigedpol'ne bassein), Uralmägiden suvipäivlaskmaižil pautkil, 238..478 m korktusil, 350 m ü.m.t. keskmäižel korktusel.
Matkad Orenburghasai om 233 km päivlaskmha, Orskhasai — 51 km päivnouzmha. Lähembaine lidn om Kuvandik 20 km päivlaskmha avtotel.
Mednogorsk jagase 11 istorižikš sündnudeks lidnanlaptaks. Blävtamak-žilo (946 rist. vl 2010), Bläv-stancii (18 rist. vl 2010) i nell' küläd mülüdas lidnümbrikho Mednogorskan ližaks. Lidnümbrikon pind om 353,63 nellikkilometrad.
Lidnümbrikon pämez' om sen Administracijan pämez'. Edeline lidnümbrikon pämez' om Dmitrii Sadovenko (kül'mku 2015 — sügüz'ku 2019). Lidnümbrikon Deputatoiden nevondkundan ezimez' om Jelena Mudrova vn 2020 redukuspäi. Edeližed nevondkundan ezimehed oma Nikolai Markin (reduku 2015 — reduku 2020), Dmitrii Sadovenko (reduku 2013 — reduku 2015).
Vn 2010 Venäman rahvahanlugemižen mödhe lidnan eläjiden lugu oli 27 292 ristitud, lidnümbrikon — 29 120 ristitud. Vn 2021 rahvahanlugemižen mödhe lidnan ristitišt oli 23 693 eläjad. Kaik 25 610 eläjad oli lidnas vl 2017. Kaikiš suremb lidnan ristitišt oli 39 tuhad eläjid vl 1967.
Rahvahad (enamba 1 % vl 2010, ozutadud rahvahudenke): venälaižed — 82,0 %, baškiralaižed — 8,7 %, totarlaižed — 4,1 %, ukrainalaižed — 2,2 %, toižed rahvahad — 3,0 %.
Ortodoksižen hristanuskondan koume pühäpertid[2] oma saudud lidnas: ph. Mikulai-čudonsädajan kaks' jumalanpertid i puine časoun' kellonke. Islaman pühäpert' om avaitud, toine mečet' om sauvomas vn 2023 semendkuspäi.
Lapsiden opendusen aluzkundad oma seičeme päivkodid (nomerad 1..6 i 8), keskškolad (nomerad 1, 2, 5, 7), gimnazii, čomamahtoiden škol, ližaopendusen keskuz (ende Pioneriden i školnikoiden pert'), kaks' sportškolad (nomer 1, 2). Professionaližen keskopendusen aluzkundad: Mednogorskan industrialine kolledž[3], Orskan medicinižen kolledžan Mednogorskan filial.
Avtobusad da maršruttaksid oma kundaližeks transportaks lidnas i sen ümbrištos. Kaik om kuz' maršrutad, niiden ližaks koume kezaaigan kezaküläpertidennoks.
Mednogorsk-raudtestancii radab «Orenburg — Orsk»-keskustal lidnan suves.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.