Kolpino

Kolpino (ven.: Ко́лпино, suom.: Kolpina / Kolppina) om Venäman lidn da municipaline ühtnik Piterin i sen Kolpinon rajonas suvipäivnouzmas. Vspäi 2011 om Venäman sodahoštusen lidnaks.

Kolpino
Колпино

Lidnanznam	Flag
Valdkund	Venäma
Eläjiden lugu (2023)	143,914 ristitud
Pind	57,49 km²
Pämez'	Julija Logvinenko (sulaku 2022—)
Telefonkod	+7−812-xxx-xxxx
Avtokod	78, 98, 178, 198
Aigvö	UTC+3 (MSK+0)

Istorii

Eländpunktan aluz om pandud vl 1722 kuti radnikslabad' pilindmellicanno sauvomha laivoid. Šingotihe laivansauvomižen tegimil. Sai lidnan statusad vl 1912. Vn 1918 9. päiväl semendkud Nevondkundaline tobmuz kävuti azegištod proletariatad vaste ezmäižen kerdan — ambui Ižoran tegimiden radnikoid, kudambad kävuiba sen tobmust vaste.

Kolpino šingotase Ižoran tegimil^[1] (energomašiništonsauvomine i suren diametran torved), metallan valamižtegimil (ezitegesed tegimišton äjiden sarakoiden täht), sauvondmaterialiden tegimil (savič, gipsmaterialad, lämuzizoläcii, sauvondpolimerad), söndtavaroiden edheotandoil, avtodetaliden pästandal.

Geografijan andmused

Lidnan sijaduz rajonas da Piteriš vn 2006 kartal

Lidn sijadase Nevanveren alangištos, Ižor-jogen alajoksmusen randoil (ven.: Ижора, Nevan hura ližajogi). Matkad Piterin keskushesai om 35 km lodeheze. Leningradan agjan Tosnon rajonan Tel'manan lidn sijadase ani suvhe lidnaspäi.

Kolpino ühtenzoitase avtobusoil Piterin metrostancijoidenke da Piterin regionan lidnoidenke. «Piter — Moskv»-raudte läbitab lidnad.

Eläjad

Vn 2010 Venäman rahvahanlugemižen mödhe lidnan eläjiden lugu oli 138 979 ristitud, rajonan koume nelländest. Kaik 144 901 eläjad oli lidnas vl 2017. Kaikiš suremb ristitišt oli 145 tuh. eläjid vll 1991−1992 i 149 156 eläjad vl 2020.

Ortodoksižen hristanuskondan üks'toštkümne pühäpertid^[2] oma saudud lidnas: Eläban Eziauguižen Stroican päjumalanpert' (uz', letihe vll 2003−2009), viž jumalanpertid i viž časounäd. Baptizman jumalanpert'^[3] i katoline časoun' oma avaitud mugažo.

Ižoran kolledž^[4] i Tegimišttehnologijoiden akademii^[5] oma lidnan professionaližen opendusen aluzkundoikš.

Galerei

• 
  Kolpinon rajonan administracijan sauvuz (2018, vhesai 2016 «Ižorskije Zavodi»-edheotandan kontor)
• 
  Sündun Voznesenjan jumalanpert' (ortodoksine hristanuskond) Ižoranjogen randal, vn 2009 nägu lidnan saduspäi
• 
  Eläban Eziauguižen Stroican päjumalanpert' Ižoranjogen randal
• 
  «Ižorskije Zavodi»-edheotandan («Ižoran tegimed») üks' sauvusišpäi (2011)
• 
  Ižoran kolledž (huralpäi, ende proflicei, profškol nomer 6)
• 
  «Ižorskii»-kul'turkeskuz (2009) i sild Ižoras päliči
• 
  Lidnan poliklinik nomer 71 vl 2017
• 
  Läžundkodi lapsiden täht nomer 22 vl 2009
• 
  «Ižorec»-vezisportkompleks vl 2018
• 
  Raudteplatformad Kolpino-stancijal (2017)