Leib

Leib om sömižprodukt, kudambad tehtas tahthan paštandan, purul ümbriradmižen vai räkištandan mahtusel.

Leibplotun pallišk

Ümbrikirjutand

Leib om mugoi produkt, kudamban tahtaz mülütab jauhod i vet minimaližikš, oleleb rohlenzoittud sepil. Venämas lugetas leibäks leibtegesid enamba mi 500 grammad vedusenke i 19 % nepsudenke da sen enamba (GOST 32677-2014).

Ližatas eriližmagutesud leibän erasihe-se toižendoihe: kuminan jüväd, pähkmed, kuivatud vinmarj, künz'lauk, kurag, unikon i kunžutan semned. Ottas semnid čomitamha-ki leibäd.

Kävutand

Voib söda leibäd eriži, no kävutadas kut ližaduz sömižes paksumb, sen aigan leibän supal om sömkalun sijas. Ližoidenke — voileib i sendvič. Voib lämbitada vai räkištada vähäižin leibäd edel söndad.

Järgeližen leibän sönd om kel'tud ristituile genetiženke celiakii-läžundanke elon hätkte glütenan olendan tagut. Heiden täht pästtas leibäd glütenata.

Leibän toižendoiden vepsän nimed

• Aganoikaz leib.
• Mäkušk, nižunik — vauged leib, nižuleib.
• Ozražnik — ozraine leib.
• Paloleib — kazvatadud palokas'kel vill'.
• Plot, leibplot — kubižen vai kehkran forman leib.
• Pärp — pen' kehker leib.
• Rungenik — rungekaz leib.
• Teplik — pen' nižuleib, maged da ližadusidenke päpaloin.
• Valik — rugižleib, mustleib.
• Vasleib — leib vaumičemha vasad.

Leibhä sidodud vepsän tärtused

• Kezakeskust — leibätoi aigkeskust, konz edeližen satusen leib lopiše.
• Korišk — kuiv leibän supalaine.
• Kromaine — leibän päluine.
• Teplikpada — astii peksmaha da seižutamha nižutahtast.

Leibhä sidodud vepsän muštatišed

• Eci, kut leibäd ecid, siloi löudad.
• Kodihine kromaine om kal'hemb edahašt plotud.
• Kuiv kromaine — koditomaine.
• Leib da vezi — saldatan söm.
• Mez' ei elä vaiše ühtel leibäl.
• Minus leibäd jo om södud. (vähä ližad — ravaz mez' ičeze polhe)
• Rahad da leib vellesed oma.
• Sanoišpäi leibäd ed pašta.
• Sen' eile leib, marj eile hein.
• Sö kromaine, ka linned priha čomaine.
• Tämbäi ed sö tulebid leibid.
• Verhas aitas — enamb leibäd.

Kacu mugažo

• Pirg
• Pirgaine