Mainc

Mainc (saks.: Mainz [maɪ̯nt͡s]; franc.: Mayence) om lidn Saksanman päivlaskmas. Se om Reinland-Pfal'c-federacijanman administrativine keskuz da kaikiš suremb lidn.

Mainc
Mainz

Lidnanznam	Flag
Valdkund	Saksanma
Eläjiden lugu (2023)	220,552 ristitud
Pind	97,73 km²
Pämez'	Nino Haase (keväz'ku 2023—, Nino Hans-Georg Haase)
Telefonkod	+49−613
Aigvö	tal'vel UTC+1, kezal UTC+2

Lidnan transportkart (2010)

Istorii

Nügüdläižen eländpunktan aluz om pandud rimalaižiden sodavägiden Mogontiacium-sijaduseks kaks' tuhad vozid tagaz, vl 13 edel m.e.. Sen erased ruinad oma kaičenus tähäsai. Vl 1244 eländpunkt sai lidnan oiktusid.

Vspäi 80 m.e. panihe arhijerejad (episkopad) Mogontiacium:ha, vozil 745−1803 panihe arhiepiskopad Maincha. Vl 1793 (keväz'ku — heinku) lidn oli Maincan Tazovaldkundan pälidnaks, se oli ezmäine demokratine valdkund nügüd'aigaižen Saksanman territorijal.

Mainc om transportmašiništon sauvomižen keskuz da järed mediakeskuz.

Geografijan andmused

Lidn seižub Rein-jogen hural randal, sijadase federacijanman päivnouzmaiženno röunanno, 82..245 m korktusil (89 m ü.m.t. om keskmäine). Matkad Berlinhasai om 450 km pohjoižpäivnouzmha orhal, 570 km kiruhavtoteil vai 540 km raudtedme. Järed Visbaden-lidn om Reinan vastrandal, Main-jogi lankteb Reinha sen territorijal. «Lidnad-kaks'jaižed» oma lidnaglomeracijan keskuseks 490 tuh. eläjidenke.

Klimat om ven valdmeren. Voden keskmäine lämuz om +10,1 C°. Paneb sadegid 550 mm vodes, läz tazomäras kuidme, enamba kezakus-heinkus (56..58 mm kus), vähemba vilukus-sulakus (36..38 mm kus).

Tobmuz

Lidnan ümbrikod (2010)

Mainc jagase 15 ümbrikoks (saks.: Ortsbezirk), ned alajagasoiš 65 lidnrajonaks (üks'lugu Stadtteil).

Valitas lidnan pämest (saks.: Oberbürgermeister der Stadt Mainz) kaikel rahvahal kahesaks vodeks. Edeline lidnan pämez' om Mikael' Ebling (Michael Ebling, sulaku 2012 — reduku 2022).

Eläjad

Vl 50 m.e. 16 tuh. ristituid elihe eländpunktas. Vl 2011 lidnan eläjiden lugu oli 200 957 ristitud. Vl 2015 lidnan ristitišt oli 212 348 eläjad. Kaikiš suremb lidnan ristitišt om nügüd'.

Transport

Avtobusad, tramvaid (vspäi 1884, koume jonod, 29,7 km raudted), ezilidnekektrojonused, velosipedad i taksid oma kundaližeks transportaks lidnas. Päraudtestancii om Mainz Hauptbahnhof. Valdkundan videnz' surtte kuiv port (konteinerad) radab jogiportanno Reinan randal lidnan pohjoižes.

Lähembaine rahvahidenkeskeine lendimport sijadase kuz'toštkümnes kilometras päivnouzmha lidnaspäi, se om Frankfurtan lendimport. Sijaline Mainc-Finthen-lendimport (EDFZ) radab vides kilometras suvipäivlaskmha lidnaspäi, kävutase specialižel aviacijal vaiše.

Irdkosketused

• Lidnan tobmuden portal (mainz.de). (saks.) (da turistine pala äjil kelil)

	Saksanman federacijanmad da niiden administrativižed keskused
	Alasaksonii (Gannover) | Baden-Vürtemberg (Štuttgart) | Bavarii (Münhen) | Berlin | Brandenburg (Potsdam) | Joudjaline Ganzejan Bremen-lidn (Bremen) | Joudjaline da Ganzejan Gamburg-lidn | Gessen (Visbaden) | Meklenburg da Ezine Pomeranii (Šverin) | Pohjoine Rein da Vestfalii (Düssel'dorf) | Reinland-Pfal'c (Mainc) | Saar (Saarbrükken) | Saksonii (Drezden) | Saksonii-Anhal't (Magdeburg) | Šlezvig-Gol'štein (Kil') | Türingii (Erfurt)