Podgoric

Podgoric (mustmägin kelel: Подгорица / Podgorica [pǒdɡoritsa] «ezimägišt», vozil 1952−1992 — Titograd) om Mustmägin pälidn (vspäi 1945) da kaikiš suremb lidn.

Podgoric
Подгорица / Podgorica

Lidnanznam	Flag
Valdkund	Mustmägi
Eläjiden lugu (2023)	173,024 ristitud
Pind	225 km²
Pämez'	Olivera Inäc (sulaku 2023—, Olivera Injac)
Telefonkod	+382−20
Aigvö	tal'vel UTC+1, kezal UTC+2

Lidnan sijaduz valdkundas (2006)

Istorii

Edel meiden erad illirižed heimod eliba lidnan ümbrištos. Rimalaižen imperijan aigan kaks' lidnad oliba Podgorican da sen ümbrišton territorijal — Birziminium i Dioklei. 5. voz'sadaspäi slavižed heimod paniba Ribnic-lidnan alust, nimitihe jogen mödhe.

Nimitadud nügüdläižikš eländpunkt mainitase ezmäižen kerdan vl 1326. Vozil 1474−1878 lidn oli Osmanan imperijan palaks, turkad sauvoiba lidnust lidnas i vspäi 1864 se oli olmas Bogurtlen-nimenke. Vl 1878 Mustmägi-ruhtinazkund sai ripmatomut.

Podgoric šingotase valdkundan tegimišton da kommercijan keskuseks.

Geografijan andmused

Lidn sijadase alangištos, Morač-jogen (mustm.: Morača) da sen Ribnic-ližajogen randoil (Adriatižen meren bassein), 45 m ü.m.t. keskmäižel korktusel. Goric-mägi om 130 metrad korkte, se seižub lidnan keskuzpalas.

Klimat om subtropine Keskmeren. Räk kuiv keza da läm' tal'v oleldas lidnas. Tal'vel läz ei olele lunt, om äi päipaštod vodes läbi. Voden keskmäine lämuz om +15,6 C°, kezakun-sügüz'kun +22,0..+26,0 C°, tal'vkun-uhokun +5,5..+7,3 C°. Ekstremumad oma −9,7 C° (viluku, uhoku) i +44,8 C° (eloku). Kezaaigan minimum om +8,0 C° (kezaku), tal'vaigan maksimum om +27,1 C° (uhoku). Ei voi panda halad semendkus-sügüz'kus. Paneb sadegid 1693 mm vodes, enamba kül'mkus-tal'vkus (232..261 mm kus), vähemba kezakus-elokus (36..60 mm kus). Kun keskmäine relätivine nepsuz om 52 % heinkus-elokus, vajehtase 68..75 % röunoiš kül'mkus-uhokus.

Tobmuz

Lidnan kümne planiruindzonad (2016)

Podgoric jagase kaks'kümneks ühteks rajonaks ičeohjastusenke.

Edeližed lidnan pämehed (üks'lugu mustm.: Gradonačelnik Podgorice / Градоначелник Подгорице) oma Ivan Vukovič (Ivan Vuković / Иван Вуковић, heinku 2018 — sulaku 2023), Migo Stijepovič (serb.: Migo Stijepović / Славољуб "Миго" Стијеповић, kezaku 2014 — heinku 2018), Miomir Mugoša (Миомир Мугоша, heinku 2000 — kezaku 2014).

Eläjad

Vn 2011 Mustmägin rahvahanlugemižen mödhe lidnan eläjiden lugu oli 150 977 ristitud^[1]. Kaikiš suremb lidnan ristitišt om nügüd'. Kaikutte nellänz' Mustmägin ristit eläb Podgoricas.

Mustmägin universitet^[2] (mustm.: Univerzitet Crne Gore, UCG, serb.: Универзитет Црне Горе, alusenpanend 1974, 21,5 tuh. üläopenikoid) om üks'jäižeks valdkundaližeks üläopendusen aluzkundaks Mustmägiš, sen päine kampus i kümne fakul'tetad 19:späi sijadasoiš lidnas.

Transport

Pälidn om valdkundan kaikiš suremb avtote- da raudtesol'm.

Rahvahidenkeskeine civiline Podgoric-lendimport^[3] (TGD / LYPG, 1,75 mln passažiroid vl 2024) sijadase üks'toštkümnes kilometras suvipolehe lidnan keskuzpalaspäi, lähižes Golubovci-ezilidnas. Tehtas reisid Evropan erasihe-se maihe i Turkanmaha, om sezonreisid Keskuzazijan i Kavkazan pälidnoihe.

Galerei

• 
  Lidnan municipalitetan sauvuz (2021)
• 
  Hristan Eläbzdusen kafedraline päjumalanpert', vn 2009 nägu (ortodoksine hristanuskond, om saudud vll 1993−2013)
• 
  Kruševac-bizneskeskuz vl 2016
• 
  Mustmägin universitetan elektrotehnine fakul'tet (Podgoric, 2023)
• 
  Rahvahidenkeskeižen Podgoric-lendimportan terminal vl 2015
• 
  Podgoric-raudtestancii vl 2013