Albrecht II (HRR)

Albrecht II (Weenn, 16 ogustus 1397 - Neszmély, 27 oktober 1439), van 't Huus Habsburg, was van 1404 tout 1439 hertog van Ôostnryk als Albrecht V, en van 1438 tout 1439 Roomse keunienk van 't Hillig Rôoms Ryk. Je was ook keunienk van Boheemn, Hongareye en Krowoasje.

Albrecht II

1397-1439
Hertog van Ôostnryk
Periode 1404-1439 Vôorganger Albrecht IV Ipvolger Ladislaus Posthumus
Keunienk van Hongareye en Krowoasje
Periode 1437- 1439 Vôorganger Sigismund Ipvolger Wladislav I
Rôoms-Duutsche keunienk van 't Hillig Rôoms Ryk
Periode 1438-1439 Vôorganger Sigismund Ipvolger Frederik III
Keunienk van Boheemn
Periode 1438-1439 Vôorganger Sigismund Ipvolger Ladislaus Posthumus
Voader Albrecht IV van Ôostnryk Moeder Johanna Sophia van Beiern

Zyn voader, hertog Albrecht IV van Ôostnryk, stierf in 1404. Albrecht was mo zeevn joar oud ost 'n hem ipvolgde in 't hertogdom Ôostnryk. Zyn nounkel Willem die ton an 't hoofd stound van under rivoaln, de Leopoldynn, was zyn regent, gevolgd deur zyn andere nounkels Leopold IV en Ernst den Yzern.

In 1422 trouwde Albrecht met Elisabeth van Luxemburg, dochter en ipvolgster van Sigismund van Luxemburg, keunienk van Hongareye en Krowoasje, die loater ook keizer van 't Hillig Rooms Ryk kwam en keunienk van Boheemn. Elisabeth was e dochter van Sigismund zyn twidde vrouwe en stamdeg of van d'oude Árpád dynastie van Hongareye.

Under jounges

• Anna (1432–1462), getrouwd me Wilhelm III, hertog van Saksen
• Georg (1435-†1435)
• Elisabeth (1437–1505), getrouwd me Casimir IV Jagiellon grôothertog van Litouwn en keunienk van Pooln
• Ladislaus Posthumus (1440-1457), keunienk van Hongareye en Boheemn

Keizer Sigismund stierf in 1437. Den 1ste januoari 1438 wierd Albrecht tout keunienk van Hongareye gekrôond en je giengt hem doa vestign. Zes moandn loater kwamt 'n ook keunienk van Boheemn, mo zounder macht. Je was bezig met oorlog voern teegn de Boheemers en under Poolsche boundgenôotn, ot 'n den 18ste moarte 1438 verkoozn wierd tout Roomse keunienk in Frankfurt am Main. Je verdedigde Hongareye loater ook teegn d'Ottomoansche Turkn.

Zyn nounkel Ernst den Yzern, die zyn voogd gewist was in 1406, was de voader van Frederik V van Steiermark, die Albrecht loater ipvolgde als Frederik III van 't Hillig Rôoms Ryk. Frederik III was zyn achterkozyn en de voader van Maximiliaan van Ôostnryk.

Albrecht stierf de 27stn oktober 1439 in Neszmély en j'is begroavn in Székesfehérvár. Zyn zeune Ladislaus Posthumus is vier moandn achter zyn dôod geboorn en Frederik III kwam zyn regent. Ladislaus kwam keunienk van Boheemn en Hongareye, mo j'is jounk gestorvn in 1457.

Olhoewel dat Albrecht II nôoit tout keizer gekrôond is, was zyn korte regerienge toch styf belangryk, want met hem begost de lange reke van Rôoms-Duutsche keuniengn en keizers van 't Huus Habsburg.

Ofbeeldiengn die ier by passn ku je vien in de categorie Albert II of Habsburg van Wikimedia Commons.