Huus Capet-Anjou

't Huus Capet-Anjou of 't Huus Anjou-Sicilië was e zytak van 't Frãns Huus Capet.

Woapn van
Charles I van Anjou

De stichter was Charles I van Anjou, de joungste zeune van keunienk Louis VIII van Vrankryk. Je was groaf van Anjou en van 1266 keunienk van Sicilië, dat ton nie allêene bestound uut et eiland, moar ook uut den ounderstn helt van et Italioans schiereiland.

Os zyn zeune Charles II van Anjou hem ipvolgde, haan ze 't eiland verloorn binst de Vespersoorloge en wierd den ounderstn helt van et Italioans schiereiland et keunienkryk Noapels genoemd, lik den hoofdstad.

Charles II trouwde mè Maria van Hongareye, e zuster van keunienk Ladislaus IV van et Huus Árpád. Os heur broere Ladislaus in 1290 zounder jounges stierf, wilde ze dat heur zeune Charles Martel hem ipvolgde. Moar heur kozn Andreas III wierd verkoozn deur den oadel.

Charles Martel trouwde mè Clemence van Habsburg, dochter van de Rôoms-Duutsche keunienk Rudolf I van Habsburg, en 't was uutendelik under zeune Karel I Robert die in 1308 den êeste keunienk van Hongareye van 't Huus Capet-Anjou kwam. Et Huus blêef over Hongareye regeern van 1308 tout 1395.

Deurda Karel Robert zyn grotvoader, Charles II, keunienk van Noapels was, had ie ook ansproake kunn moakn ip et keunienkryk Noapels, mo 't was zyn nounkel Robert, de joungere broere van zyn voader Charles Martel, die keunienk van Noapels kwam.

In 1333 sloot Karel Robert een akkôord me zyn nounkel Robert in verband me d'erfipvolgienge van Noapels. Karel zyn zeune, Andreas van Calabrië, wierd uutgehuwelikt an de klêendochter van zyn nounkel, Johanna I van Noapels, dochter van Karel van Calabrië.

Karel zyn oudste zeune, Lodewyk I volgdeg hem ip in Hongareye en je was ook keunienk van Pooln.

Keuniengn van Noapels van et Huus Capet-Anjou

Portreit	Noame	Regeerperiode	Nota's
	Charles I van Anjou	1282-1285 êest van 1266-1282 keunienk van Sicilië	Zeune van keunienk Louis VIII van Vrankryk en van Blanche van Castilië.
	Charles II van Anjou	1285-1309	Zeune van Charles I van Anjou
	Robert I van Noapels	1309-1343	Zeune van Charles II van Anjou
	Johanna I van Noapels	1343-1382	Klêendochter van Robert I; dochter van zyn zeune Karel van Calabrië
	Louis van Taranto	1348-1362	Twidde vint van Johanna I; klêenzeune van Charles II; zeune van zyn vierde zeune Philippe I van Taranto; gin ipvolgers

Keuniengn van Hongareye van et Huus Capet-Anjou

Portreit	Noame	Regeerperiode	Nota's
	Karel I Robert	1308-1342	Zeune van Charles Martel van Anjou
	Lodewyk I (de Grôotn)	1342-1382	Zeune van Karel I Robert van Hongareye en Elisabeth van Pooln
	Maria van Hongareye	1382-1385	Zyn dochter, ze trouwde mè Sigismund van Luxemburg
	Karel II	1385-1386	Ook keunienk van Noapels
	Maria van Hongareye	1386-1395	Van 1387 tegoare met heur vint Sigismund van Luxemburg

Keuniengn van Pooln van et Huus Capet-Anjou

Portreit	Noame	Regeerperiode	Nota's
	Lodewyk I (de Grôotn)	1370-1382	Zeune van Karel I Robert van Hongareye en van Elisabeth van Pooln, e zuster van Casimir III van Pooln
	Hedwig van Anjou	1384-1399	Dochter van Lodewyk I en Elisabeth van Bosnië; regeerde tegoare met heur vint Władysław II Jagiełło van 1386

Ofbeeldiengn die ier by passn ku je vien in de categorie Capetian House of Anjou van Wikimedia Commons.