Conteye di Lô

Li conteye di Lô, c' est est onk des ût payis do 13inme sieke k' aléve diner des bokets a çou k' a divnou l' Walonreye. Come li Conteye del Braibant eyet l' Dutcheye do Limbork, li Conteye di Lô aveut eto bråmint des teres e çou k' aléve divni l' Flande.

Mape des payis ki vont fé l' Beldjike, e 13inme sieke

Dins l' contêye di Lô, gn a les viyaedjes di Lô et Grand-Lô.

Mwaisse veye

Li mwaisse veye del Conteye di Lô est Hasse.

Istwere

Divant 1480, li conteye va passer al Principåté d' Lidje. Pus tård, ces teres la vont divni a pô près li Province do Limbork bedje, mins les viyaedjes walons del Hesbaye (Rozou-Crinnwik, Bierlô, Grinnveye, Oreye, Lin-so-Djer, Tisse, Hacoû) vont dmorer u rivni dizo minance del Province di Lidje.

On vout ki ça soeye des contes di Lô k' åyénxhe aminé so Lidje, pu so tote li Walonreye, l' ahivaedje del boûkete, k' a-st on no did låvå (beukweit).

Etimolodjeye

Li ptit mot "lô" (on vî vî mot e walon) provént do tîxhon lauha ki vout dire "bwès". Mins ça a stî stindou å sinse "clairisse", pu "hé a brouwire". Li mot si rtrouve dins bråmint des viyaedjes di Flande: Lo e l' arondixhmint d' Dismude, li bwès d' Lo, dé Lovén, k' a dné li no des viyaedjes astok: Kessel-Lo, Korbeek-Lo, Langelo, Bovenlo, Lo-Christi et Lo-ten-Hule e l' arondixhmint d' Gant. El Walonreye, on l' ritrouve dins l' no des viyaedjes di Bierlô, et Pondlô. Inte les deus, gn a li foirt rilomé "Waterlô".

Li "Z" k' i gn a e mot francès Looz et ni "N" do mot flamind Borgloon est on sene do pluriyal (Carnoy, 1948). Dabôrd, li sinse est "ezès bwès". E walon, li scrijha "ooz" a stî rcoprin come li betchfessî "ô", come dins Trooz , li vî scrijha po "Trô".

Nos d' famile

Sacwants no d' familes di Walonreye et d' Flande, volnut dire "onk ki provént do viyaedje u del Conteye di Lô": Lau, Loos, Loose, Looz, Looze, Delooz, de Looz-Corswarem (riloukîz a: Cwareme), Deloz, Deloos, Deleau, Delleau, Delleaux, Loosen, Loossens, Loozen, Loisen (Herbillon & Germain, 1996).

Vey eto

• Djivêye des Contes di Lô