Motî do Condroz namurwès

Li Motî do Condroz namurwès, kel tite, et francès, c' est "Langue Wallonne en Condroz namurois", c' est on gros spès live, di dpus d' 800 pådjes, e deus volumes, sicrît pa André Vellande, ey eplaidî ås Edicions Azimuts e 2009.

Li "Motî do Condroz namurwès" sieve di sourdant pol Wiccionaire

Coviete

Gn a dvins :

• Tome I (453 pådjes) avou a pô près 10.000 mots walons et 500 ratourneures.
  • on motî walon-francès
• Tome II (422 p.)
  • 803 spots et dijhêyes, avou èn indecse di tinmes, et èn ôte indecse des mots ki rivnèt dvins.
  • 15 fåves da Lafontinne, ratournêyes e walon.
  • on motî francès-walon avou come 13.000 mots.

Li stindêye ricovrowe på diccionairî esteut sol Principåté d' Lidje, mins djusse astok del conteye di Nameur, sol Condroz et sol Fåmene; did la, li ritchesse do motlî.

Il a rexhou a 200 egzimplaires, ey esse rade sipoujhî.

Il est rprins sol limero [C60] dins l' djivêye des motîs do walon.

Ovraedje do diccionairî

L' adierçaedje do motî a duré 17 ans (1992-2009), aprume avou des foyous, après so programe éndjolike.

Li diccionairî a rmetou tos les mots k' i cnoxheut d' els aveur oyou, u k' il aveut rescontré dins des gazetes e walon (Li Chwès et ki lyi shonnént ahessåve. Adon, i n' shût nén les piceures des diyalectolodjisses. I n' a nén nerén stî rapexhî des mots dins des scrijhaedjes.

André Vellande fourit-st araedjî po trover li djusse mot francès po ratourner les mots walons, ey insi, diswalper les diferins sinses. Dins les spots, il esplike li prumî et l' deujhinme sinse, mins eto li cotoû d' etrevén k' on-z î dit ci spot la.

I n' a pont d' fråzes d' egzimpes divins. Mins pacô, i repete li definixha do mot e francès (loukîz a pèchon).

Sacwants bokets do live

• gorea : Li sinsyince do mot est pus diswalpêye ki dins bråmint des motîs : i revoye ås mots francès "collier", mins eto "tribart", "joug" et "converseau".

• dj’a sepou tot, do fi disk’ a l’ aweye : dj' a sepou les ca et les ma.

• i brait avou s' tutute e s' mwin.

• cwand on-z a peu des ronxhes, (ou des spenes), on n' va nén å bwès

Alére

• Bernard Louis : "Les diccionaires po l’ walon d’ Nameur : Co onk. On pout bén souner les clokes !", , Li Rantoele l° 53, Boune såjhon 2010.

Hårdêye difoûtrinne

• Sacwants pådjes do motî
• Egzimpes di spots
• Li tchinne et l' cladjot, da Lafontinne
  • Mwaisse modêye
  • e rfondou