汉字简化方案

《漢字簡化方案》，是1950年代中華人民共和國國務院公布個漢字簡化個規範，是中華人民共和國漢字改革個主要內容之一^[1]。因為後些來又出現第二次漢字簡化方案，故咾迭隻改革方案貤叫第一次漢字簡化方案。1986年，伊畀《簡化字總表》取代脫。

結構

1956年公佈個《漢字簡化方案》

《漢字簡化方案》一共有三部分，分別是：

1. 第一部分〈漢字簡化第一表〉，共收230隻簡化字，1956年2月1號開始全面推行；
2. 第二部分〈漢字簡化第二表〉，共收285隻簡化字；
3. 第三部分〈漢字偏旁簡化表〉，共收54隻簡化偏旁。

〈漢字簡化第二表〉搭〈漢字偏旁簡化表〉是「公布試用」，向各地政協委員徵求意見以後先做些修正，再正式分批推行。

第一表搭第二表個簡化字加起來總共515隻。

方案個推行

1956年到1959年，《漢字簡化方案》個簡化字，分四批來勒印刷物丄正式推行，總共517個簡化字，箇當中第一表搭第二表個簡化字有487隻，還有30隻類推簡化字：

• 1956年2月1號，推行第一批簡化字，共260隻。（包括第一表230隻簡化字，搭仔30隻類推簡化字。當中「鐵」「觀」「覺」「證」四字簡化成「鉄」「覌」「覚」「証」，到第四批推行個辰光纔簡化偏旁部首。）
• 1956年6月1號，推行第二批簡化字，共95隻。（「臨」簡化成「」，8年以後個《簡化字總表》丄改成「臨」。）
• 1958年5月15號，推行第三批簡化字，共70隻。
• 1959年7月15號，推行第四批簡化字，共92隻，並規定簡化偏旁來勒出版物上「陸續推行」，弗再分批公布。（方案里向，「鍾」本來只是「鐘」個簡化字，第四批推行個辰光兼作「鍾」個簡化字。方案本來拿「婁嘍」簡化成「婁」，「徹澈」簡化成「徹」，「倉艙」簡化成「倉」，來勒第四批推行個辰光又拆開來哉。）