上海延安高架路

上海延安高架路（英语：Yan'an Elevated Road^[1]），是上海个一条东西走向个高架快速路，西起虹桥机场，东到外滩，全长15公里，分三段建设，三段工程横穿市区^[2]，全线基本沿牢延安西路、延安中路搭延安东路修建，为高架及地面辅道形式，高架路为双向四车道，设计时速80公里。有匝道通往延安东路隧道。

绿色粗线条显示延安高架路勒上海市个位置

浦西城区，图片下方个道路为延安高架路

历史

西段

西段个主要功能是沟通起虹桥国际机场交内环高架路，服务虹桥开发区商务人士以及古北新区居民，全长6.2公里，全线配置上下匝道四对，路宽25.5米，设双向6车道，并有进入机场个专用匝道。地面双向8车道。勒1995年11月28号动工，1996年12月2号建成。后改建主线直通G50高速公路。

中段

中段是三段工程中顶晏建成通车个，其作用是连接南北高架路交内环高架路，全长5.56公里，高架为双向6车道，标准宽度为25.5米。道路设计车速为60公里/小时，共设5对匝道。勒1999年9月通车。

东段

东段西起南北高架路，东至外滩，长3.06公里。东段全线有匝道13条，搭西段、中段一淘沟通起虹桥国际机场以及外滩，勒迭一段高架道路浪行驶，好望著交关城市地标，邪气壮观。外加，东段有匝道连接起高架道路搭延安东路隧道，沟通起黄浦江两岸，也是城市中顶重要个车辆过江通道之一。

亚洲第一弯

延安高架路东段原压末一只下匝道便是拐入中山东一路外滩个高架终点，由于车辆行驶勒个下匝道个辰光好饱览浦江风光，同时迭段高架勒地面浪看起来气势恢弘，素有“亚洲第一弯”美称。

2008年2月23日，为配合外滩通道修建，同时改善外滩景观，延安路高架紫金路以东段封脱，同时拆脱亚洲第一弯。2008年6月6日，该下匝道完全畀拆脱。^[3]

2009年12月1号，新个外滩中山东一（二）路匝道开始启用。^[4]

龙柱传说

延安路高架搭南北高架交汇处，由一根巨大个圆形柱支撑。弗同于其他支撑结构，迭根柱周围包裹著白钢并有用黄铜锻造个祥龙腾云图案。相传90年代建造个辰光，迭一根顶主要个柱子个地基，打桩柱摇摆弗准，无论如何也打弗准预定个位置，而且连续打断脱七根柱。后首来有人怀疑是动到了风水，乃末请来当时玉佛寺个真禅法师。真禅法师带牢弟子连续念了三天经文，并主持了祭祀仪式，后首来个施工果然无比顺利。真禅法师提醒讲，上海个地下有一条龙，迭一根桩齐巧打勒拉龙背紫金路，告咾建造完成后，必须七天勒柱子周围包覆银底金龙个图案。由于道破个天机，乃末真禅法师勒几日后无疾而圆寂。虽然上海政府官方朆承认歇有请高僧念经祭祀，但是迭只故事勒上海当地人里向流传邪广^[5]。

事实浪，个个龙柱个装饰系上海油画雕塑院个赵志荣为建设方设计，原因是防止驾驶员因为该超大立柱带来个心理暗示导致交通事故^[6]；至于打弗进桩基作兴搭当时柱子建设勒杜月笙公馆旧址浪搭界，让地下条件比较复杂，而且布桩密度忒高，加大桩体个摩擦系数，打桩个难度大大增加。^[6][7]

上下匝道及沿线立交

• 虹桥机场连接线
• 外环高速沪渝高速立交
• 外环高速匝道（外滩方向上、虹桥机场方向下）
• 虹许路匝道（双向上下）
• 娄山关路匝道（外滩方向上，虹桥机场方向下）
• 内环延安西路立交
• 凯旋路匝道（外滩方向上、虹桥机场方向下）
• 江苏路匝道（外滩方向上、虹桥机场方向下；番禺路虹桥机场方向上，武夷路外滩方向下）
• 华山路匝道（外滩方向上、虹桥机场方向下）
• 茂名南（北）路匝道（外滩方向下、虹桥机场方向上）
• 瑞金一路（石门一路）匝道（外滩方向上、虹桥机场方向下）
• 延安东路立交
• 西藏中（南）路匝道（外滩方向下、虹桥机场方向上）
• 福建中（南）路匝道（外滩方向下、虹桥机场方向上）（可通往延安东路隧道）
• 中山东一（二）路匝道（外滩方向下、虹桥机场方向上）（连接外滩隧道）