东方有线

东方有线网络有限公司，简称东方有线，前身是上海有线电视台网络部，成立拉1998年，乃朝是中国有线网络中个基础网络运营商之一，提供有线网络服务。^[1]

历史

有线电视台时期

老底子上海有线电视台个线箱，线箱丄标仔上海有线电视台个台标

1980年代，上海有线电视发展迅速，几乎每家每户侪去装有线电视。来勒上海，有线电视主要有两种情况：一是接收、传送无线电视节目，改善电视收看质量，扩大电视有效覆盖面；二是自家寻辰光放录像或者自制个节目。因为交关社区、企业个有线电视是自建自管个自发状态，节目格调低、质量推板、设计施工队伍素质高高低低，呒没统一规格，呒没验收制度，技术故障多、线路建设缺乏长远规划，线路架设、播出设施个建设各自为政，啥指标侪呒没统一咾啥个交关问题，畀全上海有线电视联网造成交关大个困难。因之，1990年11月份搭仔1991年4月份，上海市广播电视局先后转发广播电影电视部个《有线电视管理暂行办法》、《〈有线电视管理暂行办法〉实施细则》，建立上海市有线电视台筹备小组、制订《上海市有线电视技术规划》、《上海市有线电视设计、安装、施工、验收、管理暂行规定》，整顿设计施工单位，审核认定有线电视台，发放许可证，强化节目管理，创办、发行《有线电视报》，上海有线电视开始健康协调发展^[2]。

1992年10月26号，广电部地方司批复同意建立上海有线电视台。11月26号，上海有线电视台开始试播，12月26号正式开播。开播初期，上海有线台拢总有10只频道，当中9只转播中国中央电视台、上海电视台、云南、贵州、四川、西藏电视台；自办1套综合节目。1993年7月1号开播信息频道，同年12月12号开播体育频道（乃朝上海广播电视台五星体育频道）^[2]。

1998年2月4号，崇明县（乃朝崇明区）开通有线电视网络，标志全上海侪实现有线电视联网^[3]。

撤销前，上海有线电视台拢总有6套自办节目。2001年7月1号，上海有线电视台建制撤销，有关人员并进上海电视台^[4]，电视频道变成功上海电视台、上海东方电视台所有（乃朝侪是上海广播电视台下头个节目哉）。6套自办节目分别是：

• 上海有线一台：乃朝上海广播电视台东方影视频道
• 上海有线二台：乃朝上海广播电视台第一财经频道
• 上海有线三台：乃朝上海广播电视台五星体育频道
• 上海有线四台：乃朝上海外语频道
• 上海有线五台：乃朝东方购物频道（一套）
• 上海有线六台：乃朝上海广播电视台纪实人文频道

网台分离后

• 1998年，上海有线电视台实行“网台分离”，上海有线电视台网络部改制成上海市有线网络有限公司，由上海有线电视台控股^[3]。
• 1999年，根据国务院82号文，上海畀确定是国内顶早个“三网融合”试点城市。同年有线通宽带业务正式进入市场。^[5]
• 2001年，推出全国头一只付费电视服务
• 2002年，有线电视信号覆盖上海远郊乡村。
• 2003年，公司改成功现在个只名字。
• 2005年，启动数字电视整体转换试点。^[6]
• 2007年，完成崇明村村通工程。
• 2008年，推出互动电视、高清电视服务。
• 2009年，来勒上海率先建设中国下一代广播电视网。^[7][8]
• 2011年，完成郊区网络整合^[9]。
• 2019年，上海联和投资有限公司所属上海市信息投资股份有限公司转让2%股份畀SMG个东方明珠新媒体，东方明珠对东方有线个持股涨到51%，东方有线成为SMG搭东方明珠个并表公司。
• 2022年9月，中国广电帮上海文广集团（SMG）、东方有线帮中国移动上海公司分别签订战略合作协议，中国广电来勒上海通过东方有线开展5G移动通信业务^[10][11]。