中远两湾城

中远两湾城，勒拉中华人民共和国上海市普陀区宜川路街道，是只大型居住区，也是上海内环线里向规模顶大个居住区^[1]。中远两湾城占地49.5万平方米，总建筑面积160万平方米，居民楼96栋，居住户数约1万多户，居住人口超过3万人^[2][3]。

内环高架左面是中远两湾城

历史

老底子两湾一宅地区个卫星图（1966年）

中远两湾城本来是两湾（潘家湾、潭子湾）一宅（王家宅），勒拉中山北路南面、苏州河以北、恒丰路斜拉桥以西、光复西路以东，总占地面积49.5公顷，是上海内环线内顶大、顶集中个棚户区。棚户区里向住拉一万多户居民，一百多家企事业单位，人口密度高，配套设施推板，环境污染严重^[1]。

1998年，“两湾一宅”排进上海市区“365”危棚简屋改造范围里向。同年6月25号，普陀区政府同中远（上海）置业发展有限公司签订合作开发协议，中远置业公司投进去改造资金66.6亿元。8月10号，前期动迁工作开始。整个动迁分成功三期，第一期动迁王家宅，第二期动迁潭子湾，第三期动迁潘家湾，拆仔10个号头，是上海历史浪动迁投资顶大、面积顶大、人口密度顶高个一趟动迁^[4][1]。

拆脱以后，中远（上海）置业发展有限公司勒拉“两湾一宅”个埭开发“中远两湾城”，总建筑面积160万平方米，拢总分四期开发。1999年7月，一期工程开工建设^[1]。2006年2月，中远两湾城全面竣工^[2]。