中兴镇（上海市）

中興鎮，是上海市崇明區下頭隻鎮，勒垃崇明區東部，東面是陳家鎮，南面長江南支，西接向化鎮，北面是新海鎮個上海市崇明現代農業園區，面積45.54平方公里，戶籍人口3.07萬人（2008年）。鎮人民政府設勒廣福路42號。

歷史

民國18年（1929年），汲浜鄉成立，國民政府江蘇省崇明縣第四區區公所曾設勒箇地方。1949年6月份，崇明解放，建立鄉人民政府。1950年4月份，汲浜鄉拆出七滧鄉、汲浜鄉、北興鄉來。1950年11月份，七滧鄉、汲浜鄉、北興鄉分成七滧鄉、滧中鄉、汲浜鄉、新興鄉、北興鄉。

1957年9月份，老底子向化區個滧中鄉、汲浜鄉合併建立汲浜鄉。1958年9月份，成立汲浜人民公社。1959年1月份到1959年6月份，向化、汲浜兩隻公社合併建立向化人民公社。1959年6月份，向化人民公社拆分成向化、汲浜兩隻人民公社。1984年，汲浜人民公社改成汲浜鄉。1995年4月份，汲浜鄉撤銷，改名中興鎮。