五四运动

五四运动，是中国近代史上个一次学生运动。1919年5月4号，北京个学生仔进行游行示威，抗议巴黎和会浪有关山东问题个决议，敦促伊个辰光个北洋政府覅签订相关条约，要求惩治相关官员。事体个一开始，是中国作为第一次世界大战个战胜国，期待“公理战胜强权”^[1]，好乘枪势里拿战败国德国勒拉山东个权益收转来，必过参会各国决定拿权益转让畀日本，激起中国老百姓个民族情绪，学生仔喊“外争主权，内除国贼”^[2]，上街游行，火烧赵家楼、痛打章宗祥。“五四运动”一般性还包括5月4号以后全国一系列个游行示威、罢课、罢市、罢工咾啥个，包括工商界参与个六三运动。阿末，曹汝霖、章宗祥、陆宗舆咾啥个亲日派官员个职务畀北洋政府撤脱，中国代表团勒拉6月28号拒绝勒拉《凡尔赛条约》浪签字^[3]。