冷战

冷戰(英文:Cold War，俄文：Холодная война）是第二次世界大戰完結之後，立在美國搭蘇聯兩個超級大國個對立當中，所造成個長期對立事體。迭個戰爭弗通過公開開戰進行，是通過暗地當中個對峙，扶持自家勢力，進行此消彼長個爭奪勢力範圍，來達到稱霸並消滅對方個目的。冷戰一般畀人認為從1948年柏林危機開始，一直持續到1980年代挨末辰光個東歐劇變搭蘇聯解體。

緣由

立在第二次世界大戰之前，因為自家鼓吹個主張搭西方世界個資本主義嚴重對立，蘇聯就一直搭歐美國家關係邪氣緊張。史大林搞大清洗搭集體農莊，讓蘇聯形象惡劣。同時，蘇聯也搭納粹德國關係曖昧，簽署蠻多條約。1941年之後個蘇德戰爭拿蘇聯搭英國、美國結盟，弗過，伊拉個關係當中，除脫共同要滅脫納粹德國之外，還存在明顯個競爭關係。到1944年，雙方儕開始對納粹德國進行反攻。蘇聯趁迭個機會，從自家個領土開始，一步步吞併東歐地區，並扶持當地個共產黨建立自家掌控個政權。到1945年，蘇聯已經立在到維也納個距離高頭，扶持交關自家勢力。迭個做法，也引發西方國家個恐懼。二戰完結之後，蘇聯拒絕搭美國等國家立在戰後重建或者德國地位問題高頭進行合作，同時，立在東亞地區也擴張自家個勢力。1947年，引發柏林危機，蘇聯為報復聯邦德國個成立，對迭個辰光立在自家勢力範圍包圍下頭個西柏林進行封鎖，之後，美國搭蘇聯個矛盾，就顯山露水哉。迭個事體，也成為之後北大西洋公約組織成立個緣由。1947年，英國首相邱吉爾立在美國個演講當中提到一條橫貫歐亞大陸個鐵幕，迭個講法，也畀人當成冷戰開始個基準點之一。