北海道
From Wikipedia, the free encyclopedia
Remove ads
北海道（日文：北海道／ほっかいどう Hokkaidō）是日本頂北面隻一級行政區，也是日本乃朝唯一用「道」起名字個行政區劃，更加是全日本面積頂頂大個一級行政區。道廳所在地（首府）是札幌市。
北海道亦可以指箇個行政區勒拉個島，北海道本島。伊搭本州島、四國島、九州島一道畀叫作日本本土四大島，面積有77,983.92平方公里，是日本面積第二大島[1]，也是世界面積第21大個島。
北海道有拉日本四分之一個農地，是日本糧食、蔬菜個重要基地[2]。
地名個由來
北海道浪個原住民阿伊努語曾經叫北海道、庫頁島、千島群島箇些阿伊努人住個地方阿伊努茅希利（阿伊努語假名：アィヌモシㇼ，轉寫：Aynu-mosir），意思是人類住個地方。
大和人叫阿伊努人為蝦夷，所以叫北海道蝦夷地。開拓使成立以後，曾有北加伊道、海北道、海東道、日高見道、東北道、千島道等六個方案。阿末，政府決定模仿律令制時代五畿七道里向個東海道、南海道、西海道，將「加伊」（かい/カイ、kai）改成同音個「海」，拿地名改成北海道[3][4]:4。
地理
北海道勒拉日本個北面，南面搭本州島隔了個津輕海峽，北面搭庫頁島隔了個宗谷海峽，西面是日本海，東面是鄂霍次克海、千島群島搭太平洋。北海道本島個面積有77,983.92平方公里，是日本面積第二大個島。
北海道長來像個菱形。從中心來看，日高山脈往南，石狩山地向東，北見山地、天鹽山地向北，夕張山地向西，當中石狩山地個地勢頂頂高，有北海道個最高峰旭岳（海拔2,219米）[5]。山當中個是富良野盆地、上川盆地、名寄盆地等盆地。山個西面是個半島，主要包括渡島半島搭道南山地。勒拉山搭半島當中個石狩低地帶北面到石狩灣，南面到太平洋，是北海道人口頂頂集中個地方。北海道東面個知床半島個山是千島弧個延長[6]。
北海道本島附近有好幾座離島，多數勒拉日本海伊面。主要離島有渡島小島、渡島大島、奧尻島、天賣島、燒尻島、利尻島、禮文島等[7]。
勒拉北海道所有河浜當中，頂頂長、流域面積頂頂大個是石狩川。石狩川長268公里，是日本第三長個河浜，排拉信濃川、利根川後頭；流域面積有14,330平方公里，只比利根川個小，是日本流域面積第二大個河浜[8]，曾經截彎取直過[9]。除脫石狩川，天鹽川[10]、十勝川[11]、釧路川[12]等河浜亦是北海道一級水系當中長度比較長、流域面積比較大個河浜。
北海道亦是日本湖泊多個地方，按照成因好分兩類：一類是火山口湖，譬如阿寒湖、支笏湖、洞爺湖；另外一類是海跡湖，譬如佐呂間湖、網走湖[13]。
氣候
幾乎所有地方儕算溫帶季風氣候，年平均氣溫差弗多5到10度，年均降水量有800至1,800毫米。
Remove ads
歷史
古代歷史
北海道從舊石器時代開始，就有人類活動，主要是現在個阿伊努人個續繩文時代、擦文文化。北海道鄂霍次克海沿岸地區曾經是鄂霍次克文化，必過畀擦文文化同化脫。14世紀以後，北海道進入阿伊努文化。[14]
室町時代開始，大和人到達渡島半島定居[15]。大和人搭阿伊努人之間貿易，但也有衝突。阿末阿伊努人輸脫戰爭，畀完全融進大和人個體系當中[16]。
江戶時代阿末個辰光，隨咾俄羅斯個領土擴張到遠東地區，為仔加強對俄羅斯個防衛，幕府派人探險，對北海道有所了解。
開拓使到二戰
1868年，明治新政府設立箱館府，北海道地區開始勒拉新政府個管理當中[17]。但是，勒拉12月份，舊幕府軍占領五棱郭，控制北海道地區，宣布成立蝦夷共和國，搭新政府軍打仔箱館戰爭，輸脫[18]。
1869年，新政府成立開拓使管理北海道，北海道大規模開發個辰光開始哉[15]。
1882年，開拓使畀廢脫，政府改立函館縣、札幌縣、根室縣等三個縣加上農商務省北海道事業管理局管理北海道[19]。但因為北海道人口分布弗平均，1886年，政府決定廢脫箇些部門，改成由內務省直轄個北海道廳[19]。
隨咾日本參與二戰，日本開始勒拉北海道發展軍工業[19]。二戰當中，雖然北海道是日本國內受空襲少個地區，但勒拉1945年7月份，北海道還是碰著美軍個空襲，室蘭、函館、根室、釧路等城市畀炸來蠻結棍個[19]。
戰後到現在
二戰末期，北海道咾亂個。蘇聯部隊勒拉1945年8月份到仔庫頁島南部搭千島群島，一群難民湧來北海道，亦留下來南千島群島個領土爭端。10月4號，美軍到函館，咾快就到北海道各地，到1954年美軍纔全面撤出北海道[19]。
另一方面，北海道成為因為輸脫戰爭而從海外迴轉到日本個日本人頂頂大個移民目的地之一。1948年，日本政府制定仔北海道綜合開發計劃，象徵北海道進入戰後新個開發階段[19]。
1960年代前，因為有煤炭，北海道是日本個能源基地之一[20]。但勒拉1960年代以後，隨咾石油成為主要能源，北海道個礦業衰弱仔，公共建設搭服務業變成北海道經濟個支柱[19]。
1972年，札幌舉辦仔亞洲頭一趟冬奧會，大幅度提高仔北海道個國際知名度，亦讓北海道個基礎設施建設有仔咾飛躍性大個進步[21]。然而依賴公共投資的經濟模式卻使得北海道的經濟發展勒拉1980年代以後越來越慢，導致人儕跑出去，弗登拉北海道[19]。
人口
增加 7.5 - 10.0 % 5.0 - 7.5 % 2.5 - 5.0 % 0.0 - 2.5 % 減少 0.0 - 2.5 % 2.5 - 5.0 % 5.0 - 7.5 % 7.5 - 10.0 % 10.0 % 以上
北海道是日本人口密度頂頂低個地區，勒拉2014年，每平方公里只有差弗多66人[22]。就人口分布來看，北海道個人口咾多儕勒拉中部個石狩平原。當中札幌市個人口超過190萬，有超過北海道三分之一個人登拉札幌市[22]。
北海道人口減少個主要原因是北海道個低生育率。伊個生育率從1967年開始就比日本平均值低[23]。北海道也是日本生育年齡人口比例低，老齡人口比例高個地區[24]。從1960年代開始，北海道從人口流入地變成人口流出地，箇也是導致北海道人口增長變慢個重要原因[25]。
勒拉少數民族方面，北海道是日本唯一個阿伊努人聚居地。阿伊努人是北海道個原住民，但伊拉畀同化唻蠻結棍個。1873年個辰光，北海道有人口111,196人，當中阿伊努人有16,272人，愛努人當時北海道總人口的14.63%[19]。但現在北海道個阿伊努人只有23,782人[26]。除脫阿伊努人，北海道還有少數畀蘇聯從樺太廳趕過來個鄂羅克人搭尼夫赫人[27]。
Remove ads
行政區劃
2008年6月，北海道議會通過法律，將北海道的14隻支廳改為9隻綜合振興局和5隻振興局[28]。
Remove ads
經濟
2014年，北海道道內生產總值約碼子有184,846億日元[29]。從1980年代開始，北海道個經濟增長率就長期比日本平均水準低[4]:831996年個辰光，北海道個道內生產總值曾有20.9兆日元。但就勒拉第二年，北海道開殖銀行破產事件以後，北海道經濟就長期蕭條[30]。同日本其他地區比，北海道經濟里向製造業占比蠻低個，服務業則有重要個地位[31]。
農業
北海道是日本個糧食基地，有日本全國四分之一個農田[32]。北海道是日本交交關關農產品個頂頂大個產地，包括小麥、大豆、洋山芋、甜菜、蕎麥、洋蔥、南瓜、珍珠米、牛奶、牛肉、輕種馬等[33]，弗過因為北海道面積大，自然條件多樣，箇咾弗同地區個主要農產品也弗一樣。
北海道勒拉寒暖流交匯個地方處，是邪氣嗲個漁場。北海道個漁業早勒拉江戶時期就開始哉，伊個辰光是鯡魚捕撈業[19]:129，現在水產業也有重要個地位。北海道個海面漁業養殖量、生產量、漁業經營體數、漁業從業者數搭漁船數儕好排拉日本第一[34]。
北海道森林覆蓋率有71%，比日本平均水準高[35]，是日本林業蠻發達個地區。
工業
北海道個製造業是從明治時期個官營工廠開始個。較早發展個是造紙廠，鋼鐵、化工、機械等產業也勒拉二戰前有所發展[4]:110。1950年代到1970年代，大規模重化學工業是北海道重要個工業。到20世紀80年代，汽車零部件搭電子產業有所發展[4]。到2014年，北海道工業從業人口超過16萬人，工業品生產額有66,728億日元[36]。
北海道工業個一個特點是，食品、飲料等地方資源型工業個比重大，機械製造等加工組裝型工業比重小[37]，當中食品產業個產值好占北海道工業總產值個三成，是北海道工業體系中規模頂頂大個[38]。
道央地區是北海道重要個工業區，工業產值差弗多有北海道總量個七成[38]；室蘭市是北海道工業產值頂頂高個城市，挨下來是苫小牧市、札幌市、釧路市搭千歲市[38]。
北海道個礦業曾經邪氣發達，煤礦頂頂重要[20]。北海道有石狩煤田、釧路煤田等煤田，煤礦挖掘亦邪氣行[39]。但當石油成為主要能源以後，加浪日本國內煤礦開採成本高，1960年代開始，煤礦陸陸續續一個個關脫[40]。現在北海道只有釧路有一處煤礦還勒拉開採[41][42]。
由於北海道經濟曾長期依賴公共工程，建造業勒拉北海道經濟中亦有一定地位，比重遠比日本平均水平高[43]。
服務業
服務業是北海道經濟頂頂重要個支柱產業。觀光產業勒拉北海道經濟中發揮重要個作用。北海道個較原始個自然景色、冷個夏天搭冬天個雪國景觀等旅遊資源吸引交交關關遊客。2015年，來北海道旅遊個遊客數達到5,477萬人，當中外國人遊客大幅增加[44]。
勒拉商業搭金融業方面，因為北海道是日本頂早開始車社會化個地方，箇咾北海道也比日本其他地區更早進入賣場個大型化、郊外化時代[4]:118。箇亦讓北海道老早要面對市中心商業區衰退個問題。現在北海道政府試圖用補助金搭培育人才等方法，改善市中心空心化個問題[45]。
現在日本個大型企業當中，HOMAC[46]、宜得利家居[47]搭Seicomart[48]儕是從北海道出來個企業。1997年北海道拓殖銀行破產畀北海道金融業帶來個衝擊邪氣大。現在北海道個兩家大個地方銀行是北洋銀行[49]搭北海道銀行[50]。札幌還有札幌證券交易所，幫助北海道當地企業融資[51]。
信息技術產業現在是北海道服務業當中發展比較快個產業，札幌車站北口一帶有交交關關中小科技企業，畀叫「札幌矽谷」（サッポロバレー）[52]；勒拉札幌科技園區，亦有富士通搭日本IBM等大型企業個廠[53]。
Remove ads
文化
阿伊努文化
阿伊努人是北海道個原住民，文化獨特，有當地叫尤加拉個口述文學[54]；有長唻像高腳屋個阿伊努式房子；有排拉聯合國非物質文化遺產里向個古典阿伊努舞蹈[55]；還有用邪氣多油個阿伊努料理等等[56]。拉古代，阿伊努人弗論男女儕有刺青[57]，使用二十進制[4]:20，箇亦是伊拉同其他日本人弗一樣個地方。
必過江戶時代中後期開始，阿伊努文化畀強制同化，加浪阿伊努人嘸沒自家個文字，又碰著阿伊努人人口大幅減少，箇咾阿伊努文化受到邪氣結棍個衝擊，阿伊努語也排拉瀕危語言名單裡向[58][59]。還好，阿伊努文化對北海道個影響大唻野花花，比方講現在北海道絕大多數個地名儕是從阿伊努語裡向來個[60]，加浪日本政府開始立法講要保護阿伊努文化[61]，民間復興阿伊努文化個運動也逐漸活躍起來。
言語
北海道地區個日語言語是北海道方言[62]，東日本方言個一種。北海道方言裡向好再分成沿海地區個海岸部方言（又叫濱言葉，當中函館地區特徵頂明顯）搭仔其他地區個內陸部方言，後者更加接近標準日語[62]。箇是因為北海道是移民社會，箇咾共同交流用個言語接近標準日語，但用詞浪有些弗一樣。典型個一個特徵是用過去時表達尊敬，箇個特點甚至影響日本其他地區個日語[63]。有代表性個詞包括道産子（原指一種馬，現在指北海道人）、サビオ（創口貼）、観楓會（秋天個宴會）、汽車（列車，日本其他地區多用電車表示箇個意思）等[64]。必過箇兩年，大眾媒體個影響，加浪去過道外讀書工作個人增加，讓北海道方言正越來越靠近標準日語。
飲食
北海道是日本重要個農產地，食材豐富，箇咾北海道飲食文化也多樣化。
北海道水產資源豐富，箇咾壽司、蟹肉料理等各類海鮮料理是北海道有代表性個高級料理。北海道個海鮮丼亦種類豐富，當中松前金槍魚三色丼[65]、函館個活烏賊丼[66]、釧路個勝手丼[67]等名氣頂響。
北海道個肉食文化同日本其他地區差別弗小。十勝地區個豬肉蓋飯因用個是有甜味道個醬油燒個，箇咾豬肉甜津津，獨具特色[68]。成吉思汗烤肉是北海道名氣響噹噹個鄉土料理之一[69]。
北海道個日本拉麵文化也邪氣出名[70]。北海道拉麵里向，旭川拉麵（醬油味道）[71]、札幌拉麵[72]、函館拉麵[73]箇三種拉麵頂有代表性。
北海道是日本頂大個乳製品產地區，箇咾用牛奶做個各種點心亦是北海道飲食文化中弗可缺少個一部分。北海道有名個甜品企業有石屋制菓（代表產品是白色戀人[74]）、ROYCE'[75]搭六花亭[76]等。
北海道也是日本頂先開始普及啤酒文化個地區，札幌啤酒是日本四大啤酒企業之一[77]。
因為北海道勒拉過去物流網裡向相對獨立，箇咾交關企業會得生產只勒拉北海道賣個北海道限定品，一部分也變成北海道飲食文化個標誌，比方講瓜拉那飲料[78]搭仔勝源[79]。
媒體
北海道新聞是北海道頂大個地方報紙，前身北海新聞1887年就開始發行哉，1942年，日本政府下令整合北海道11份地方報紙，故咾出現個北海道新聞[80]。乃朝北海道新聞日發行量接近107萬份[81]，是日本規模頂大個地方報紙之一，弗僅勒垃北海道各地方設有支局，還勒垃華盛頓、倫敦等地有駐外記者[82]，對俄羅斯遠東地區個新聞報導比較好。除開北海道新聞，北海道各地也有自家個地方報紙，比方講苫小牧民報、室蘭民報、函館新聞、釧路新聞、十勝毎日新聞咾啥個[83]，讀賣新聞、朝日新聞、毎日新聞、日本經濟新聞等全國性報紙勒垃北海道也有發行。電視方面，日本放送協會（NHK）勒垃北海道有七隻放送局[84]，分別是NHK札幌、NHK函館、NHK旭川、NHK室蘭、NHK帶廣、NHK北見和NHK釧路。此外，北海道還有北海道放送（HBC，JNN聯播網個）[85]、札幌電視台（STV，NNN聯播網個）[86]、北海道電視台（HTB，ANN聯播網個）[87]、北海道文化放送（UHB，FNN聯播網個）[88]、TV北海道（TVh，TXN聯播網個）[89]五家電視台，當中北海道放送、札幌電視台也播出廣播節目。
北海道個特色讓伊成為交關電影電視作品個故事舞台。勒垃北海道拍個出名個日本電影電視劇有《幸福個黃手絹》[90]、《北方個金絲雀》[91]、《風之花園》、《來自北國》[92]、《First Love 初戀》咾啥個。
體育
冬季運動
冬天個寒冷氣候是北海道發展冬季運動個老相好。1972年，札幌市舉辦冬季奧運會[93]，是日本甚至亞洲頭一趟舉辦冬奧會。北海道是日本滑雪場頂多個地方，雪質嶄，吸引交關外國滑雪愛好者[94]。北海道個冬季體育因為地區氣候差異呈現出弗同個地區特徵。西部地區因為雪落唻多，滑雪、跳台滑雪咾啥個雪上運動蠻行個；東部地區因為雪落唻少，冰球、滑冰等冰上運動個參加人蠻多個。日本有交關冬季運動選手儕是北海道人，比方講笠谷幸生[95]、原田雅彥[96]、船木和喜、齊藤浩哉、伊藤有希、高梨沙羅、橋本聖子[97]、長島圭一郎。北海道還有得日本製紙白鶴[98]、王子製紙老鷹[99]兩家職業冰球球隊。
棒球
北海道日本火腿鬥士是日本職棒太平洋聯盟個球隊，主場勒垃ES CON FIELD HOKKAIDO[100]。箇球隊1945年11月6號成立，2004年主場從東京搬到北海道札幌穹頂體育場。後來，球隊拿搬去自家勒垃北廣島市造個ES CON FIELD HOKKAIDO。球隊勒垃北海道個辰光2趟獲得日本一（2006年、2016年）[101]。
其他體育
札幌岡薩多[102]是北海道唯一一支J聯賽球隊[103]，乃朝參加J2聯賽。北海道也行相撲，出身橫綱個人日本頂多，昭和三大橫綱大鵬、北之湖、千代富士儕是北海道人[104]。
Remove ads
教育
北海道大學個主校區勒拉札幌市中心，伊個前身是1876年成立個札幌農學校，勒拉1918年升格為北海道帝國大學，是日本本土七個帝國大學之一，亦是北海道教學研究水準頂頂好個高等學府[105]。北海道大學現在有札幌搭函館兩個校區，12個學院，本科生超過11,000人，碩士生、博士生加拉一道超過6,000人[106]。2010年諾貝爾化學獎得主鈴木章就曾勒拉北海道大學讀書、教書，現在是北海道大學名譽教授[107]。
除脫北海道大學，北海道還有北海道教育大學、室蘭工業大學、小樽商科大學、帶廣畜產大學、旭川醫科大學、北見工業大學六個國立大學[108]搭釧路公立大學等五個公立大學[109]。北海道亦擁有26所私立大學[110]，當中規模比較大個有旭川大學、札幌大學、札幌學院大學、札幌國際大學、北海學園大學、北星學園大學、北海道科學大學、北海道醫療大學。
北海道小學、初中、高中弗少，但因為學生子數量大幅減少，最近十年裡向已經陸陸續續關脫超過四百所道立中小學堂[111]。
Remove ads
觀光
北海道是日本有名個旅遊目的地，北海道介闊個面積讓伊弗同個地區有弗同個旅遊資源同特徵。
道南是北海道里向和人頂早到個場許，箇咾箇面有弗少歷史搭人文景觀。松前城是日本頂北面只，也是北海道唯一一隻日本式城堡[112]。渡島半島西岸個江差町個民俗文化搭歷史景觀邪氣有名氣[113]。道南個中心當然是道南頂大個城函館市。作為日本頂早個港口之一，函館個特色是西洋式建築，比方講有金森紅磚倉庫、舊函館區公會堂[114]。函館山浪看出去個夜景排拉日本三大夜景當中，還畀評拉世界三大夜景里向[115]。函館郊區個大沼公園是道南有名個濕地。
道央地區是北海道遊客頂多個場許。札幌市有北海道廳舊本廳舍、札幌市鐘樓等開拓時代個建築[116]，大通公園是代表性個城市公園[117]。札幌附近個小樽市曾是北海道個門戶，有名個有小樽運河[118]、西洋式建築搭玻璃工藝品[119]。新雪谷地區有北海道頂大個滑雪場搭度假區，邪氣適合戶外體育活動[120]。道央南岸個登別溫泉[121]搭洞爺湖[122]是日本頂有名氣個溫泉度假地之一。
道東地區人也嘸沒幾個，地方邪氣大，觀光資源主要是自然景色。釧路市附近個釧路濕地是日本頂大個濕地，也是日本頂大個丹頂鶴棲息地[123]。釧路地區北面個阿寒摩周國立公園有邪氣多個湖，里向有名個有阿寒湖[124]搭日本透明度頂高個湖摩周湖[125]。野付半島有排拉濕地公約里向個濕地[126]。知床是北海道唯一個世界自然遺產[127]。冬天勒拉鄂霍次克海沿岸個網走市、紋別市好看浮冰[128]。
道北地區南北跨度大。薰衣草同花田有名個富良野市、上富良野町、中富良野町搭美瑛町勒拉道北個南部地區，畀評為「日本頂漂亮個農村」[129]。附近還有北海道頂高個山脈大雪山[130]搭瀑布有名個層雲峽。勒拉日本頂北面個稚內地區有佐呂別原野[131]，宗谷岬個日本頂北面紀念碑亦吸引仔交交關關遊客[132]。稚內附近個利尻島有長唻像富士山個利尻岳，夏天登山個人弗少[133]。禮文島浪有交關稀有個高山植物，畀叫「花之浮島」[134]。
交通
鐵路
- 北海道旅客鐵道（JR北海道）
除脫JR北海道，北海道還有兩家鐵路事業者。函館市企業局交通部經營函館市路面電車業務[135]。札幌市交通局經營札幌市營地鐵[136]搭札幌市電車。
新幹線亦開進仔北海道。北海道新幹線勒拉2016年3月份開通仔新青森到新函館北斗區間[137]，預估2030年末會得從新函館北斗延伸到札幌[138]。
公路
1870年個辰光，北海道已經有得170公里長個公路[4]:74。19世紀末，北海道政府曾修過札幌到網走個公路，必過直到大正年代中期，因為鐵路是北海道交通個主角，公路建設並弗畀政府重視[4]:74。二戰以後，汽車普及，北海道亦豪𢜶開始公路個建設。1971年，千歲到北廣島同札幌到小樽個高速公路通車，是北海道第一條高速公路[4]:78。乃朝公路承擔北海道80%以上個客運量，是北海道交通個核心[139]。乃朝北海道有得道央自動車道、札樽自動車道、道東自動車道三條高速公路[140]。2014年個辰光，北海道有得高規格幹線道路1015公里，箇當中高速公路696公里[141]。
機場
1937年，日本航空輸送株式會社曾開通札幌同羽田間個定期航線，1940年停飛[4]。1951年，日本航空開設千歲機場同羽田機場間個定期航線[142]。1950年代中期開始，北海道各地開始造機場，逐漸形成了以千歲機場為核心個航空網。1988年，新千歲機場開業，北海道又相繼開通海外航線。因為直接通過陸路交通方式去北海道弗便當，故咾空運成為北海道頂重要個聯外交通方式[143]。現在北海道一共有得14座機場[144]，當中新千歲、旭川、函館三座機場有定期個國際航班[145]。
北海道還有Air Do幫北海道空中系統兩家航空公司。Air Do主要經營羽田機場去北海道各機場外加新千歲機場去日本各地個航線[146]，北海道空中系統則經營丘珠機場到利尻機場、釧路機場、函館機場、三澤機場，外加函館機場到奧尻機場、三澤機場個航線[147]。
航運
江戶時代，北海道幫本州島之間通過北前船進行貿易[148]。明治初期，郵船汽船三菱會社一度壟斷北海道海運市場。1882年，共同運輸會社成立，同三菱搶北海道個海運市場。1885年，日本政府下令兩家公司合併成日本郵船會社[4]:74。箇辰光，北海道開通從函館或小樽出發，去北海道其他地方個航線。大正年間，小樽、室蘭、釧路、根室等港開通直達本州島個航線[4]:74。戰後，室蘭港、苫小牧港、釧路港等太平洋沿岸個港口成為日本政府開發重點[4]:77。隨咾航空運輸個發展，貨運取代客運成為海運個主要市場。乃朝北海道有得苫小牧港、室蘭港兩隻特定重要港灣，函館港、小樽港、釧路港等10隻重要港灣外加24隻地方港灣[149]，加勒一道去本州島有得15條定期貨運航線[150]。從貨物進出口量來看，苫小牧港是北海道頂大個港口，後頭是函館港、室蘭港、釧路港、小樽港[151]。客運方面，北海道乃朝有十條去本州島個定期航線，箇當中五條從苫小牧港出發，三條從小樽港出發，兩條從函館港出發。渡輪也是北海道本島幫離島之間重要個交通手段。乃朝北海道本島去奧尻島、天賣島、燒尻島、利尻島、禮文島儕有定期渡輪航線。2011年，往來北海道本島搭離島個定期航線乘客數有得68.3萬[152]。國際航運方面，北海道有去俄羅斯個定期客運航線。[153]。
Remove ads
參考文獻
外部連結
Wikiwand - on
Seamless Wikipedia browsing. On steroids.
Remove ads