卡洛斯三世

卡洛斯三世（西班牙文：Carlos III，1716年1月20號-1788年10月24號），是18世紀西班牙波旁家族個成員，伊是費利佩五世個兒子，也是費利佩五世替伊拉第二個娘子個大兒子。年輕辰光，繼承帕爾瑪公爵個頭銜，嘸幾年，因為歐洲王室協定個原因，畀人家調換領地，成為爻納波利王國搭西西里王國個國王。到1759年，成為西班牙國王，之後一徑統治西班牙到1788年。伊歡喜開明專制，替點別個歐洲國家學習，富國強兵。立在表面浪讓西班牙國力有一定個恢復。弗過在搭英國個各場戰爭裏，還是嘸任何優勢。

Portrait of Charles III by Goya, 1786-1788.

內政方法

卡洛斯三世邪氣歡喜啟蒙裏向開明專制一套把戲，想做個，弗外乎是讓西班牙個教會搭貴族進一步退出現實生活，來讓自家掌握更大個影響力。結果，花頭搞仔蠻多，實際效果並弗如然。

軍事行為

立在七年戰爭當中，伊開始辰光自稱中立，弗過，到1762年，為仔趁火打劫，宣布相幫法國作戰。結果，畀英國人擔伊立在古巴搭菲律賓個要塞統統攻破，灰頭土臉。但因為後首來條約個關係，竟然反過來收回城堡，還獲得爻法國立在北美個大片土地。迭然伊愈加自我膨脹。到1776年，美國獨立戰爭開始之後，伊貤追隨自家在巴黎個親眷，搭美國結盟，對抗英國。伊派軍隊對英國在自家境內個直布羅陀要塞進行圍攻，弗過，結果比上趟還要推板，圍攻爻一年多，自家傷亡慘重，就是打弗下來。但搭上趟也一樣，因為巴黎條約個關係，竟然貤收回爻英國人佔領個地中海島嶼。蓋咾反倒讓伊立在西班牙本土獲得爻蠻高個聲望。

繼任者

• 卡洛斯四世