同盟國（第二次世界大戰）

同盟国，也叫反法西斯同盟，是第二次世界大战爆发过后，部分国家（阿末有57个，当中5个从轴心国脱离）为仔抵抗轴心国个侵略组成个联盟，也是搭轴心国对立个阵营。同盟国组成搭参加盟军个国家大多数是因为受著轴心国个武力侵略，或者是生怕轴心国会得控制整个世界。^[1]

同盟国（第二次世界大战）

最早开始打仗个辰光（1939年9月1日），反德同盟包括仔法国、波兰搭英国，呒没几化辰光英国个自治领（澳大利亚、加拿大、纽西兰、纽芬兰自治领搭南非联邦）^[2]侪加入仔同盟。1941年珍珠港事变过后，美国搭中国加入同盟国。同时辰光，1941年过后英联邦、美国搭苏联个领导人畀大家叫“三巨头”，做仔同盟国个领导角色^[3]。从1937年个卢沟桥事变开始，中国就一直勒搭日本打仗，勒个歇辰光也是重要个盟友，中国战场浪牵制仔大部分日本陆军，还参加仔缅甸战场帮英军个忙^[4][5]。中国搭三巨头（英国、美国、苏联）畀美国总统富兰克林·德拉诺·罗斯福叫“世界权力个托管人”，后歇来叫同盟国个“四警察”或者“四大国”^[6][7]。苏美英中四大国顶早勒《联合国共同宣言》浪签字，^[8]后歇来勒1943年个莫斯科会议颁布个《四国普遍安全宣言》里向“四大国”地位得著进一步确认^[9]。其他盟国包括比利时、巴西、捷克斯洛伐克、埃塞俄比亚、希腊王国、英属印度、墨西哥、荷兰、挪威搭南斯拉夫等。^[10]

勒1941年12月，美国总统罗斯福帮同盟国设计仔一个名字，叫“联合国”。后歇来勒1942年1月1号签个《联合国共同宣言》，成为仔现代联合国个基础。^[11]勒1945年7月个波茨坦会议浪，罗斯福个接班人哈里·S·杜鲁门总统向中、法、苏、英、美个外长提出来各国应该“商量一只和平条约搭欧洲国家边界个解决方法”，就此让外长理事会建立起来。