后金

後金（滿洲語：ᠠᠮᠠᡤᠠ ᠠᡳᠰᡳᠨ ᡤᡠᡵᡠᠨ）是出身建州女真個酋長努爾哈赤垃拉滿洲（現今中國東北）建立個國家，是後頭清朝個前身。明朝萬曆四十四年（1616年），努爾哈赤垃拉赫圖阿拉自稱汗，國號「大金」，史稱「後金」或「金」，史學界一般統稱為「後金」，搭12至13世紀個金朝區別開來。到伊兒子個皇太極辰光，1636年改國號叫大清，後金共有21年，兩位君主。

一六一六年個東亞地圖 東北部為後金

歷史

建國

後金是一系列通古斯部落個整合體，來勒金國畀蒙古帝國滅脫之後，漢化程度比較高個女真人儕畀劃分到漢人里向，成為元朝辰光帝國個第三等人。登勒東北亞個未開化女真人迅速回到老早個漁獵狀態。到明帝國北進到東北亞個辰光，伊拉接受來自南面個遙控統治。

明帝國對待女真人態度，搭伊拉對待別個民族一樣。採取打壓分化個方式。讓伊拉接受統治。到1590年代後，明帝國來勒遼東個統治開始減弱，畀著努爾哈赤機會。伊通過多場戰爭，先後兼併交關女真人部落。到1616年，開始正式反對明帝國個統治。自稱天命汗，建立「繼承」金國個國家「金」。後金因此誕生。

入遼搭薩爾滸大戰

努爾哈赤建立後金後，迅速搭明朝開始戰爭。先後攻破鐵嶺等地方。因為這些地方有交關官員老早搭伊有交情。所以老快就攻佔遼東邊牆附近。讓明朝覺着必須重視。到1618年，明帝國調集整個國內個軍隊，開始對後金進行掃蕩。弗過，明帝國個軍事布置有問題，四路大軍儕相互又沒有統一部署。讓努爾哈赤來勒薩爾滸各個擊破。最終慘敗。這場戰爭之後，後金軍隊進入遼東，就沒人好抵擋哉。

對峙搭皇太極即位

努爾哈赤個攻勢來勒寧遠城受到阻擋。袁崇煥採用大炮轟擊個戰術，讓後金騎兵個優勢沒辦法發揮。同時，明帝國又利用蒙古部落對後金個側翼進行騷擾。讓伊拉沒辦法完全投入攻擊明帝國個進攻當中。努爾哈赤只好先去解決蒙古問題。但從蒙古東歸個路高頭，伊就舊傷復發，沒過多少辰光就死脫哉。之後，伊個兒子皇太極（滿文：Hong Taiji）登基，成為後金個第二位可汗。 皇太極登基之後，採取交關方法改造後金個軍政結構，讓後金開始有封建國家個樣範。