大柏树

大柏樹，是上海市虹口區東北部到楊浦區西北部個一隻地名，一般性指逸仙路、汶水東路、中山北一路、曲陽路、邯鄲路五條馬路交匯個五岔路口一帶。

雍正2年（1724年），大柏樹地區划進寶山。直到20世紀初，大柏樹附近還是農田。1928年後，當地隨江灣鎮一道進入上海特別市，逐漸發展。1937年抗戰爆發，箇面變成上海城北個軍事要地。淞滬會戰結束後，日軍起碉堡，以1932年死拉江灣鎮個大日本帝國第9師團聯隊長林大八個名字命名，叫箇個地方大八辻（「大八路口」個意思）。因為箇只辻字是和製漢字，所以當地中國居民叫伊大八寺或者大八字。

抗戰勝利後，上海市政府認定「大八寺」是敵性地名，曾下令改叫「逸仙路」，嘸沒成功。1984年，上海市政府拿當地划進虹口區、楊浦區，第二年虹口區部分搞了只大八寺街道辦事處。箇個辰光，弗少人反映大八寺是日本佔領軍留下來個名字，故咾勒拉1988年，大八寺街道改名成運光新村街道。1989年3月20號，上海市人民政府發布通知（滬府辦［1989］45號），叫大家拿所有同大八寺相關個地名、店名、站牌名儕按照上海閒話諧音改成「大柏樹」。

1993年，運光新村街道合併進曲陽路街道。

外部資料

• 上海市人民政府辦公廳關於本市第九批道路、居民地命名、更名問題的通知（摘編）檔案，存勒互聯網檔案館當中。（2019年4月20號）
• 虹口區志·曲陽路街道檔案，存勒互聯網檔案館當中。（2016年3月26號）