孔子

孔子——是春秋戰國人物（生勒前552年|死勒前479年），姓孔^[1]，名丘，字仲尼，魯（依家山東個曲阜）人，中國春秋末期個思想家搭仔教育家。伊是由漢代起中華文化個主流學說儒家創始人，孔子同儒家思想對古代中國搭周圍國家有深遠個影響，後世尊稱伊為萬世師表^[2][3][4][5]。

孔子像

成就

《春秋》、《論語》等是了解伊本人思想個主要著作。

整理編修古籍

• 傳說講，孔子寫《春秋》（《孟子·滕文公下》：「孔子作春秋而亂臣賊子懼」）。《春秋》箇本書寫個辰光（前722年到前481年）就叫春秋時期。
• 孔子個弟子搭再傳弟子拿伊個學說編輯成《論語》，是研究孔子思想個主要文獻。
• 漢朝定型個《禮記》裡向也寫仔孔子個思想（比方講《大學》搭《中庸》），貤有記錄伊思想個《孔子家語》，傳統浪認為是假個，但是最近逐漸畀重視。
• 南宋個辰光，朱熹拿《論語》搭《禮記》裡個《大學》、《中庸》兩篇文章同反映亞聖孟子思想個《孟子》合拉一道寫字《四書集注》，箇就是四書。
• 四書搭《詩》（詩經）、《書》（尚書）、《禮》（禮記）、《易》（易經）、《春秋》箇五本書一道叫「四書五經」，是儒家學說個核心經典。
• 講是，孔子刪詩書，定禮樂，贊周易，作春秋。

三千弟子搭七十二位精通六藝個弟子

古代尊師-孔子畫像

照《史記》寫個，孔子有三千弟子，當中精通六藝個有七十二個人，叫「七十二賢人」。

孔子死脫以後，「七十子之徒散游諸侯，大者為師傅卿相，小者友教士大夫。」箇能介也就勒拉政治浪打破仔貴族壟斷個世卿世祿制，為專制君主自由任免布衣官員個官僚體制創造條件。