张士诚

張士誠（1321年－1367年），元末個起義軍領袖跟地方割據勢力之一。泰州白駒場（今朝江蘇省大豐市）人；勒元朝末年抗元起義領袖當中，有「友諒最桀，士誠最富」之說。死脫過後葬勒吳縣斜塘。

生平

張士誠小名叫九四，本身是個運鹽工，因為弗願畀鹽官壓迫，在正十三年（1353年）搭俚個兄弟張士義、張士德、張士信還有鹽販李伯升等十八個人起兵反元，弗久就攻下泰州、興化、高郵等江北重鎮。十四年正月（1354年）勒高郵建國，國號大周，自稱誠王，以天祐為年號。

至正十四年（1354年）九月，元太師右丞相脫脫領重兵南下攻高郵，十一月，勒城外打敗張士誠軍，張士誠退進城中固守。十二月，元軍攻占外城。勒搿個危急個辰光，元順帝聽信讒言，解除之脫脫個兵權，臨陣換將，元軍軍心渙散。張士誠軍趁機反擊，打敗元軍。至正十六年（1355年）張士誠繼續往南發展，攻入平江路（今朝蘇州市）改平江路為隆平府。至正十七年（1357年）元朝江浙行省平章達識帖睦邇派楊完者打張士誠，張士誠因為面臨畀元軍搭方國珍夾擊個情況就投降元朝哉，畀渠封為太尉。至正十八年（1358年），採取分化策略，搭達識帖睦邇聯合，起兵攻打楊完者，楊完者自殺。

張士誠乘朱元璋搭陳友諒大戰個機會，勢力弗斷擴張，北到徐州、南到紹興個割據實力，擁兵幾十萬；並且幾次運糧十幾萬石到大都（北京）。二十三年（1363年）三月，派呂珍去打安豐個紅巾軍劉福通部，逼得劉福通搭韓林兒投靠朱元璋。九月，張士誠自稱吳王，以俚個兄弟張士信為丞相，用黃敬夫、蔡彥文、葉德新三人為參軍，弗再歸順元朝；第二年，朱元璋也稱「吳王」；著名小說《三國演義》個作者羅貫中也勒張士誠處任職。

張士誠搭朱元璋個勢力弗斷交戰，張部以漁鹽近海交通個便利，還有日本倭寇力量暗中支持，明朝建立以後實施「海禁政策」也搭迭個有交關大個關係。朱元璋以「先取通泰諸郡縣，剪士誠肘翼，然後專取浙西」個辦法一步步削弱張士誠；勒朱元璋消滅脫陳友諒之後，至正二十五年（1366年）朱元璋開始對張士誠個勢力進攻，張士誠個兄弟張士德幾次打敗明軍，可惜個是張士德個馬發狂，畀徐達前鋒趙德勝抓牢，勒金陵絕食而死，張士誠力量大失；至正二十六年（1367年）十二月包圍張士誠所居個平江；九月平江城攻破，張士誠畀渠捉牢，後來押到應天（今南京），俚想自殺，畀部將救下來哉。勒押往應天個船浪，明史記載俚「至金陵，竟自縊死，年四十七。命具棺葬之。」

張士誠有養子「五太子」，投降朱元璋。

目前蘇州市斜塘鎮有張士誠墓。

評價

張士誠死後勒民間受到懷念，搭元朝官兵，寶慶府楊完者軍隊個混亂個軍紀相比，蘇州、秀州、杭州等地有「生不謝寶慶楊，死不怨泰州張」個俗語。每逢七月三十張士誠個生日，蘇州、杭州等地每家人家門口頭儕會扎草龍，燒九四香（張士誠小名九四）來紀念俚。一直到中華人民共和國成立以後，再逐漸停止。

維基共享資源里向尋得著搭該篇文章搭界個多媒體資源：

張士誠