御桥

御橋是中華人民共和國上海市浦東新區北蔡鎮一個地名。箇隻地名從明朝萬曆三年（1575年）造個石橋御界橋。御界橋一開始叫逾界橋，後些來改叫御界橋，阿末簡稱御橋。箇座橋據說是當地鄉紳沈欽主持建造個，也有講迭座橋跟抵禦倭寇有關係，有一趟當地鄉民來勒小腰涇幫咸塘交匯處消滅脫倭寇，造座橋紀念。^[1]清朝同治年間，當地鄉紳吳景清提議重修御橋。清朝光緒二十二年（1896年），當地人決定拓寬迭座橋，從原先個6塊橋面石改成9塊橋面石，長16.3米，寬1.6米，一跨6米。故咾御橋周邊有條小路叫御橋老街。御橋當地有滬南路搭仔御橋地鐵站。^[2]