教宗

敎宗（拉丁文：papa）是羅馬主教，同時為普世天主教會領袖搭梵蒂岡城國元首，傳統浪畀人認為是聖伯多祿宗徒之位個後繼者。天主教會使用「敎宗」為漢語譯名，漢字文化圈國家個部分非天主教人士則稱爲「教皇」。現任（第266任）教宗爲方濟各，勒2013年3月13號當選^[1]。

現任教宗方濟各

辭源

教宗個拉丁文原詞「Papa」源自希臘文個「πάπας」，原意為「父親」^[2]，起初用勒對任何司鐸或主教親暱個稱呼。4世紀或5世紀辰光，「πάππας」勒西羅馬帝國仍頻繁用勒稱呼主教，儘管渠已經開始逐漸轉變成現代個用途，即局限勒稱呼羅馬主教，而勒東羅馬帝國，尤其勒希臘交俄羅斯，司鐸仍然稱為「πάπας」。

但早在3世紀，亞歷山大港主教對埃及個各主教實行了集權，有意識個仿效羅馬主教個管轄方式。勒尼吉亞大公會議後，羅馬主教隔手對亞歷山大港大主教以管轄個優先權，並使用「亞歷山大港教宗」個稱號，該稱號乃朝演變成為希臘正教會、以及科普特教會個「亞歷山大港及宗徒聖馬爾谷之座個教宗」。

沿革

從《使徒行傳》時期開始，使徒們勒猶太會堂講道，但大部分基督徒聚會是分散勒各個家庭裏向進行，甚至當有迫害辰光也會得勒地下墳墓中進行，告咾聚會場許嚜邪氣分散，慢慢叫迭眼家庭聚會以大城市為中心形成一隻隻教區個概念，勒教區裏向伊拉就設立主教，主教或教父，迭排詞勒漢語裏向也翻譯為「監督」或者是「長老」，聖經裏向多趟提到使徒召集各地方長老交伊拉講言話，迭眼主教勒接受使徒個教導以後，隔手擔迭眼教導帶回各教區，迭些長老繼承使徒成為各地方教會個屬靈領袖。

教宗個三重冕，象徵教宗之訓誨、聖化、治理三項神權

教宗徽章

而主教之所以勒社會浪擁有蠻大個權力也有其歷史因素。初代教會由於聖經及使徒書信多半由人工抄寫勒羊皮浪，流傳並不普及，交關基督徒嘸沒辦法直接閱讀，對於基要信仰個根基並弗堅固，告咾各種異端思想老容易的滲透到教會裏向，特別是諾斯底主義個流行，長老們勒對付迭排異端個過程當中，加強了迭些主教個權力，其次，由於初代幾位具影響力個教父（也就是教會領袖特別是初代教會個神學家）個看重搭強調，無形中提高主教個地位，譬如伊格納修，愛任紐，居普良等。其中居普良提倡主教制度頂為賣力，伊曾話歇，一切主教儕平等，背叛主教就是背叛教會^[3]。到了國教時期，羅馬帝國形成五個主要主教，即羅馬主教、亞歷山大港主教、安提阿主教、君士坦丁堡主教、以及耶路撒冷主教，五個主教明爭暗鬥儕希望能成為主教之首，直到伊斯蘭教興起後，耶路撒冷、安提阿搭亞歷山大港教會儕因穆斯林勢力入侵而衰微，挺下來羅馬主教搭君士坦丁堡主教分別成為西東方教會重要領袖，而羅馬主教勒政權分裂個西部地區因多趟交入侵蠻族成功談判，其社會重要性更遠超過政權，成為西部有政教實權個人物^[4]。

羅馬主教權高於其他地區主教，有以下八隻原因。第一，羅馬是羅馬帝國個首都；第二，相傳使徒保羅交伯多祿儕是勒羅馬殉道，告咾羅馬個屬靈地位就更加高；第三，羅馬城曾勒尼祿時期畀火燒滅城，作為屠殺基督徒個藉口，保羅交伯多祿就是勒迭趟迫害中殉道，羅馬城受到帝國頂大個逼迫，告咾受欽佩；第四，羅馬教會曾慷慨救濟災荒，特別是耶路撒冷饑荒；第五，330年，羅馬帝國首都遷到拜占庭後，羅馬主教就成了西方教會個領袖；第六，4世紀、5世紀，當東方教會勒爭論神學問題辰光常莊會得尋羅馬主教來主持公道，因爲相比之東方教會受希臘文化影響，傾向神祕主義，較為感性，羅馬所代表個西方教會受羅馬法個影響，重視用邏輯推理，嚴謹個方式解讀聖經，告咾東方教會常莊尋西方教會個羅馬主教來做判定；第七，羅馬教會人才輩出有得交關傑出神學家；第八，基於對《瑪竇福音》（新教譯成功《馬太福音》）第16章第18-19節個解釋，伊拉認為聖伯多祿是羅馬教會個第一任主教，乃末羅馬主教繼聖伯多祿之後擁有迭把天國個鑰匙。^[3]

整個中世紀，對《聖經》個解釋全由各地方主教擔任，主教個權威甚至高於《聖經》個權威，同時基督教信仰也在箇辰光控制整個西方世界，羅馬教會有仔教廷個稱呼，羅馬主教也有了教皇或教宗個稱呼，其影響力及影響範圍甚至超過政權，政權個執政者也儕受教宗加冕，教宗可以從各地教會獲得捐稅，掌握神職人員個任用以及教會司法權。

一直到13世紀下半葉，英法兩國個皇室貴族，因自身利益弗願受外來勢力影響，對羅馬教廷各國政治個干涉越來越無法容忍，乃末到了十四十五世紀，英、法勒神職人員任用及教會司法權浪就歸到君主手浪，但仍向羅馬教廷納稅。中古時期，由於神職人員個腐敗，教廷勢力漸漸低落，主後1300年左右，義大利交法國彼此爭奪對教會個影響力，教廷一度遷到當時為教宗領地但瀕臨法國個亞威農（乃朝為法國領地），形成七任教宗儕勒亞維農治事個亞維農時期。後首來，甚至出現同時有兩個教廷搭兩位教宗個局面，主後1409年，巴黎大學個教授們提議召開比薩會議，會議中決議擔兩位教宗儕撤職，另立一位新教宗，然而迭趟會議法義個兩位教宗儕嘸沒出席，各國仍自擁各自認定個教宗，乃末比薩會議後形成了有三個教宗個局面。一直到主後1415年個康斯坦司會議，才正式取消脫三個教宗個職位，消除脫教會個分裂，也拿教宗個權力限制勒立法個團體就是大公會議，卻仍無法解決教廷腐敗個問題。終於勒1517年，馬丁路德發動宗教改革，因爲馬丁路德勒交關趟交大公教會個辯論中，始終堅持聖經權威高過主教權威個論點^[5]，持守此觀點個新教噶嚜從大公教會分裂出來，新教也稱為改革宗、更正教、抗議宗或廣泛稱為基督教會。原來個大公教會，一般也稱為天主教，便仍保存原來個教廷交教宗制度，而新教由於馬丁路德人人皆祭司個觀點，強調每個個人儕可以藉由讀聖經、禱告直接明白上帝個旨意，弗需透過主教或神職人員作為媒介^[5]，告咾產生了非主教制個教會體系，但依然有維持主教制個新教教會，即聖公會。

頭銜

教宗個完整頭銜是：羅馬主教、基督之代表、宗徒長之繼承人、普世教會最高教長、義大利首席主教、羅馬教省總主教及都主教、梵蒂岡城邦元首及天主眾僕之僕（拉丁文：Episcopus Romanus, Vicarius Christi, Successor principis apostolorum, Pontifex Maximus, Primatus Italiae, Archiepiscopus ac metropolitanus provinciae ecclesiasticae Romanae, Princeps sui iuris civitatis Vaticanae, Servus Servorum Dei），但老少使用。天主教會認為教宗為初任羅馬主教，即耶穌十二門徒之一個伯多祿個後繼，告咾一開始稱呼伊為「伯多祿之代表」，直到11世紀教宗革命（又稱格里高利改革）辰光才改稱為目前更具權威個「基督之代表」。2006年《宗座年鑑》刪脫「西方宗主教」（Patriarcha Occidentis）個稱呼。渠上一趟修訂勒1969年，伊歇教宗保祿六世擔「天主眾僕之僕」加勒名號當中，外加刪脫「光榮在位」個語句^[6]。

由於教宗勒中古時期擁有超乎西歐世俗君王而傍中國皇帝近乎對等個地位，曾勒明末清初漢譯介紹為「教化皇」，繼而影響周邊同為漢字文化圈個國家^[7]。另外勒西方世界，教宗有辰光也會得敬稱為「聖父」（英語對應詞：Holy Father），其意為「神聖個父親」，搭天主三位一體所指個聖父弗同^[8]。

職權

教宗畀天主教會認為是耶穌勒當今世界個代表，其主要任務即是領導耶穌建立個教會，並擔信仰傳佈到世界各個角落。教宗個教務職權稱其為「聖座」，是以教宗為中心構成個教務領導團體，除脫負責管理羅馬個天主教會，還有得代表交領導整個天主教會個功能，乃朝亦為國際法承認個主權實體，好搭世界各國締結外交關係。

除脫宗教職務之外，教宗也是梵蒂岡城國個國家元首，該國由聖座管治。梵蒂岡整個畀義大利首都羅馬包圍，勒1870年之前，教宗統治個區域一度拓展到整個義大利中部，其領土——即教廷國，稱為「聖伯多祿個遺產」。儘管授予教宗對迭眼領土統轄權個文件，也就是所謂個《君士坦丁御賜教產諭》，勒15世紀畀人證明是偽造個，教宗對教廷國個統治還是延續至1870年義大利統一，而義大利王國搭教宗之間最終個政治協議一直到1929年個《拉特蘭條約》才得以實現。1948年通過個《義大利共和國憲法》，再次確定該條約個合法性交有效性。

任職方式

教宗是由樞機組成個樞機團召開秘密會議互選產生個，一旦當選就是終身職，但中途可辭職。前任教宗逝世或辭職後，至繼任教宗選出前個職位空缺期，稱為「宗座從缺」。

乃朝個教宗選舉制度是勒1268年—1271年個三年空位期之後，勒1274年由里昂第二次大公會議採用個，包括樞機團勒選舉辰光必須交外界隔離個規定；而教宗選舉自1492年起固定勒拉梵蒂岡個西斯廷禮拜堂舉行迄今。

近況

教宗若望·保祿二世 （或譯為約翰·保羅二世，Pope John Paul II）勒1978年58歲辰光選為教宗，也是自哈德良六世（1522年—1523年間在位）以來首位選為教宗個非義大利人。若望·保祿二世勒2005年4月2日19:37（UTC）逝世後，勒4月2日到18日期間產生職位宗座空缺，4月18日開始個教宗選舉，用仔不足1日就選出德國籍樞機約瑟夫·拉青格為新任教宗，聖號為本篤十六世。

聖座發言人勒2013年2月11號宣布，當時85歲個教宗本篤十六世 （Pope Benedict XVI）因為健康因素，勒2月28日夜裏8點鐘（歐洲中部時間）正式退位，成為公元1415年以來，首位主動請辭個教宗。^[9]

2013年3月13號，梵蒂岡宣佈阿根廷個樞機豪赫·馬利歐·貝果格利歐當選教宗，尊號為方濟各（Pope Francis）。伊是額我略三世以後一千二百年來，第一位弗是歐洲出身個教宗；亦是天主教史浪第一位來自美洲及南半球個教宗，以及首位耶穌會出身個教宗。