暨南大学真如旧址

暨南大学真如旧址勒垃中国上海市普陀区上海西站（原沪宁铁路真茹站）北面，是暨南大学勒垃民国十二年到廿六年（1923-1937）勒垃上海个办学旧址，现在还有得科学馆帮暨南新村一号两处建筑，2015年12月9号成为普陀区文物保护点。

暨南大学真如旧址原科学馆（2021年8月）

历史

暨南大学前身是清政府勒垃光绪三十二年（1906）筹建个暨南学堂，一开始设勒南京薛家巷妙相庵，西北面是原金陵大学（今南京大学鼓楼校区）相邻。辛亥革命后停办，民国六年（1917）复办，改名国立暨南学校。因办学规模扩大、原址房屋紧张，民国十二年（1923）搬去上海真如镇原沪宁铁路真茹站边浪向办学，民国十六年（1927）改组国立暨南大学。民国廿六年（1937）8月份，淞沪会战爆发，真如校舍变成废墟，学校搬去租界继续办学。民国三十年（1941）12月份，太平洋战争爆发，日军打进租界，学校南迁福建建阳，民国三十五年（1946）6月抗战胜利以后回到上海，改用临时校舍办学，原校舍再也呒没恢复使用过^[1]。

暨南大学真如校址一开始设有商科大学部帮师范、中学两科，民国十六年（1927）改组成国立暨南大学以后设6系5科，民国十八年（1929）扩大到商、文、理、法、教育5只学院16系2科，大、中、小学生1600福哦人，潘序伦、叶公超、梁实秋、许德珩、洪深、夏衍、张君劢、沈从文、周建人、谢循初、邰爽秋、廖世承、罗隆基、童冠贤、潘光旦等人曾勒垃个𡍲教书^[2][3]。

建筑

民国廿四年（1935）十月国立暨南大学校舍平面图。

民国三十二年（1943）国立暨南大学校舍一带地图，从当年出版个最新大上海地图里向截取个。

暨南大学真如旧址大致范围勒垃今朝交通路以北、真南路东面个地方，民国十一年（1922）买仔个面个地造学堂。根据民国廿四年（1935）十月个国立暨南大学校舍平面图，教学区以理学院（科学馆）为中心，后头是文商学院（大教室），东面大礼堂（致远堂），西面洪年图书馆（纪念暨南学堂首任堂长郑洪年），图书馆西南面是办公楼（莲韬馆）搭仔教职员宿舍，北面是附属中学。校园西北面是教职员个房子（暨南村^[4]，也叫暨南新村），东北面是学生宿舍、食堂、实验农场，东面是体育场^[5]。

原建筑现在只挺科学馆搭仔暨南新村一号，当中科学馆勒垃今朝交通路3695号，民国十二年（1923）造个三层砖混结构，平面呈工字型，清水红砖汰石子相间外墙，红瓦坡屋顶，南北立面东西两端有拱券式壁柱装饰，高头拱心石。现在只挺东面个一部分，顶东端底楼是阶梯教室。暨南新村整体是民国十三年至十八年（1924-1929）造个，原先有独立洋房14座，现在只挺真南路交通路路口个一号建筑，民国十三年（1924）造个，叫“白屋”^[6]，原先是花园洋房，两层砖木结构，灰色水泥抹浆外墙，长期作为多户居民混居个公房，保存相对完整必过原貌变化弗小^[7][8]。2008年个辰光还有学生宿舍，勒垃原交通路3891弄里向，民国廿五年（1936）造个，两层砖木结构，清水墙，淞沪会战以后是汪精卫政权个警察局，中华人民共和国初期是西郊区电话局^[9]，现在呒没了。

2008年，普陀区文化局勒垃第三次全国文物普查期间重新发现暨南大学真如旧址，必过地块勒垃动迁，普陀区故咾举行专家论证会^[10]。2021年，暨南大学真如旧址所在地块（普陀区万里社区W060701单元X101-01和X102-02地块）成功出让，出让前相关政府部门制定开发保护并举个方针^[8][11]。

暨南大学真如旧址校门旧照，校门正对过就是科学馆 暨南大学真如旧址校门旧照，校门正对过就是科学馆  暨南大学真如旧址科学馆旧照 暨南大学真如旧址科学馆旧照  暨南大学真如旧址大礼堂旧照 暨南大学真如旧址大礼堂旧照  暨南大学真如旧址图书馆旧照 暨南大学真如旧址图书馆旧照