氡

氡是化學元素，符號Rn，原子序數86，屬於稀有氣體。嘸色、嘸臭、嘸味，有得放射性。渠是鐳自然衰變後個間接產物，頂穩定同位素是²²²Rn，半衰期3.8天。常規條件下頭，氡是只含放射性同位素個氣體，是密度頂高個氣體物質之一。

1899年，居里夫婦發現鐳發出個放射性氣體，隔年道恩謳渠「鐳射氣」（radium emanation）；1899年，歐文斯搭盧瑟福發現釷個放射性產物，謳「散發物」（emanation），第三年拿元素發現名譽畀拉居里夫婦；1904年德貝爾恩發現錒個放射性產物。

三種氣體先後有得多套命名方案：1904年exradio、exthorio搭exactinio，1918年radon、thoron搭akton，1919年radeon、thoreon搭actineon搭著1920年最終版radon、thoron搭actinon。拉姆齊繼（搭Collie提出）1904方案之後，1910年又搭格雷提出鐳射氣個新名字「niton」（<拉丁語nitens「發光」+on「惰性氣體），國際原子量委員於1912年採納。1931年，瑪麗·居里、盧瑟福、德貝爾恩共同發文，要用盧瑟福最初個命名Emanation作為三隻同位素個正式元素名。但是元素周期表一徑用頂穩定個同位素radon作為元素名，另外兩隻同位素thoron、actinon改名²²⁰Rn、²¹⁹Rn。個咾看早期文獻一定要當心，radon指個只是²²²Rn，而不是三種emanation個統稱。