法华镇

法华镇是中国上海历史丄只镇，大样模子勒垃长宁区新华路街道。^[1]

历史

北宋开宝十年（970年），惠禅和尚勒垃华亭县高昌乡李漎泾北岸造仔法华寺（乃朝法华镇路525号），寺名法华两个字从“妙法莲华经”来个，意思是佛经精妙，洁丽如莲。法华寺成立仔么，周边闹猛起来哉，叫法华巷。^[2]

明朝嘉靖年，法华寺周边人口规模帮一般个镇差大勿多，李漎泾两岸到处是商铺、民房，形成一条东西长约三里个街道。法华寺周边开始叫法华镇。^[2]

乾隆九年（1744年），吴淞巡检司搬到法华镇。清朝嘉庆年修订个《上海县志》里向拿法华镇看成上海县西部第一个集镇。咸丰三年（1853年），小刀会首领刘丽川领仔帮军队打法华镇，拿吴淞巡检司烧脱。咸丰五年正月初一（1855年2月17号），刘丽川半夜里向突围失败死脱，畀清军活捉个畀领到法华镇韦天庙（乃朝法华镇路803～815号）处决。咸丰十年（1860年），清政府为仔加紧镇压长毛，扩大地方团练规模，法华镇又叫法华（团练）局。光绪三十二年（1906年），清末新政，开办学堂，法华局改叫法华学区。宣统二年（1910年），法华寺周边人口只有得18452人，设立法华乡。因为外头地方工厂越来越多，原先勒垃法华乡种田做手工业个农民出去打工，法华乡人越来越少。^[2]

民国17年（1928年）7月9号，法华乡划畀上海特别市，法华乡改设成法华区^[1]。八一三事变之后，日军攻占法华寺周边地区。^[2]

中华人民共和国成立仔么，法华寺地区划畀长宁区。^[2]