上海市
中华人民共和国直辖市 From Wikipedia, the free encyclopedia
Remove ads
上海（上海閒話：[zãhe]），簡稱「滬」，別稱「申」，是中華人民共和國個直轄市之一。地理方位勒拉中國東部長江沖積三角洲、東海個邊上向、長江入海口南岸。眼門前是中國發展得頂快個城市，也是經濟頂發達個城市之一，渠撥人認爲是中國個商業搭金融中心，是全世界公認個全中國頂大個城市。上海勒拉歷史上，是一個以吳越人爲主體，外加接納交關世界各地人口個城市，勒拉1949年，人口不罷500萬，箇歇常駐人口兩千五百萬朝上。箇裡向，50%朝上是改革開放之後，從外地搬得來個，迭排移民個習俗搭上海本土居民有蠻大個區別拉海，已經引發替代搭扭曲本地文化個問題。
中華民國大陸時期個辰光，上海是亞洲頂大個城市，還是東亞頂頂重要個工商業中心，公認爲東方紐約。1990年起實行個浦東開發開放政策，讓上海經濟一記頭發展起來。
2005年上海年貨輸送量有得4.43億噸介多。2006年成爲世界上向排勒第三位個集裝箱港口，輸送量有得2171萬標準集裝箱，勒拉新加坡搭香港個後頭。到仔2008年，上海港各式各樣個碼頭有得1200多隻，萬噸級以上個生產性泊位137個，碼頭線總長毛115公里，每年輸送量有個58170萬噸，最大靠泊能力15萬噸級。至2010年，上海港已成爲世界最大個集裝箱港。
2006年上海個GDP爲2,972億美金，個人GDP已經達到了12,748美金。2010年，世界博覽會勒上海舉行。另外，2009／2010年上海個人類發展指數達到0.908，成爲大陸最高，也是唯一一隻達到極高人類發展指數個中國城市。
上海是大陸個商業幫經濟中心，地區生産總值勒大中華區城市中排第一位。上海頂重要個產業是商貿流通、金融、資訊、製造等。上海也是中國個鐵路幫航空個樞紐，上海個港口是世界高頭最大個集裝箱港之一，已經成爲一隻國際金融跟航運中心。
Remove ads
地理
氣候
上海屬於亞熱帶季風氣候，四季分明，日照充分，雨量充沛。氣候溫和濕潤，年平均氣溫17.0 °C。春（4月-5月）、秋（10月-11月）比較短，冬（12月-次年3月）、夏（6月-9月）比較長。有得春雨、梅雨、秋雨三個雨期，個咾5月到9月為上海個汛期，降水量達到全年個60%橫裡。每年7月進入伏旱天氣，比別個月份更加溫潤潮濕。平均氣溫爲28.7°C，平均每年有得8.7日天頂高溫天氣超過攝氏35度。每年1月是全年頂冷個辰光，平均氣溫4.8°C。市區徐家匯個（1872年開始統計）極端最高氣溫爲40.9°C（2017年7月21日），極端最低氣溫爲-12.1°C（1893年1月19日）。上海本生（1951年開始統計）極端最高氣溫39.9℃（2013年8月6日、8日），極端最低氣溫-10.1℃（1977年1月31日）。受北方蒙古高原搭西伯利亞冷空氣個影響，會得出現霜凍個現象。假使同時碰著強冷空氣搭暖濕氣流個說話，上海也會得出現雨夾雪或者降雪天氣。
Remove ads
行政區劃
搿歇辰光上海有16個市轄區，共106個鎮，2個鄉，99個街道辦事處，4463個居民委員會搭1571個村民委員會。[4]
2009年5月6號，原來個南匯區搭浦東新區併脫。[5] 2011年7月26號，原來個盧灣區搭黃浦區併脫。 [6] 2015年12月30號，原先個閘北區跟靜安區併脫。 [7] 2016年7月22號，原來個崇明縣變成仔崇明區。[8]
歷史
建城搭發展
勒拉公元751年（唐明皇天寶十年），設華亭縣。1277年（元朝至元十四年）拿華亭縣升級爲華亭府，第二年改叫松江府。到滿清人個辰光松江府轄有華亭、婁、上海、青浦、金山、奉賢、南匯7隻縣搭川沙撫民廳。蘇州河以北於1218年1月7日（南宋嘉定十年十二月初九日）設嘉定縣，後頭又從當中分出一部分作爲寶山縣。
上海市區原先是蘇州河下游個一隻漁村，至唐宋逐漸成爲繁榮個港口。南宋辰光（1265-1274年）建上海鎮，因勒拉黃浦江西面個上海浦得名。到明朝辰光，上海已經成爲江南有名個貿易中心，老縣城中央修造豫園、城隍廟、書隱樓等建築物。明朝末年，西方個耶穌會傳教士利瑪竇搭上海人徐光啟合作，翻譯《幾何原本》，也拿天主教傳播到上海哉。
近代遠東第一城
清朝之後，上海繼續發展，到嘉慶辰光，已經成爲全帝國頂大個貿易港口之一。由於優越個地理位置，也吸引到西方文明國家個注意。來勒1842年南京條約簽署後，上海成爲帝國對世界開放個第一批口岸，大英帝國勒箇𡍲開闢租界地。法蘭西之後幾年也勒洋涇浜以南開闢租界。上海近代個城市景觀開始形成。
1927年設立上海特別市，1930年5月改叫上海市。迭個辰光，上海個發展已經搭國際接軌，外灘邊浪修仔交關西洋折中風格個銀行建築物，形成著名個「萬國建築博覽會」。勒南京路高頭，四大百貨公司開始修造新個百貨商場，大小弗亞於紐約搭倫敦。南京西路到靜安寺一帶成爲有鈔票個資本家修造大莊園個場所。來勒法租界霞飛路，中產階級個新式里弄一片片被房地產開發商規劃。1917年之後逃難來個白俄，開始逐漸融入上海個生活，伊拉居住個岳陽路地區，現在還有一尊普希金銅像，作爲迭個辰光個見證。
國民黨爲了搭租界裏向迭個國際化、文明化個上海相抗衡，大力開發江灣地區個建設，準備拿江灣地區修造成弗亞於市區個上海特別市。勒拉1929-1937年，國民黨政府先後修造了江灣體育場，上海特別市政府，上海特別市博物館，上海特別市圖書館等建築物，展現明顯個中國宮殿風格。
勒拉虹口地區，日本人從一戰之後就弗斷擴充實力，勒拉現在個四川北路地區，修造了自家個神社、本願寺，一副東瀛情調。多倫路高頭個內山書店，也體現出迭個辰光日本人來勒虹口地區個巨大影響力。
1840年以後，上海老早是畀人逼勒開放個港口。結果來了交關外國人，勒浪上海開租界。渠拉有自家個法律搭仔行政機構。還有交關猶太人逃到此地，勒浪上海開店鋪，扒仔木老老鈔票，變成功富翁，還勒浪上海造仔交關多個房子。哈同、沙遜就是其中鼎鼎有名個猶太人。1949年以後，伊拉儕跑脫哉。
1941年太平洋戰爭爆發之後，日本搭當時辰光個汪精衛政府簽署條約，來勒日本佔領區廢脫老早個租界，隨後英美等國也搭當時來勒重慶個蔣介石政府簽署條約，宣佈廢脫租界。告咾，到1945年二戰結束個辰光，保持一百多年自治個上海近代社會體系也宣告解體哉。
來勒第二次國共內戰辰光，上海充當國民黨政權個經濟中心，不過因爲糟糕個財政搭飛漲個軍費，國民黨老快就碰到用鈔票個問題。到1948年，金融狀況一塌糊塗，又因爲國民黨來勒軍事高頭個無能。到1949年5月，上海畀共產黨佔領。國民黨來勒離開上海之前，拿上海金庫內交關黃金運到臺灣。
計劃經濟下個轉型
1949年之後，上海徹底切斷自家搭世界其他市場個聯繫。金融市場畀伊取締，銀行業搭私有經濟被強制轉軌。老早喧囂個外灘，徹底改變用途，上海發展個重點，畀伊歸納到工業中心高頭。來勒之後交關年數，上海製造成爲中國名牌個同義詞。來勒同一辰光，上海個城市規模也繼續擴大，老早認爲個租借地區已經弗好容納介多人口，告咾市區向東北搭西面擴展。徐家匯、田林新村、曹楊新村儕來勒迭段辰光開始形成。上海人個職業，徹底圍繞工業進行發展。大部分上海人成爲各種各樣個工人。
城市規劃方面，老早個石庫門房子撥拆脫比較少，衹有來勒市中心老早個哈同花園撥拆脫，修造蘇聯史達林風格個上海展覽館。上海人口來勒迭段辰光增長比較快，不過儕是自然增長，所以家家戶戶個用房儕比較緊張。來勒老城廂搭南京路等地段。上海三代同堂，蹲勒一間房間裏過夜是平常事體，箇也讓上海人來勒租界辰光形成個「門檻精明」個形象進一步加深。
來勒50年代到70年代，上海個外來人口流動也因爲戶籍政策徹底停滯，整整一代上海人開始來勒純粹個上海言話環境當中成長，迭種環境也讓三十年代來上海個淮揚地區移民搭四十年代末個南下幹部子女，接受海派文化，對上海當代文化個形成，起到交關大個作用。來勒六十年代，有老多個上海工廠搬遷到內地，作爲支援大三線個舉動。又有交關上海年輕人上山下鄉，伊些舉動，儕是計劃經濟辰光個特有產物，不過，箇代人個青春也嗷著荒廢脫哉。
開放後個動盪
1978年之後，上海也開始慢慢改革開放，不過來勒八十年代，主體面膜還是沒啥大個更改，上海依然是以工業爲主個城市，上海人依然是各行各業個基礎，不過七十年代開始個計劃生育已經讓上海個人口增長開始減慢。到1990年代，上海個浦東地區來勒中央個政策下開始開發，上海重新發展起老早撥取締個金融市場。不過上海老早文化中心個地位，已經弗可能恢復哉。
2000年代後，上海外來人口流入猛增，外來人口個規模，從2000年個一百多萬人，猛增到2012年個一千八百多萬人，來勒絕對數量高頭已經超過本地戶籍居民。加上外來人口絕大多數是青年人，告咾對上海各個方面儕帶來邪氣大個衝擊。現在來勒上海碰到講河南話人個概率已經超過碰到講上海言話年輕人個概率，長此以往，上海個面貌必定將發生顛覆性個變化。
上海老城牆
1880年個老西門
1930年代個南京路
1930年代個遠東第一都市
上海老城外頭
上海老早個東正教堂
Remove ads
Wikiwand - on
Seamless Wikipedia browsing. On steroids.
Remove ads