法华镇

法華鎮是中國上海歷史丄隻鎮，大樣模子勒垃長寧區新華路街道。^[1]

歷史

北宋開寶十年（970年），惠禪和尚勒垃華亭縣高昌鄉李漎涇北岸造仔法華寺（乃朝法華鎮路525號），寺名法華兩個字從「妙法蓮華經」來個，意思是佛經精妙，潔麗如蓮。法華寺成立仔麼，周邊鬧猛起來哉，叫法華巷。^[2]

明朝嘉靖年，法華寺周邊人口規模幫一般個鎮差大勿多，李漎涇兩岸到處是商鋪、民房，形成一條東西長約三里個街道。法華寺周邊開始叫法華鎮。^[2]

乾隆九年（1744年），吳淞巡檢司搬到法華鎮。清朝嘉慶年修訂個《上海縣誌》裏向拿法華鎮看成上海縣西部第一個集鎮。咸豐三年（1853年），小刀會首領劉麗川領仔幫軍隊打法華鎮，拿吳淞巡檢司燒脫。咸豐五年正月初一（1855年2月17號），劉麗川半夜裏向突圍失敗死脫，畀清軍活捉個畀領到法華鎮韋天廟（乃朝法華鎮路803～815號）處決。咸豐十年（1860年），清政府為仔加緊鎮壓長毛，擴大地方團練規模，法華鎮又叫法華（團練）局。光緒三十二年（1906年），清末新政，開辦學堂，法華局改叫法華學區。宣統二年（1910年），法華寺周邊人口只有得18452人，設立法華鄉。因為外頭地方工廠越來越多，原先勒垃法華鄉種田做手工業個農民出去打工，法華鄉人越來越少。^[2]

民國17年（1928年）7月9號，法華鄉劃畀上海特別市，法華鄉改設成法華區^[1]。八一三事變之後，日軍攻佔法華寺周邊地區。^[2]

中華人民共和國成立仔麼，法華寺地區劃畀長寧區。^[2]